ވެލެންސިޔާވެސް ބަލިކޮށް، ލީގު ހޯދުމުގެ ރޭހުގައި ބާސެލޯނާ ކުރިއަށް!

ސްޕެނިޝް ލަލީގާގެ ޗެމްޕިއަންކަމާ ދިމާއަށް މިސްރާބު ޖަހާފައިވާ ބާސެލޯނާއިން, މެޗުގެ ބޮޑުބައި އެކަކު މަދުކޮށް ކުޅެވެސް ވެލެންސިޔާ ބަލިކޮށް މުހިއްމު ފިޔަވަޅެއް އަޅައިފިއެވެ.

އަމިއްލަ ދަނޑުގައި ކުޅުނު މެޗު ބާސެލޯނާއިން ކާމިޔާބުކުރީ 1-0 ނެވެ. 15 ވަނަ މިނިޓްގައި ލަނޑު ޖެހީ ބްރެޒިލްގެ ރަފީނިއާއެވެ. އޭގެފަހުން 55 ވަނަ މިނިޓްގައި ލިބުނު ޕެނަލްޓީއެއް ފެރަން ޓޮރޭޒް އަތުން ނާކާމިޔާބުވިއެވެ. އަދި ޑިފެންޑަރ ރޮނާލްޑް އަރައުޚޯއަށް 59 ވަނަ މިނިޓްގައި ސީދާ ރަތްކާޑެއް ދެއްކުމުން މެޗުގެ ބޮޑުބައި ބާސެލޯނާއިން ފުރިހަމަކުރަން ޖެހުނީ އެކަކު މަދުކޮށެވެ. އެއީ ހޫގޯ ޑުރޯއަށް ކުރި ފައުލަކަށް ދެއްކި ރަތްކާޑެކެވެ.

މިމޮޅާއެކު ބާސެލޯނާއިން ވަނީ އެންމެ ފަހުގެ ޗެމްޕިއަން ވާދަވެރި ރެއާލް މެޑްރިޑްގެ މައްޗަށް 10 ޕޮއިންޓްގެ ލީޑެއް ނަގާފައެވެ. ބާސެލޯނާ އެއްވަނާގައި އޮތީ 24 މެޗުން 62 ޕޮއިންޓާއެކުއެވެ. ދެވަނާގައި ރެއާލް މެޑްރިޑް އޮތީ 23 މެޗުން 52 ޕޮއިންޓާއެކުއެވެ.