އެމްއެންޕީގެ ކެނޑިޑޭޓަކު ވެސް ގުރައިދޫ ދާއިރާއަށް ނެރެނީ
އެމްޑީޕީން ވެސް ޕްރައިމަރީއަށް ވަނީ ހުޅުވައިލައިފައި
އެމްއެންޕީން ބޭއްވި ނޫސްވެރިންގެ ބައްދަލުވުމެއްގެ ތެރެއިން
ރައްޔިތުންގެ މަޖިލީހުގެ ގުރައިދޫ ދާއިރާގެ ހުސްވެފައިވާ ގޮނޑިއަށް މޯލްޑިވްސް ނޭޝަނަލް ޕާޓީ (އެމްއެންޕީ) އިން ވެސް މެންބަރަކު ނެރެން ނިންމައިފިއެވެ.
ރައްޔިތުން މަޖިލީހުގެ ގުރައިދޫ ދާއިރާގެ ގޮނޑި ތަމްސީލުކުރައްވަމުން ގެންދެވި ޕީޕީއެމްގެ މެންބަރު އިބްރާހީމް ރިޒާ ފެބްރުއަރީ މަހުގެ 23 ވަނަ ދުވަހު އަވަހާރަވުމާއި ގުޅިގެން އެ ގޮނޑި ވަނީ ހުސްވެފައެވެ. ކެންސަރު ބައްޔަށް ފަރުވާ ހޯއްދަވަމުން ގެންދަވަނިކޮށް އޭނާ އަވަހާރަވީ މިދިޔަ ބުދަ ދުވަހުގެ ރޭ މެލޭޝިއާގައެވެ.
އެމްއެންޕީއިން ވަނީ އެ ޕާޓީއިން ގުރައިދޫ ދާއިރާގެ ގޮނޑިއަށް ކުރިމަތިލާން ޝައުގުވެރިކަން ހުރި ފަރާތްތަކުން ޕްރައިމަރީގައި ބައިވެރިވުމަށް ހުޅުވައިލައިފައެވެ. އެ ފުރުސަތު އަންގާރަ ދުވަހާ ހަމައަށް ހުޅުވައިލައިފައިވާއިރު އެ ޕާޓީގެ ޕްރައިމަރީއެއް ބާއްވަން ޖެހިއްޖެނަމަ ވޯޓުލުން ބާއްވާނީ މި މަހުގެ 10 ވަނަ ދުވަހު ކަމަށް އެ ޕާޓީން ބުނެއެވެ.
އެމްއެންޕީގެ އިތުރުން މި ދާއިރާއަށް ވާދަކުރާނެ ކަމަށް މިހާތަނަށް ޕްރައިމަރީ އިއުލާން ކުރީ އެމްޑީޕީންނެވެ. އެ ޕާޓީން ހަތަރު މީހަކު ކުރިމަތިލައިފައިވާއިރު ޕްރައިމަރީ ބާއްވަން ނިންމައިފައިވަނީ މި މަހު 11 ގައެވެެ.
ގުރައިދޫ ދާއިރާގެ ބައި އިލެކްޝަން އޮތީ އެޕްރިލް 15 ވަނަ ދުވަހުއެވެ.
