މާދަރީ ބަހުން ބައެއް ދަރިވަރުންނަށް ވާހަކަދައްކަން ނޭނގޭތީ މިނިސްޓަރުގެ ކަންބޮޑުވުން
މިނިސްޓަރ ވިދާޅުވީ، މިނިވަންކަމާ އަމިއްލަ ބަހެއް އޮތުމާ ވަނީ ވަރަށް ބޮޑަށް ގުޅިފައި ކަމަށް
ހިރިލަންދޫއަށް 71 އަހަރު ފުރުމުގެ މުނާސަބަތުގައި ބޭއްވި ރަސްމިއްޔާތު
މާދަރީ ބަހުން ބައެއް ދަރިވަރުންނަށް ވާހަކަދައްކަން ނޭނގޭކަމަށާއި އެކަމާމެދު ކަންބޮޑުވާ ކަމަށް އެޑިއުކޭޝަން މިނިސްޓަރ ޑރ. އާއިޝަތު އަލީ ވިދާޅުވެއްޖެއެވެ.
މިނިސްޓަރ މިފަދައިން ވިދާޅުވީ ހިރިލަންދޫއަށް 71 އަހަރު ފުރުމުގެ މުނާސަބަތުގައި ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
މިނިސްޓަރ ވިދާޅުވީ، ދާދިފަހުން ފަށާ ތައުލީމު އުނގެނޭ ބައެއް ދަރިވަރުންނާ ބައްދަލުކުރައްވައި ސުވާލު ކުރެއްވުމުން، އެ ކުދިންނަށް ދިވެހިން ކުރާ ސުވާލު ނޭނގޭކަމަށް ސްކޫލްގެ ނާޒިރު ވިދާޅުވެފައިވާކަން ފާހަގަކުރައްވާފައެވެ. އެ ކުދިންނާ އިނގިރޭސިބަހުން ސުވާލުކުރެއްވުމުން އެ ކުދިންނަށް ރަނގަޅަށް ސުވާލަށް ޖަވާބުދެވުނު ކަމަށްވެސް މިނިސްޓަރ ވިދާޅުވިއެވެ. މިނިސްޓަރ ވަނީ، އެ ދަރިވަރުންނަށް މާދަރީ ބަސް ނޭނގުމަކީ ކަންބޮޑުވެވަޑައިގަންނަވާ ކަމެއް ކަމަށް ވިދާޅުވެފައެވެ. "ބޭރުގެ ގޮތްތަކަށް ރޭރުވާލެއް" ބޮޑު ކަމަށާއި، ރާއްޖޭގެ ތާރީހު މާދަމާގެ ޖީލަށް ފޯރުކޮށްދެވޭނެތޯ ސުވާލުކުރައްވަން ބޭނުންފުޅުވާކަމަށް މިނިސްޓަރ ވިދާޅުވިއެވެ. މިނިސްޓަރ ވަނީ މިނިވަންކަމާ މަދަރީ ބަހާ އޮންނަ ގުޅުން ވަރަށް ބޮޑުކަންވެސް ފާހަގަކުރައްވާފައެވެ. އެއީ މިނިވަންކަން ދިފާއުކުރުމަށް ވަރަށް މުހިންމު ސިފައެއް ކަމަށް މިނިސްޓަރ ވަނީ ވިދާޅުވެފައެވެ.
މިނިސްޓަރ ވަނީ، ދިވެހި ކުޑަކުދިންނަށް މާދަރީ ބަހުން ވާހަކަދައްކަން ނޭނގޭނަމަ، 70 އަހަރު ފަހުން ރާއްޖޭގެ މަސްރަހު އޮންނާނެ ގޮތާމެދު ކަންބޮޑުވެވަޑައިގަންނަވާކަން ފާހަގަކުރައްވާފައެވެ. އެކި މާއްދާތައް މެދުވެރިކޮށް ކިޔަވާދޭ ކަންކަމަކީ މާދަމާއާ ހަމައަށް ކަންކަން ފޯރުކޮށްދޭން އޮތް މަގު ކަމަށް މިނިސްޓަރ ވިދާޅުވިއެވެ. މުޖުތަމައުގެ ދިރިއުޅުމާއި ދިވެހި ބަސް ކުރިއެރުވުމަށްޓަކައި މާދަމާގެ ޖީލަށް ދިވެހި ބަސް ރަނގަޅަށް ދަސްކޮށްދޭންޖެހޭ ކަމަށް ވެސް މިނިސްޓަރ ވިދާޅުވިއެވެ. އެއީ ގައުމިއްޔަތާވެސް ގުޅިފައިވާ ކަމެއްކަން މިނިސްޓަރ ވަނީ ފާހަގަކުރައްވާފައެވެ.
މީގެ އިތުރުން ބުރާސްފަތި ދުވަހު ބޭއްވި އެ ޖަލްސާގައި ވާހަކަފުޅުދައްކަވަމުން މިނިސްޓަރ ވިދާޅުވީ، ރާއްޖޭގެ މަދަރުސާތައް ނިންމާ ދަރިވަރުންނަކީ ސައްހަ އިސްލާމްދީން މަތީ ދެމިތިބި، ގައުމުދެކެ ލޯބިވާ، ދިރިއުޅުމަށް ބޭނުންވާ މައުލޫމާތާއި ހުނަރު ލިބިފައިވާ ބަޔަކަށް ހެދުމަށް ރައީސް ސާލިހު އިސްކަން ދެއްވާކަމަށެވެ. އަދި ދަރިވަރުންގެ ހަށިހެޔޮކަމާއި ދުޅަހެޔޮ ކަމަށްވެސް ރައީސް ވަރަށް ބޮޑު އިސްކަމެއް ދެއްވާކަމަށް އެކަމަނާ ވަނީ ވިދާޅުވެފައެވެ.
ހިރިލަންދޫ ސްކޫލުގެ މަސައްކަތްތަކާމެދު ވާހަކަފުޅުދައްކަވަމުން އެކަމަނާ ވިދާޅުވީ، އެތައް އަހަރެއްގެ އިންތިޒާރަށްފަހު ހިރިލަންދޫ ސްކޫލަށް ދިމާވެފައިވާ އިމާރާތުގެ ދަތިކަން ހައްލުކޮށްދިނީ މި ސަރުކާރުން ކަމަށެވެ. އެގޮތުން އެ ސްކޫލަށް މަލްޓި ޕަރޕަސް ހޯލެއްވެސް އަޅައިދީފައިވަނީ ރައީސް ސާލިހުގެ ޒައާމަތުގައި ކަމަށް މިނިސްޓަރ ވަނީ ވިދާޅުވެފައެވެ. އަދި 3 ބުރީގެ އިމާރާތެއް ގާއިމްކޮށްފައި ވާއިރު، އެތަނުގައި 8 ކްލާސްރޫމް ހިމެނޭ ކަމަށް މިނިސްޓަރ ވަނީ ވިދާޅުވެފައެވެ. މީގެ އިތުރުން ލައިބްރަރީއާއި ސްޓާފްރޫމް އަދި އިދާރީ މަސައްކަތް ކުރާ ތަނެއްގެ މަސައްކަތްވެސް މިހާރު ކުރިއަށްދާކަމަށް މިނިސްޓަރ ވަނީ ވިދާޅުވެފައެވެ.
