މަސައްކަތްތެރިންގެ ހިނގާލުން ފުލުހުން ސިފަކުރީ މުޒާހަރާއެއްގެ ގޮތުގައި
މަސައްކަތްތެރިންގެ ހިނގާލުން އުސްފަސްގަނޑަށް ރޫޓް ބަދަލުކޮށް ހިނގާލުން ނިންމާލުމަށް އަންގަމުން ދިޔަ
މަސައްކަތްތެރިންގެ ހިނގާލުމަށް އަމީނީ މަގު ދަރުބާރުގެ ކައިރިން ފުލުހުން ހުރަސްއަޅަނީ
މަސައްކަތްތެރިންގެ ދުވަހު މަސައްކަތްތެރިން ބޭއްވި ހިނގާލުމަކީ މުޒާހަރާއެއްކަމަށް ފުލުހުން ސިފަކޮށްފިއެވެ.
މެއި 1 ވަނަ ދުވަހު ފާހަގަކުރާ މަސައްކަތްތެރިންގެ ދުވަހު، ކޮންމެ އަހަރަކު ރާއްޖޭގައި އަންނަނީ މަސައްކަތްތެރިންގެ ހައްގުތައް ކަށަވަރުކުރުމަށް ގޮވާލާ ހިނގާލުމެއް ބާއްވަމުންނެވެ. ވޭތުވެދިޔަ 14 އަހަރު ވެސް މި ހިނގާލުން ބާއްވާފައިވެއެވެ. އަދި މި ހިނގާލުމުގައި އެކި ސެކްޓަރތަކުގައި މަސައްކަތް ކުރާ މުވައްޒަފުން ޝުއޫރުތައް ލިޔެފައިވާ ބެނާތަކާއި ބޯޑުތައް ހިފައިގެން ބައިވެރިވިއެވެ.
ނަމަވެސް މި ފަހަރު ބޭއްވުނު ހިނގާލުމަކީ މި ވޭތުވެދިޔަ 14 އަހަރުގެ ތެރޭގައި ފުރަތަމަ ފަހަރަށް ފުލުހުން ހުރަސްއެޅި ފަހަރެވެ.
ފުލުހުންނާއެކު މޯލްޑިވްސް ޓްރޭޑް ޔޫނިއަން ކޮންގްރެސްއިން ބޭއްވި ބައްދަލުވުމަށްފަހު ފުލުހުން ފޮނުވި ސިޓީގައި ބުނެފައިވަނީ 30 އެޕްރީލްގައި ބޭއްވުނު ބައްދަލުވުމުގައި ހިނގާލުން ކުރިއަށް ގެންދިއުމަށް ދެފަރާތުން ކުރެވުނު މަޝްވަރާއާއި އެއްގޮތަށް ސުލްހަވެރިކަމާއެކު އެއްވެ އުޅުމުގެ ގާނޫނު އަދި އާންމު އިޖްތިމާއީ މިންގަނޑުތަކާއި ގާނޫނާއި ގަވާއިދުތަކާއި ހިލާފުނުވާނޭހެން މާލޭގެ މަގުތަކުގައި އާންމު ދަތުރުފަތުރަށާއި، އާންމު ރައްޔިތުންނަށް ދަތި ނުވާނެ ގޮތަށް ޝުއޫރު ފާޅުކުރުމާއި މެދު ފުލުހުންގެ އެއްވެސް އިއުތިރާޒެއް ނެތް ކަމަށެވެ.
އަދި ހިނގާލުން ކުރިއަށްދާ ވަގުތު އެއްވެސް ތަނެއްގައި މަޑުނުކޮށް ކުރިއަށް ގެންދިއުމަށާއި، އަދި ހިނގާލުން ކުރިއަށްދާ ވަގުތު ދުންފަތް ކޮންޓްރޯލް ކުރުމުގެ ގާނޫނާއި ހިލާފުނުވެ ކުރިއަށް ގެންދިމަށް ދަންނަވާ ކަމަށެވެ. އަދި އެދިފައިވާ ގޮތަށް ހިނގާލުން ކުރިއަށްދާ އިރު ފުލުހުންގެ ފަރާތުން ސެކިއުރިޓީ ވެސް ހަމަޖައްސައިދޭނެކަމަށެވެ.
ހުއްދަ ދީފައި އޮތީ ރަސްފަންނުން ފެށިގެން މަޖީދީމަގުން ގޮސް އާޓިފިޝިއަލް ބީޗަށް ހިނގާލުން ނިންމާލުމަށެވެ.
ނަމަވެސް ހިނގާލުން ފެށުމަށް ހަމަޖެހިފައިވާ ވަގުތުގެ ކުޑައިރުކޮޅެއްކުރިން 4:05 ގައި ފުލުހުން ވަނީ ރޫޓް ބަދަލުކޮށް އަމީނީ މަގުން ދިއުމަށް އެންގިއެވެ.
އެކަން އަންގައި ފުލުހުން ފޮނުވި ސިޓީގައި ވަނީ މޯލްޑިވްސް ޓްރޭޑް ޔޫނިއަން ކޮންގްރެސްގެ ފަރާތުން 30 އެޕްރީލްގައި ހުށަހަޅާފައިވާ ސިޓީއާއި ގުޅުން އެ އިދާރާއިން ހިއްސާކޮށްފައިވާ ހިނގާލުން ކުރިއަށް ގެންދިއުމަށް ހުއްދަ ދެވިފައިވާ މަގު ޗާޓަށް ބަދަލު ގެނެސްފައިވާ ކަމަށެވެ.
ފުލުހުން ވަނީ މަޖީދީ މަގުން ނުދެވޭނެކަން އަންގައި ބެރިޖޭޑްޖަހައި މަގު ބަންދުކޮށްފައެވެ. އަދި އިތުރު ފުލުހުން ގެނެސް ހިނގާލުމުގެ ބައިވެރިން ކުރިއަށްދިޔަ ނުދީ ހުއްޓުވިއެވެ. ފުލުހުންގެ އިންޒާރުދޭ ވެހިކަލްގައި ހިނގާލުމުގެ ބައިވެރިންނަށް އަންގަމުން ދިޔައީ މަޖީދީ މަގުން މުޒާހަރާ ކުރިއަށް ނުގެންދެވޭނެކަމަށާއި، އާންމު ދަތުރު ފަތުރަށް ބުރާ އަރާތީ އަމީނީ މަގުން ދިއުމަށެވެ.
ތަކުރާރުކޮށް ފުލުހުން އިންޒާރު ދެމުން ދިޔައިރު ބުނަމުން ދިޔައީ މުޒާހަރާއެއް ކަމަށެވެ. އަދި އަމީނީ މަގުން ހިނގާލުމުގެ ބައިވެރިން ގޮސް ސްޓެލްކޯ ކައިރިން ދޮންއާދަރާދަ ހިނގުމުން ފުލުހުން ވަނީ ހިނގާލުމުގެ ބައިވެރިން ހުއްޓުވާ އެއީ މުޒާހަރާއެއްކަމަށް ބުނެ ބޭރުމަގަށް ދިއުމަށް އަންގާފައެވެ. ނަމަވެސް ހިނގާލުމުގެ ބައިވެރިން ކުރިއަށްދިއުމުން އަނެއްކާވެސް ދަރުބާރުގެ ހުޅަނގަށް އޮންނަ މަގާ ހިސާބުން އަމީނީ މަގު ބަންދުކޮށް މުޒާހަރާގެ ބައިވެރިންނަށް ކުރިއަށް ނުދެވޭނެކަމަށް ބުނެ 3 ވަނަ ފަހަރަށް މަސައްކަތްތެރިންގެ ހިނގާލުމަށް ފުލުހުން ހުރަސްއެޅިއެވެ.
ފުލުހުން ފަހުން ފޮނުވި ސިޓީގައި 30 އެޕްރީލްގައި ޔޫނިއަންއާއި ފުލުހުންނާއި މަޝްވަރާކޮށް، އެއްބަސްވި ގޮތަށް ހިނގާލުން ނިންމަންޖެހޭ ތަންވެސް ފުލުހުން އޮތީ ބަދަލުކޮށްފައެވެ. އެގޮތުން އުސްފަސްގަނޑަށް ހިނގާލުން ނިންމާލުމަށް ފުލުހުން ދިޔައީ އިންޒާރުދެމުންނެވެ. އަދި ތަކުރާރުކޮށް ދިޔައީ މުޒާހަރާއެއްކަމަށް އަޑުގަދަކުރާއިން ގޮވަމުންނެވެ.
