ލޯފަން މީހުންނަށް ވެސް ސިއްރު ވޯޓެއްލުމުގެ ފުރުސަތު ހޯދައިދޭން އެދިއްޖެ
1 މާރިޗު 2023 | ބުދަ 16:31އެ ކަން ކުޜެވޭނެ ގޮތްވެސް އެ އެސޯސިއޭޝަނުން ވަނީ ކިޔައިދީފައި
ބްލައިންޑް އެސޯސިއޭޝަނުން ބޭއްވި ނޫސްވެެރިންގެ ބައްދަލުވުން
ލޮލަށް ފެނުމުން މަހުރޫމްވެފައިވާ މީހުންނަށް ވެސް ސިއްރު ވޯޓެއްލުމުގެ ފުރުސަތު އޮންނަން ޖެހޭނެ ކަމަށާއި, އެއީ ގާނޫނުން ލިބިދޭ ހައްގެއްކަމަށް ބުނެ އެ ފުރުސަތު ހޯދައިދޭން ބްލައިންޑް އެސޯސިއޭޝަނުން އެދިއްޖެއެވެ.
ބްލައިންޑް އެސޯސިއޭޝަންގެ ނައިބު ރައީސް ހުސައިން ޝަރީފް ނޫސްވެރިންނާ ބައްދަލުކުރައްވައި ބުދަ ދުވަހު ވިދާޅުވީ، ނުކުޅެދުންތެރިކަން ހުންނަ މީހުންގެ ހައްގުތައް ރައްކާތެރިކޮށްދޭ ގާނޫނުން ކަށަވަރުކޮށްދީފައިވާ މިނިވަންކަމާއެކުވެސް، ސިއްރު ވޯޓެއް ލުމުގެ ހައްގުން އެ ފަރާތްތައް މަހުރޫމްކޮށްފައިވާކަމަށެވެ.
އެއީ ފެށުނީއްސުރެ މިއަދާ ހަމައަށްވެސް އެ ކަން އޮތް ގޮތް ކަމަށާއި، ނަމަވެސް މިއަދު ދުނިޔޭގެ އެކި ގައުމުތަކުގައި މި ކަމަށް ހައްލުތަކާއެކު ޕްރެކްޓިސް ކުރެވެމުން ދާކަމަށް ވެސް އޭނާ ވިދާޅުވިއެވެ. ގާނޫނުން މި ގޮތަށް މަޖުބޫރުކޮށްފައި އޮތްއިރު ވެސް މި ކަމުގެ ކަންބޮޑުވުންތައް ހިއްސާކޮށް ހައްލު ހޯދުމަށް 2017ވަނަ އަހަރުން ފެށިގެން އިލެކްޝަންސް ކޮމިޝަނާއެކު ރަސްމީ މަސައްކަތްތަކެއް ކުރަމުންދިޔަ ނަމަވެސް، މިހާތަނަށް ހައްލެއް ލިބިފައި ނުވާކަމަށެވެ.
ހުސައިން ވިދާޅުވީ އެ ކަމަށް ހައްލު ހޯދަން މަސައްކަތްކުރާ ސަބަބަކީ މިނިވަންކަމާއެކު ވޯޓުލުމުގެ ހައްގު ނުލިބުމުން ލޯފަން މީހުންނަށް ކުރިމަތިވާ ތަފާތު ފިއްތުންތަކާއި ނުފޫޒުތަކުގެ ސަބަބުން ކަމަށެވެ.
ހުސައިން ވިދާޅުވީ އެ އެސޯސިއޭޝަނުން އެ ހުށަހެޅި ހައްލަކީ ވަރަށް ކުޑަ ހަރަދަކުން ކުރެވިދާނެ ކަމެއް ކަމަށެވެ. އަދި އެ ހައްލުން، ނުކުޅެދުންތެރިކަން ހުންނަ މީހުންނަށް ސިއްރު ވޯޓެއްލުމުގެ ހައްގު ހޯދައިދެވޭނެކަމަށް އޭނާ ވިދާޅުވިއެވެ،
މި ކަމާ ގުޅުވައި އިލެކްޝަންސް ކޮމިޝަންގެ ނައިބު ރައީސް އިސްމާއީލް ހަބީބު މިއަދު ކުރެއްވި ޓްވީޓެއްގައި ވިދާޅުވީ، މި އަހަރުގެ ރިޔާސީ އިންތިހާބުގައި ލޯފަން މީހުންނަށް އެ މީހުން އިހްތިޔާުރުކުރާ ކެނޑިޑޭޓެއްގެ ނަމާ ދިމާގައި އަމިއްލައަށް ފާހަގަޖެހުމުގެ ފުރުސަތު ލިބިގެންދާނެ ކަމަށެވެ.
