މާލޭ ލީގު: ވެލެންސިއާ ބަލިކޮށް އީގަލްސް ގަދަ ހަތަރެއްގެ އުންމީދު އާކޮށްފި

މާލޭ ލީގުގައި ވެލެންސިއާ ބަލިކޮށް އީގަލްސް ގަދަ ހަތަރެއްގެ އުންމީދު އާކޮށްފި އެވެ.

ހޯމަ ދުވަހު ހަވީރު ކުޅުނު މި މެޗު ވެލެންސިއާ އަތުން އީގަލްސް މޮޅުވީ 0-1 ގެ ނަތީޖާއަކުންނެވެ.

އީގަލްސްގެ ފަރާތުން މޮޅު ކުޅުމެއް ފެނިގެންދިޔަ މި މެޗު ފެށިގެން ބޯޅަ ކޮންޓްރޯލްކޮށްގެން ރަނގަޅަށް ކުޅުނީ އެޓީމުންނެވެ. އެގޮތުން އެޓީމުން ވަނީ ލަނޑު ޖެހުމަށް ގިނަ ފުރުސަތުތަކެއް ތަނަވަސްކޮށްފައެވެ.

އީގަލްސް އިން މެޗުގެ ލީޑު ނެގީ 14 ވަނަ މިނެޓުގައި އަހުމަދު ނާޝިދު (ނާއްޓޭ) ކާމިޔާބުކުރި ލަނޑުންނެވެ. މި ލަނޑު އޭނާ ކާމިޔާބުކުރީ ބޮލުންނެވެ. މި ލަނޑަށްފަހުވެސް އެޓީމަށް ވަނީ ލީޑު ފުޅާކުރުމަށްވެސް ފުރުސަތުތަކެއް ލިބި ބޭކާރުވެފައެވެ.

ފުރަތަމަ ހާފް ނިމުނީ 0-1 ގެ ނަތީޖާއިން ވެލެންސިއާގެ މައްޗަށް އީގަލްސް ކުރިހޯދައިގެންނެވެ.

ދެވަނަ ހާފް ފެށިގެންވެސް އީގަލްސްގެ ފަރާތުން މޮޅު ކުޅުމެއް ފެނިގެންދިޔައިރު، އެޓީމުން ދިޔައީ ވެލެންސިއާގެ ހާފަށް ބާރުބޮޑުކޮށް ގިނަ ހަމަލާ އުފައްދަމުންނެވެ. އެގޮތުން ނާޝިދު އަދި ރިޒުވާން ފޮނުވާލި ހަމަލާތައް ފާހަގަކޮށްލެވެއެވެ.

މެޗުގެ ފަހު 10 މިނެޓު ތެރޭގައި ވެލެންސިއާގެ ފަރާތުން ރަނގަޅު ކުޅުމެއް ފެނިގެންދިޔައިރު، އެޓީމުން ވަނީ ލަނޑު ޖެހުމަށް ފުރުސަތުތަކެއް ތަނަވަސްކޮށްފައެވެ. އެހެންނަމަވެސް އީގަލްސް އިން ވަނީ މޮޅު ޑިފެންސެއްކޮށް، ވެލެންސިއާގެ ހަމަލާތައް ދިފާއުކޮށްފައެވެ.

މި ނަތީޖާއާއެކު އީގަލްސް އޮތީ ކުޅުނު 11 މެޗުން ލިބުނު 20 ޕޮއިންޓާއެކު ޕޮއިންޓް ތާވަލުގެ ތިންވަނައިގައެވެ. މެޗުން ބަލިވި ވެލެންސިއާ އޮތީ ކުޅުނު 11 މެޗުން ލިބުނު ދެ ޕޮއިންޓާއެކު ޕޮއިންޓް ތާވަލުގެ ފުލުގައެވެ.