މަސައްކަތުގެ މާހައުލުގެ ސަލާމަތާއި ސިއްޙީ ރައްކާތެރިކަމުގެ ބިލު އަވަސްކޮށްދިނުމަށް ޓްރޭޑް ޔޫނިއަނުން ގޮވާލައިފި
ބިލަށް މާބޮޑު ބަދަލެއް ނުގެނެސް މަސައްކަތްތެރިންނާ މަޝްވަރާ ކުރުމަށް ވަނީ އެދިފައި
ރައްޔިތުންގެ މަޖިލީހުގެ ޖަލްސާގެ ތެރެއިން
މަސައްކަތުގެ މާހައުލުގެ ރައްކާތެރި ކަމާއި ވަޒީފާ އަދާ ކުރާ މީހުންގެ ހައްގުތަކާ ގުޅޭގޮތުން ސަރުކާރުން ރައްޔިތުންގެ މަޖިލީހަށް ހުށަހެޅި ބިލު ވީހާވެސް އަވަސްކޮށްދިނުމށް މޯލްޑީވްސް ޓްރޭޑޤ ޔޫނިއަން ކޮންގްރެސް (އެމްޓީޔޫސީ) އިން ގޮވާލައިފިއެވެ.
އެމްޓީޔޫސީން ބުރާސްފަތި ދުވަހު ނެރުނު ބަޔާނެއްގައި ވަނީ ސަރުކާރުގެ ފަރާތުން މި ބިލު ހުށަހެޅުމުން މަރުހަބާ ކިޔައިފައެވެ. އަދި މިއީ ވަރަށް މުހިންމު ބިލެއްކަން އެ ޖަމިއްޔާއިން ވަނީ ފާހަގަކޮށްފައެވެ.
އެ ޖަމިއްޔާގެ ބަޔާނުގައި ބުނީ މަސައްކަތުގެ މާހައުލުގެ ސަލާމަތާއި ސިއްހީ ރައްކާތެރިކަމަކީ ކޮންމެ މަސައްކަތްތެރިއަކަށްވެސް ކަށަވަރު ކޮށްދޭން ޖެހޭ އަސާސީ ޙައްގަކަށްވެފައި، ޤާނޫނީ އޮނިގަނޑުގައި އެކަށީގެންވާ މިިންވަރަށް އެކަން ބަޔާންވެފައި ނެތުމާއި ތަންފީޒު ނުވުމުގެ ސަބަބުން މަސައްކަތްތެރިންގެ ރައްކާތެރިކަން ކަށަވަރު ނުކުރެވޭ ކަމަށެވެ. އެގޮތުން، އެތައް ހިތާމަވެރި ހާދިސާތަކެއް ހިނގައި، މަސައްކަތްތެރިންގެ ފުރާނަ ގެއްލުން ފަދަ ހާދިސާތައް ހިނގާއިރު އެ ފަދަ ހާދިސާތަކުގެ ސަބަބުން މަސައްކަތްތެރިންނާއި އެ ފަރާތްތަކުގެ އާއިލާތަކަށް ބަދަލު ހޯދައިނުދެވޭތީ ގާނޫނީ ގޮތުން ރައްކާތެރިކަން ހޯދައިދިނުން ގޮންޖެހުން ބޮޑު ކަމަށެވެ.
މިހާރުވެސް މަސައްކަތުގެ މާހައުލުގައި ތަފާތު ހިތާމަވެރި ހާދިސާތައް ހިނގަމުންދާއިރު ޤާނޫނީ ރައްކާތެރިކަމެއް ނެތުމުގެ މސަބަބުން މަސައްކަތްތެރިން އެތައް ޙައްގަކުން މަހުރޫމުވެފައިވާ ކަމަށް ވެސް ޓްރޭޑް ޔޫނިއަންގެ ބަޔާނުގައި ވަނީ ބުނެފައެވެ.
މަސައްކަތުގެ މާހައުލުގެ ސަލާމަތާ ރައްކާތެރި ކަމަކީ އައިއެލްއޯގެ އަސާސީ އެއް ޕްރިންސިޕަލް ކަމަށްވެސް އެ ބަޔާނުގައި ވަނީ ފާހަގަކޮށްފައެވެ. އެހެންކަމުން މަސައްކަތްތެރިންގެ ސަލަމަތާ ރައްކާތެރި ކަމަށްޓަކައި ސަރުކާރުން މަސައްކަތުގެ މާހައުލުގައި ސަލާމަތާއި ރައްކާތެރިކަމުގެ ބިލެއް މަޖިލީހަށް ހުށަހަޅާފައިވާތީ އެ ޖަމިއްޔާއިން ސަރުކާރަށް ޝުކުރު އަދާ ކުރާ ކަމަށް ވަނީ ބުނެފައެވެ.
މީގެ އިތުރުން ބިލަށް މާބޮޑު ބަދަލުތަކެއް ނުގެނެސް މަސައްކަތްތެރީންގެ މަޝްވަރާއާއެކު އެ ބިލު ވީހާވެސް އަވަހަކަށް ފާސްކޮށްދިނުމަށް އެ ޖަމިއްޔާއިން ވަނީ ރައްޔިތުންގެ މަޖިލީހަށް ގޮވާލައިފައެވެ.
މަސައްކަތުގެ މާހައުލުގެ ރައްކަތެރި ކަމާއި ވަޒީފާ އަދާ ކުރާ މީހުންގެ ހައްގުތައް ކަށަވަރުކޮށް ދިނުމަށް ބޭނުންވާ އޮނިގަނޑު އެކުލެވޭ މި ބިލު ސަރުކާރުގެ ފަރާތުން މަޖިލީހަށް ފޮނުވާފައިވަނީ މިދިޔަ އަހަރުއެވެ. މި ބިލު، ސަރުކާރުގެ ފަރާތުން ހުށަހެޅުއްވީ ބާރަށު ދާއިރާގެ މެންބަރު، އަހްމަދު އަބްދުﷲ އެވެ.
މި ބިލުގައި މަސައްކަތުގެ މާހައުލުގައި ލިބޭ ގެއްލުމަށް ބަދަލު ލިބޭ ނިޒާމެއް އެކުލަވާލުމުގެ އިތުރުން މަސައްކަތުގެ މާހައުލުގައި ދިމާވާ އެކްސިޑެންޓުތަކާއި ހާދިސާތަކުގެ ސަބަބުން މަސައްކަތްތެރިންނާއި މަސައްކަތުގެ މާހައުލުގައި ހަރަކާތްތެރިވާ އެ ނޫން ވެސް ފަރާތްތަކަށް ލިބޭ އަނިޔާ އާއި ގެއްލުންތައް ރިޕޯޓުކޮށް މައްސަލަ ބަލާ ފިޔަވަޅު އެޅޭނެ ނިޒާމެއް ޤާއިމު ކުރުމަށް ވަނީ ހުށަހަޅާފައެވެ. އަދި މަސައްކަތުގެ މާހައުލަކީ ސިއްހީގޮތުން ރައްކާތެރިތަނެއްކަން ކަށަވަރުކޮށްދިނުމަށް ބޭނުންވާ އަސާސީ އުސޫލުތައް ކަނޑައެޅުމާއި، މަސައްކަތުގެ މާހައުލުން ދިމާވެދާނެ ބަލިތައް ކަނޑައަޅާ، އެފަދަ ބަލިތަކާއި އެ ނޫން ވެސް މަސައްކަތުގެ މާހައުލުގައި ދިމާވެދާނެ ނުރައްކާތަކާއި ގެއްލުންތަކުން އެފަދަ ފަރާތްތައް ރައްކާތެރިކުރުމުގެ އުސޫލުތައް ކަނޑައެޅުމަށް އެ ބިލުގައި ހުށަހަޅާފައިވެއެވެ.
އަދި ސިއްހަތާއި ސަލާމަތާއި ގުޅޭ ނިންމުންތަކާއި ދިމާވާ މައްސަލަތައް ހައްލުކުރުމުގައި ބަސްބުނުމުގެ ފުރުސަތު ހޯދައިދިނުމުގެ ނިޒާމެއް ގާއިމްކޮށްދިނުމަށް ވެސް މި ބިލުގައި ހިިމަނާފައިވެއެވެ.
