ދެ ވަނަ ލެގުގައި ވެސް ކްލަބް ބްރޫޖް ބަލިކޮށް، ބެންފީކާ ކުއާޓާ ފައިނަލަށް

ޔުއެފާ ޗެމްޕިއަންސް ލީގުގެ ގަދަ 16 ގެ ދެ ވަނަ ލެގުގައި ވެސް ބެންފީކާ އިން ކުލަބް ބްރޫޖް ބަލިކޮށްފި އެވެ.

މި ދެ ޓީމު ކުލަބް ބްރޫޖްގެ ދަނޑުގައި ކުޅުނު މެޗު ވެސް ބެންފީކާ އިން ވަނީ ކާމިޔާބުކޮށްފަ އެވެ. އެހެންކަމުން އަންގާރަ ދުވަހުގެ ރޭ ބެންފީކާގެ އަމިއްލަ ދަނޑުގައި ދެ ވަނަ ލެގަށް ނުކުތްއިރު ވެސް އެ ޓީމަށް ވަނީ ކުއާޓާ ފައިނަލްގެ ފުރުސަތު ބޮޑުވެފަ އެވެ. އަމިއްލަ ދަނޑުގައި ބެންފީކާ އިން ކުލަބް ބްރޫޖްގެ މައްޗަށް ކުރި ހޯދީ 5-1 އިންނެވެ. މެޗުގެ ފުރަތަމަ ހާފުގައި ބެންފީކާ އިން ވަނީ ދެ ލަނޑުގެ ލީޑެއް ނަގައިފަ އެވެ. މެޗުގެ 38 ވަނަ މިނެޓުގައި ބެންފީކާ އަށް ލީޑު ނަގައިދިނީ ރަފާ ސިލްވާ އެވެ. ފުރަތަމަ ހާފުގެ އިތުރު ވަގުތުގައި އެ ޓީމުގެ ލީޑު ފުޅާކޮށްދިނީ ގޮންޒާލޯ ރާމޯސް އެވެ. ދެ ވަނަ ހާފަށް ނުކުމެ ބެންފީކާގެ ތިން ވަނަ ލަނޑު ވެސް ޖެހީ ރާމޯސް އެވެ. މެޗުގެ 71 ވަނަ މިނެޓުގައި ލިބުނު ޕެނަލްޓީއެއްގައި އެ ޓީމުގެ ހަތަރު ވަނަ ލަނޑު ޖެހީ ޖާއޯ މާރިއޯ އެވެ. އޭގެ ހަ މިނެޓު ފަހުން ބެންފީކާގެ ފަސް ވަނަ ލަނޑު ޖެހީ ޑޭޭވިޑް ނެރޭސް އެވެ. މެޗުގައި ކުލަބް ބްރޫޖްގެ ހަމައެކަނި ލަނޑު 87 ވަނަ މިނެޓުގައި ޖެހީ ބްޔޯން މެއިއާ އެވެ.

މުބާރާތުގެ ކުއާޓާ ފައިނަލުން މިހާތަނަށް ޖާގަ ލިބުނު ދެ ޓީމަކީ ޗެލްސީ އާއި ބެންފީކާ އެވެ. ގަދަ 16 ގެ ދެ ވަނަ ލެގުގެ މެޗުތައް ބުދަ ދުވަހުގެ ރޭ ވެސް ކުޅޭނެ އެވެ.