އަދާލަތުގެ ނިންމުމަށް ރައީސް ޞާލިހާއި ފައްޔާޒުގެ ޝުކުރާ މަރުހަބާ!

ކުރިޔަށް އޮތް ރިޔާސީ އިންތިޚާބުގައި އެމްޑީޕީގެ ކެންޑިޑޭޓަށް ތާއީދު ކުރުމަށް ނިންމައި އެ ޕާޓީއާއެކު ކޯލިޝަން ހެދުމަށް އަދާލަތު ޕާޓީން ނިންމުމާއި ގުޅިގެން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހް މަރުޚަބާ އާއި ޝުކުރު ދަންނަވައިފިއެވެ.

ރައީސް ޞާލިހް ކުރެއްވި ޓުވީޓެއްގައި ވިދާޅުވީ 2023ގެ ރިޔާސީ އިންތިޚާބުގައި އަދާލަތު ޕާޓީން އެމްޑީޕީއާ ގުޅިގެން ކުރިޔަށްދިއުމަށް ނިންމި ނިންމުމަށް މަރުޚަބާއާއި ޝުކުރު ދަންނަވާ ކަމަށެވެ. އަދި އެދިވަޑައިގަންނަވަނީ ދިވެހިރާއްޖެއަށް ހަމަޖެހުމާއި އުފާވެރި މާދަމައެއް ހޯދައިދިނުމުގައި އެންމެން އެކީ ގުޅިގެން ކުރިއަށްދިޔުމަށް ކަމަށް ވެސް ރައީސް ވިދާޅުވެފައި ވެއެވެ.

އަދާލަތުގެ މި ނިންމުމާއި ގުޅިގެން އެމްޑީޕީގެ ޗެއަރޕާސަން ފައްޔާޒް އިސްމާއިލް ވިދާޅުވީ ޢަދާލަތު ޕާޓީގެ ނިންމުމަށް އެމްޑީޕީގެ ފަރާތުން ވަރަށް ބޮޑަށް މަރުހަބާ ދަންނަވާ ކަމަށެވެ. ކޯލިޝަންގެ އެތެރެއިންނާ ބޭރުން ކުރިމަތިކުރުވި ބޮޑެތި ގޮންޖެހުންތަކާ ފުރައްސާރަތަކާއެކުވެސް، ސާބިތުކަމާއެކު އެޕާޓީ އާއި ސަރުކާރާއެކު މިވޭތުވެދިޔަތަނުގައި ޤައުމުގެ ހެވާލާބައަށް ތިއްބެވީތީ ވެސް ވަނީ ޝުކުރު އަދާ ކުރައްވާފައެވެ.

މިހާރު ވެސް ވެރިކަން ކުރާ ކޯލިޝަނުގައި އޮތް އަދާލަތުން އެމްޑީޕީއާއެކު 2023 އަށް ނުކުތުމަށް ވެސް އެއްބަސްވީ އެ ޕާޓީގެ މަޝްވަރާ މަޖިލީހުން ބުދަދުވަހު ބޭއްވި ބައްދަލުވުމުގައި ބައިވެރިވި 42 މެމްބަރުންގެ ތެރެއިން 38 މެމްބަރުންގެ ވޯޓާ އެކުއެވެ. މި ނިންމުމާ ދެކޮޅަށް އެ މަޖިލީހުގެ އެއްވެސް މެމްބަރަކު ވޯޓު ދީފައެއް ނުވެއެވެ.