4،000 ފްލެޓުގެ މަޝްރޫއަށް ހުޅުމާލެއިން 17 ބިމެއް ވިއްކައިފި
ހުޅުމާލެއިން ވިއްކި 17 ބިމުގެ މިލްކުވެރިކަން މިހާރު ވަނީ ސަރުކާރަށް ލިބިފައި
ހުޅުމާލެ ބީޗް ފްރަންޓުން ދޫކުރާ ބިންތައް
ސަރުކާރުން ހިންގާ ބޯހިޔާވަހިކަމުގެ މަޝްރޫއުތައް ހިންގުމަށް ހުޅުމާލެއިން 17 ބީމެއް ވިއްކާފައިވާކަމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)އިން ބުނެފިއެވެ.
އެޗްޑީސީން މިފަދައިން ބުނީ އެކުންފުނިން ހުޅުމާލެ ފޭސް 2 އިން ވިއްކި 17 ބިމުގެ މިލްކުވެރިކަން ސަރުކާރަށް ލިބިފައިވާކަމަށް ސިވިލް ކޯޓުން ހުކުމްކޮށްފައިވަނިކޮށެވެ.
މިކަމާއި ގުޅިގެން އެކުންފުނިން ނެރުނު ބަޔާނެއްގައި ބުނީ މި 17 ބިން ވިއްކާފައިވަނީ އިޖުތިމާއީ ބޯހިޔާވަހިކަމުގެ 4،000 ޔުނިޓުގެ މަޝްރޫއު ހިންގުމަށް އެ ކޯޕަރޭޝަނާއި، މިނިސްޓްރީ އޮފް ފިނޭންސް އަދި ފަހި ދިރިއުޅުން ކޯޕަރޭޝަނާ ދެމެދު ވެފައިވާ އެއްބަސްވުމުގެ ދަށުން ކަމަށެވެ.
ސަރުކާރަށް ބިމުގެ މިލްކުވެރިކަން ލިބިފައިވަނީ މަޝްރޫއު ކުރިއަށްގެންދަން ބޭނުންވާ ކަންކަން ފުރިހަމަކުރުމަށް ކަނޑައެޅިފައިވާ އުސޫލުތަކުގެ ދަށުން ފައިސާ ދައްކާ ޚަލާސްކުރުމުން ކަމަށް އެޗްޑީސީން ބުނެފައިވެއެވެ. އަދި ކޯޓު މެދުވެރިކޮށް ބިމުގެ މިލްކުވެރިކަން މިނިސްޓްރީ އޮފް ފިނޭންސްގެ ދަށަށް ބަދަލުކުރެވިފައިވާކަމަށް އެޗްޑީސީން ބުނެފައިވެއެވެ.
އެކުންފުނިން އިތުރަށް ބުނީ ހުޅުމާލެ ފޭސް 2 ހިއްކައި، އެކި އުމްރާނީ ވަސީލަތްތައް ގާއިމްކުރެވިފައިވަނީ ލޯނު ނަގައި އެކި ގޮތްގޮތަށް ޚަރަދުކޮށްގެން ކަމުން، ހުޅުމާލޭގެ ބިން އެކި ބޭނުންތަކަށް ދިނުމަށާއި، ވިއްކުމުގައި އަބަދުވެސް ބިމުގެ އަގު ކަނޑައެޅިފައިވާނެ ކަމަށެވެ. އަދި އަބަދުވެސް ބިމުގެ އަގު ދެއްކުމުން މިލްކުވެރިކަން މިގޮތަށް ބަދަލުކުރެވިގެންދާނެ ކަމަށެވެ.
އެޗްޑީސީން ބުނީ މި ބިންތަކަކީ އިޖުތިމާއީ ބޯހިޔާވަހިކަން ތަރައްގީކުރުމަށް ބޭނުންކުރެވޭ ބިންތަކެއް ކަމުން ބިމުގެ އަގަކީވެސް މަޝްރޫއު ނިންމައި، އާންމުންނަށް ފޯރުކޮށްދޭއިރު ލުއި އަގުތަކެއް ހަމަޖެއްސުމަށް މަގުފަހިވެގެންދާނެ ގޮތަށް ކަނޑައެޅިފައިވާ އަގުތަކެއް ކަމަށެވެ.
