އަދާލަތު ޕާޓީން ރައީސް ޞާލިހަށް ތާއިދުކޮށް، ކޯލިޝަން ހެދުމަށް ނިންމައިފި

އެމްޑީޕީގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހާގެ ދައުވަތަށް، އެޕާޓީއާއެކު މަޝްވަރާކުރުމަށް ޢަދާލަތު ޕާޓިގެ މަޝްވަރާ މަޖިލީހުން ނިންމާފައިވާތީ، ކުރިޔަށް އޮތް ރިޔާސީ އިންތިޚާބުގައި އެމްޑީޕީގެ ކެންޑިޑޭޓަށް ތާއީދު ކުރުމަށް ނިންމައި އެ ޕާޓީއާއެކު ކޯލިޝަން ހެދުމަށް އަދާލަތު ޕާޓީން ނިންމައިފިއެވެ.

މިހާރު ވެސް ވެރިކަން ކުރާ ކޯލިޝަނުގައި އޮތް އަދާލަތުން އެމްޑީޕީއާއެކު 2023 އަށް ނުކުތުމަށް ވެސް އެއްބަސްވީ އެ ޕާޓީގެ މަޝްވަރާ މަޖިލީހުން މިއަދު ބޭއްވި ބައްދަލުވުމުގައި ބައިވެރިވި 42 މެމްބަރުންގެ ތެރެއިން 38 މެމްބަރުންގެ ވޯޓާ އެކުއެވެ. މި ނިންމުމާ ދެކޮޅަށް އެ މަޖިލީހުގެ އެއްވެސް މެމްބަރަކު ވޯޓު ދީފައެއް ނުވެއެވެ.

މި ބަޔާނުގައި ބުނެފައިވަނީ މާތްވެގެންވާ އިސްލާމް ދީނާއި ދިވެހި ގައުމާއި ދިވެހި ރައްޔިތުންގެ އެންމެ މަތީ މަސްލަހަތު އޮތް ގޮތަކީ ވެސް އަދި އެ މަސްލަޙަތު ހިމާޔަތްކުރުމަށްޓަކައި އެންމެ ފަހިކޮށް އަދާލަތު ޕާޓީ އަށް މަސައްކަތްކުރެވެން އޮތީވެސް 2023 ވަނަ އަހަރުގެ ރިޔާސީ އިންތިޚާބުގައި އެމްޑީޕީގެ ރިޔާސީ ކެނޑިޑޭޓު، ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު އިންތިހާބު ކޮށްގެން ކަމަށް އަދާލަތު ޕާޓީގެ މަޝްވަރާ މަޖިލީހަށް ފެންނަ ކަމަށެވެ.

ބައްދަލުވުމުގައި ނިންމާފައިވާ ނިންމުންތަކާ އެއްކޮށް ކުރެވުނު މަޝްވަރާތަކަކީ އިސްލާމްދީނުގެ ސައްހަ އަޤީދާ ކުރިއަރުވާ ދެމެހެއްޓުމަށާއި ރާއްޖޭގައި އިސްލާމީ ޝަހްސިއްޔަތު ހަރަދާނާކޮށް ދީނީ އެއްބައިވަންތަކަން ނެގެހެއްޓުމަށާއި ރާއްޖޭގެ މިނިވަންކަމާއި އިސްތިޤުލާލު ރައްކާތެރިކޮށް ސިޔާދަތީ ބާރު ދަމަހައްޓާ ސުލްހަމަލަސްކަން ދަމަހައްޓާ، ދިވެހިންގެ މެދުގައި އެކުވެރިކަމާއި އެއްބައިވަންތަކަން ދެމެހެއްޓުމަށް ކަމަށް ވެސް ބަޔާނުގައިވެއެވެ.

ރިޔާސީ އިންތިޚާބަށް ވާދަކުރުމަށް ހުށަހަޅާ މެނިފެސްޓޯ އެކުލަވާލުމުގައި އިސްލާމީ އުސޫލުތަކާއި ހަމަތަކުގެ އިތުރުން ދެފުށް ފެންނަ ފުރިހަމަ ލާމަރުކަޒީ އުސޫލުތަކަށާއި އާއިލާތަކުގެ ދުޅަހެޔޮކަމާއި އިޖުތިމާއީ އަދާލަތު ޤާއިމުކުރުމުގެ އިތުރުން ރައީސް ސާލިހަށް ތާއިދު ކުރެއްވުމަށް ނިންމެވީ މެނިފެސްޓޯ އެކުލަވާލުމުގައި އަދާލަތު ޕާޓީގެ ބައިވެރިވުން ފުރިހަމައަށް ހޯދުމަށް އެއްބަސްވެފައިވާތީ ކަމަށް ވެސް ބަޔާނުގައި ބުނެފައި ވެއެވެ.

އަދާލަތުން އެމްޑީޕީއާއެކު ނުކުތުމަށް ނިންމި އިރު ކޯލިޝަނުގައި ހިމެނޭ ޖުމްހޫރީ ޕާޓީއިން ރިޔާސީ އިންތިހާބުގައި އަމަލުކުރާނެ ގޮތަކާމެދު ގޮތް ނިންމާނީ މި މަހުގެ 24 ގައި ބާއްވާ އެ ޕާޓީގެ ކޮންގްރެސްގައެވެ. އެމްއާރުއެމް އިން މިހާތަނަށް ކޯލިޝަނާއި އަންނަ ރިޔާސީ އިންތިހާބާ ބެހޭގޮތުން ރަސްމީ ސިފައެއްގައި ބަހެއް ބުނެފައެއް ނުވެ އެވެ.