ހުޅުމާލޭ ޖޫސް ޓައިމަށް ގެއްލުންދިން މައްސަލާގައި ތުހުމަތުކުރެވޭ އިތުރު މީހަކު ހައްޔަރުކޮށްފައިވާކަމަށް ދިވެހި ފުލުހުންގެ ޚިދުމަތުން ބުނެފިއެވެ.

ފުލުހުން ބުނީ ހައްޔަރުކޮށްފައިވަނީ އުމުރުން 28 އަހަރުގެ ފިރިހެނެއްކަމަށެވެ. މިމީހާ ހައްޔަރުކޮށްފައިވަނީ ކޯޓު އަމުރެއްގެ ދަށުން، ހޯމަ ދުވަހުގެ ވަގުތެއްގައިކަމަށް ފުލުހުން ބުނެއެވެ.

މިމައްސަލާގައި މީގެކުރިން ހައްޔަރުކޮށްފައިވާ 19 އަހަރުގެ މީހާގެ ބަންދަން 15 ދުވަސް ކޯޓުން ޖަހައިދީފައިވާކަމަށް ފުލުހުން ބުނެއެވެ.

ޖޫސްޓައިމަށް ދިން ހަމަލާއާ ގުޅިގެން، ހުޅުމާލޭގެ އެޕާޓްމަންޓެއް ބަލައި ފާސްކުރިއިރު މަސްތުވާތަކެތި ފެނިފައިވާތީ 7 މީހަކު މީގެކުރިން ވަނީ ހައްޔަރުކޮށްފައެވެ.

މި އެޕާޓްމަންޓް ބަލައިފާސްކުރިއިރު، މާރާމާރީ ހިންގުމަށް ބޭނުންކުރާ ބައެއް ތަކެއްޗާއެކު މަސްތުވާތަކެތި ފެނުމާ ގުޅިގެން 7 މީހަކު ހައްޔަރުކޮށްފައިވާކަމަށް ފުލުހުން ބުނެފައިވެއެވެ.

މި މީހުންގެ ތެރޭގައި އަންހެނަކުވެސް ހިމެނޭ ކަމަށާއި، މި އެންމެންނަކީވެސް ދިވެހިން ކަމަށް ފުލުހުން ބުނެއެވެ.

ޖޫސް ޓައިމަށް ވަދެ، މަރުތޭލުން އެތަނަށް ގެއްލުންދިން މީހުންގެ ތެރެއިން އެކަކު މީގެ ކުރިން ހައްޔަރުކޮށްފައިވެއެވެ. އެއީ ހެލްމެޓް އަޅައިގެން މޫނު ނިވާކޮށްގެން ތިބި ދެ މީހެކެވެ. އެތަނަށް އެ މީހުން ވަދެ، ތަކެއްޗަށް ގެއްލުންދޭ ވީޑިއޯއެއް ވަނީ ސޯޝަލް މީޑިޔާގައި ދައުރުވެފައެވެ.