އެފްއެފްއެފްގެ ރައީސްކަމުން ލީ ގްރައެޓް އިސްތިއުފާ ދެއްވައިފި
ލީ ގްރައެޓް އަށް ތުހުމަތު ކުރެވޭ މައްސަލަ މިވަގުތު އޮތީ ފްރާންސްގެ ޕްރޮސެކިއުޓް އޮފީހުގައި
ލީ ގަރައެޓް
ފްރާންސް ފުޓުބޯޅަ ފެޑެރޭޝަން (އެފްއެފްއެފް)ގެ ރައީސްކަމުން ނޮއެލް ލީ ގްރައެޓް އިސްތިއުފާ ދެއްވައިފި އެވެ.
ލީ ގަރްއެޓް މަޤާމުން އިސްތިއުފާ ދެއްވިއިރު، އޭނާގެ މައްޗަށް ވަނީ އަންހެނަކަށް ޖިންސީ ގޯނާ ކުރިކަމުގެ ތުހުމަތުކޮށް، އެކަމުގެ ތަހުގީގު ވެސް ފަށައިފަ އެވެ. ލީ ގްރައެޓް އަށް ތުހުމަތު ކުރެވޭ މައްސަލަ މިވަގުތު އޮތީ ފްރާންސްގެ ޕްރޮސެކިއުޓް އޮފީހުގަ އެވެ. ލީ ގްރައެޓް އަންނަނީ 2011 ވަނަ އަހަރުން ފެށިގެން އެފްއެފްއެފްގެ ރައީސްކަން އަދާ ކުރަމުންނެވެ. އެކަމުގެ ތުހުމަތުގެ އިތުރުން، ފްރާންސްގެ ލެޖެންޑް ޒިނެދިން ޒިދާންއާ ގުޅުވައިގެން ލީ ގްރައެޓް ދެއްކި ވާހަކަތަކުގެ ސަބަބުން އޭނާ އަށް ވަނީ ފާޑު ކިޔުންތައް އަމާޒުވެފަ އެވެ. އެކަމުގެ ސަބަބުން އެ ޤައުމުގެ ކުޅިވަރު ވުޒާރާގެ އިތުރުން އާންމުންގެ ޕްރެޝަރާ ހެދި އޭނާ ވަނީ މަގާމުގެ މަސްއޫލިއްތުތަކުން އެކަހެރިވެފަ އެވެ. އެއާއެކު ވަގުތީ ގޮތުން ރައީސްކަމުގެ މަސްއޫލިއްޔަތު އަދާ ކުރައްވަމުން އަންނަނީ ފިލިޕޭ ޑިއާލޯ އެވެ. އެކަމުގެ ތެރެއިން އެފްއެފްއެފްގެ އިސް އޮފިޝަލުން ތަކެއް އޭރު ވަނީ އޭނާގެ އިސްތިއުފާ އަށް ގޮވާލައިފަ އެވެ.
ލީ ގްރައެޓްގެ މައްޗަށް ކުރެވޭ ތުހުމަތުތަކަށް އޭނާ ވަނީ އެންމެ ފުރަތަމަ ދުވަހުން ފެށިގެން ވެސް އިންކާރުކޮށްފަ އެވެ.
