ވިނީޝިއަސް އަށް ބަރޯސާ ވަނީ އޭނާގެ ކުޅުން އެހާ ރަނގަޅުވީމަ: އަންޗެލޮޓީ

ރެއާލް މެޑްރިޑަށް ކުޅެމުން އަންނަ ބްރެޒިލްގެ ޒުވާން ކުޅުންތެރިޔާ ވިނީޝިއަސް ޖޫނިއާ އަށް ބަރޯސާ ވަނީ އޭނާގެ ކުޅުން އެހާ ރަނގަޅުވުމުން ކަމަށް އެ ޓީމުގެ ކޯޗު ކާލޯ އަންޗެލޮޓީ ބުނެފި އެވެ.

އޭނާ މިހެން ބުނީ މި ސީޒަންގެ ކޮޕަ ޑެލް ރޭ މުބާރާތުގެ ސެމީ ފައިނަލްގެ ފުރަތަމަ ލެގުގައި ވާދަވެރި ބާސެލޯނާ ދެކޮޅަށް ނުކުންނަ މެޗުގެ ކުރިން ވާހަކަ ދައްކަމުންނެވެ. އަންޗެލޮޓީ ބުނީ ވިނީޝިއަސް އަކީ ދުނިޔޭގައި ހުރި އެންމެ މޮޅު އެއް ކުޅުންތެރިޔާ ކަމަށާއި، އޭނާގެ އެހީގައި ރެއާލުން ބޭނުންވާ ގޮތަށް ގޭމު އަނބުރާލެވޭ ކަމަށެވެ. އެގޮތުން އޭނާ އަށް ބަރޯސާވުން ދެކެނީ ވެސް އާދައިގެ ކަމެއްގެ ގޮތުގައި ކަމަށާއި، ސަބަބަކީ ވިނީޝިއަސް ހުރި ފޯމަށް ބަލާއިރު، އޭނާ އަކީ މިވަގުތު ހުރި އެންމެ މޮޅު އެއް ކުޅުންތެރިޔާ ކަމަށެވެ. އަދި ބާސެލޯނާއާ ދެކޮޅަށް ނުކުންނައިރު، އެއްވެސް ޙާލެއްގައި ސްޕެނިޝް ސުޕަ ކަޕް ފައިނަލްގެ ބަދަލު މެޗެއް ބޭނުންނުވާ ކަމަށެވެ. ބޭނުންވަނީ ރެއާލް އޮތީ ތައްޓަކާ ވަރަށް ކައިރީގައި ކަމަށާއި، އެހެންކަމުން ބޭނުންވަނީ މޮޅުވާން ކަމަށް ފާހަގަ ކުރަމުން އޭނާ ބުނީ އެ ޓީމުން ތައްޓަކައި ގާތްވާވަރަކަށް ޕްރެޝަރު މައްޗަށް ދާނެ ކަމަށެވެ.

އިތުރަށް ވާހަކަ ދައްކަމުން އަންޗެލޮޓީ ބުނީ މިހާރު ރެއާލް އޮތީ އެ ޓީމަށް ޙައްޤު ހިސާބެއްގައި ކަމަށާއި މިވަގުތު ކުރިމަތިވާން އެދެނީ އެންމެ ރަނގަޅު ކަންތައްތައް ކަމަށެވެ. ސަބަބަކީ މިއީ ސީޒަންގެ އެންްމެ މުހިންމު ވަގުތު ކަމަށެވެ. އަންޗެލޮޓީ ބުނީ އޭނާ އުންމީދު ކުރަނީ ރެއާލަށް އަދިވެސް ކޮންމެ ވެސް މުބާރާތެއް ކާމިޔާބު ކުރެވޭނެ ކަމަށާއި، ނަމަވެސް އެކަން ހާސިލްވޭތޯ ބަލަން ޖެހޭ ކަމަށެވެ. އަދި އޭނާ އަކީ "ޖާދޫގަރެއް" ނޫން ކަމަށެވެ.

ކޮޕަ ޑެލް ރޭ މުބާރާތުގައި ރެއާލްގެ އަމިއްލަ ދަނޑުގައި މި ދެ ޓީމު ބައްދަލު ކުރާއިރު، އެންމެ ފަހުން މި ދެ ޓީމު ކުޅުނީ ސުޕަ ކަޕްގެ ފައިނަލްގަ އެވެ. އެ މެޗުގައި ރެއާލް ބަލިކޮށް ތަށި އުފުލާލީ ބާސެލޯނާ އިންނެވެ. ރެއާލް އާއި ބާސެލޯނާ ވާދަ ކުރާ މެޗު ފަށާނީ ބުރާސްފަތި ދުވަހުގެ ރޭ ރާއްޖެ ގަޑިން ދަންވަރު، އެކެއް ޖަހާއިރު އެވެ.