ލިވަޕޫލް 7 - ޔުނައިޓެޑް 0، ނޫނިއޭޒް، ގަކްޕޯ، ސަލާހް ޔުނައިޓެޑް ހޭ އަރުވާލައިފި

ފަހަކަށް އައިސް އުދުހެމުން އައި މެންޗެސްޓާ ޔުނައިޓެޑް ކޮޅަށް 7 ގޯލު ޖަހައިގެން ލިވަޕޫލް، ޔުނައިޓެޑް ލަދުގަންނަވާލައިފި އެވެ.

މިއީ 1931ގެ ފަހުން ޔުނައިޓެޑްގެ އެންމެ ބޮޑު ބައްޔެވެ. އަދި މިއީ 1895ގައި ޔުނައިޓެޑް އަތުން ލިވަޕޫލް މޮޅުވި 7-1ގެ ނަތީޖާ ފަހަތަށްލައި ލިވަޕޫލް ހޯދި މުޅިން އައު ރެކޯޑެއްވެސްމެ އެވެ.

އިނގިރޭސިވިލާތުގެ އެންމެ ވާދަވެރި ދެ ޓީމު ލިވަޕޫލްގެ އެންފީލްޑް ސްޓޭޑިއަމުގައި ކުޅުނު މެޗުގައި ޒުވާން ދެ ފޯވަޑުން ކަމަށްވާ ކޯޑީ ގަކްޕޯ އާއި ޑްރަވިން ނޫނިއޭޒް އަދި ތަޖުރިބާކާރު ފޯވަޑް މުހައްމަދު ސަލާހްކުރެ ކޮންމެ ކުޅުންތެރިއަކު ވެސް ދެ ލަނޑު ޖެހި އެވެ. ފަހު ލަނޑު ޖެހީ ބްރެޒިލްގެ ފޯވަޑް ރޮބާޓޯ ފިރްމީނޯ އެވެ.

މިއާއެކު ލިވަޕޫލަށް ވަނީ އަންނަ ސީޒަނުގެ ގަދަ ހަތަރެއްގެ ފުރުސަތު ވަރަށް ބޮޑުވެފަ އެވެ. މި ވަގުތު އެއް މެޗު މަދުންކުޅެގެން ލިވަޕޫލް އޮތީ 42 ޕޮއިންޓާއެކު ފަސް ވަނާގަ އެވެ. ހަތަރުވަނާގައި ޓޮޓެންހަމް އޮތީ 45 ޕޮއިންޓާއެކުގަ އެވެ. ޔުނައިޓެޑް އޮތީ 49 ޕޮއިންޓާއެކު ތިން ވަނާގަ އެވެ. ނަމަވެސް މި ނަތީޖާގެ ސަބަބުން މި ސީޒަނުގައި ޕްރެމިއާ ލީގު ކާމިޔާބު ކުރުމުގެ ފުރުސަތު މުޅިން ކަހަލަ ގޮތަކަށް ޔުނައިޓެޑަށް ވަނީ ބަންދުވެފަ އެވެ. އެއީ އެއްވަނާގައިވާ އާސެނަލްއާ ދެމެދު އޮތް ފަހަރު 14 ޕޮއިންޓަށް ވުމުންނެވެ.  

މި މެޗުގައި ޖެހި ދެ ގޯލާއެކު މިސުރުގެ ސަލާހް ވެފައިވަނީ ޕްރެމިއާ ލީގުގައި ލިވަޕޫލަށް އެންމެ ގިނަ ގޯލު ޖަހައިދިން ކުޅުންތެރިޔާ އަށެވެ. އެއީ205 މެޗުން 129 ގޯލާއެކުގަ އެވެ.