މާރާމާރީ ހިންގި މައްސަލާގައި ހައްޔަރުކުރި 11 ބިދޭސީން ދޫކޮށްލައިފި
11 މީހުން ދޫކޮށްލިނަމަވެސް، ފުލުހުން ބުނަނީ މައްސަލައިގެ ތަހުގީގު ކުރިއަށްދާކަމަށް
ފުލުހުންގެ މައި އިދާރާ
ހޮނިހިރު ދުވަހު ހަވީރު ހިންގި މާރާމާރީއަކާ ގުޅިގެން ހައްޔަރުކުރި 11 ބިދޭސީން ދޫކޮށްލައިފިއެވެ.
ހޮނިހިރު ދުވަހު މާލޭގެ ޓީޖެޓީ ސަރަހައްދުގައި ހިނގައިދިޔަ މި މާރާމާރީގެ ވީޑިއޯ މިހާރު ސޯޝަލް މީޑިއާގައި ވަނީ އާންމުވެފައެވެ. އެ ވީޑިއޯގައި ފެންނަނީ ޓީޖެޓީގައި އޮތް ދެ ދޯންޏެއްގައި ތިބި ބަޔަކު ލަކުޑިބުރިތަކުން އެއް ބަޔަކު އަނެއް ބަޔަކާ ހަމަލާދެމުންދާތަނެވެ. އަދި ހައެއްކަ މީހުން ވެގެން އެހެން މީހަކަށް ހަމަލާ ދޭ މަންޒަރުވެސް ފެނެއެވެެ.
އެ މައްސަލާގައި 11 މީހަކު ހައްޔަރުކުރުމަށްފަހު އެ 11 މީހުންވެސް މިހާރު ވަނީ ދޫކޮށްލާފައެވެ. އެހެން ނަަމަވެސް ފުލުހުން ބުނީ މައްސަލަ ތަހުގީގުކުރަމުންދާ ކަމަށެވެ. މި މާރާމާރީގައި އަނިޔާވި ފަސް މީހަކަށް އައިޖީއެމްއެޗްގައި ފަރުވާދިނުމަށްފަހު މިހާރު ވަނީ ދޫކޮށްލައިފައެވެ.
މި ދުވަސްވަރަކީ މާލެ ސަރަހައްދުގައި ސިލްސިލާ މާރާމާރީތަކެއް ހިންގަމުން އަންނަ ދުވަސްވަރެކެވެ. ފުލުހުން އެ ކަން ގުޅުވަނީ ގޭންގުތަކާއެވެ. އަދި ބިދޭސީންގެ މެދުގައި މިފަދަ މާރާމާރީއެއް ހިންގައިފައިވާއިރު، ހޮނިހިރު ދުވަހުވެސް މީހެއްގެ އިނގިލީގައި ދަތް އަޅައި ބުރިކޮށްލި މީހަކު ވަނީ ޝަރީއަތް ނިމެންދެން ބަންދުކޮށްފައެވެ.
