ފްރާންސް ފުޓުބޯޅަ ފެޑެރޭޝަން (އެފްއެފްއެފް)ގެ ރައީސްކަމުން ނޮއެލް ލީ ގްރައެޓް އިސްތިއުފާ ދިނުމަށް އެ ފެޑެރޭޝަންގެ ބައެއް އިސް އޮފިޝަލުން ގޮވާލަން ފަށައިފި އެވެ.
ލީ ގްރައެޓްގެ އިސްތިއުފާ އަށް ގޮވާލަން ފަށާފައިވަނީ ފްރާންސްގެ ލެޖެންޑް ޒިނެދިން ޒިދާންއާ ގުޅޭ ގޮތުން އޭނާ ދެއްކި ވާހަކަތަކުގެ ސަބަބުންނެވެ. އެ ވާހަކަތަކުގެ ސަބަބުން ގިނަ ބަޔަކު ވަނީ އޭނާ އަށް ފާޑު ވެސް ކިޔައިފަ އެވެ. އޭގެ ތެރޭގައި އެ ޤައުމުގެ ސްޕޯޓްސް މިނިސްޓަރާއި، ޤައުމީ ޓީމުގެ ތަރި ކީލިއަން އެމްބާޕޭ ވެސް ހިމެނެ އެވެ. ޕްރެޝަރު ބޮޑުވުމުން ލީ ގްރައެޓް ވަނީ އޭނާ ދެއްކި ވާހަކަތަކަށް މައާފަށް ވެސް އެދިފަ އެވެ.
އެކަމާ ގުޅިގެން ނެޝަނަލް އެތިކްސް ކޮމެޓީން ވަނީ ލީ ގްރައެޓް އިސްތިއުފާ ދިނުމަށް ގޮވާލައިފަ އެވެ. އެކަމާ ގުޅިގެން އެ ކޮމެޓީގައި ހިމެނޭ ޕެޓްރިކް އެންޓަން ބުނީ، ލީ ގްރައެޓް ދެއްކި ވާހަކަތަކުގެ ސަބަބުން އޭނާ އަށް އޮތް އިތުބާރާއި، އިޙުތިރާމް މިހާރު ގެއްލިފައިވާ ކަމަށެވެ. އަދި މިހާރު ލީ ގްރައެޓް ވަނީ ގޮތް ހުސްވެފައިވާ ކަމަށާއި، އެންމެ ރަނގަޅު ގޮތަކީ އޭނާ އިސްތިއުފާ ދިނުން ކަމަށެވެ. މީގެ އިތުރުން އޭނާ ބުނީ ދެން ބޭނުންވަނީ އެކަހަލަ ކަމެއް ތަކުރާރު ނުވާނެ ވެރިން ކަމަށެވެ. މީގެ އިތުރުން އޭނާ ބުނީ އެއީ ބަލަން ޖެހޭ ވަރުގެ މައްސަލައެއް ކަމަށާއި، ނަމަވެސް މިވަގުތު ކޮމެޓީ އަށް ވެސް ބުނެވޭނީ ލީ ގްރައެޓް މަގާމުން އެއް ފަރާތްވުމަށް ކަމަށެވެ. މީޑިއާ ރިޕޯޓުތައް ބުނާ ގޮތުން އެފްއެފްއެފްގެ އެކްޒެކްޓިވް ކޮމެޓީގެ ބައްދަލުވުމެއް ބުދަ ދުވަހު ބާއްވާނެ އެވެ. ނަމަވެސް އޭގެ ކުރިން އެ ކޮމެޓީގެ ބަހެެއް މީޑިއާތަކަށް ލިބޭ ގޮތް ވަނީ ނުވެފަ އެވެ.
