މިހާތަނަށް ދައުލަތުން ކުރި ޚަރަދު 4.7 ބިލިއަން ރުފިޔާއަށް އަރާފައިވާކަމަށް ފިނޭންސް މިނިސްޓްރީން ބުނެފިއެވެ.

ފިނޭންސް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާގޮތުން ފެބްރުއަރީ 16 ގެ ނިޔަލަށް މިއަހަރު މިހާތަނަށް 4.7 ބިލިއަން ރުފިޔާ ޚަރަދުވެފައިވާއިރު، ރިކަރަންޓް ޚަރަދުގެ ގޮތުގައި 3.5 ބިލިއަން ރުފިޔާ ވަނީ ހިނގާފައެވެ.

ރިކަަންޓް ޚަރަދުގެ ތެރެއިން މުސާރައާއި އިނާޔާތްތަކަށް 942.9 މިލިއަން ރުފިޔާ ވަނީ ޚަރަދުވެފައެވެ. އެޑްމިނިސްޓްރޭޝަނާއި އަދި އޮޕަރޭޝަނަށް ކުރި ޚަރަދު 2.4 ބިލިއަން ރުފިޔާއަށް ވަނީ އަރާފައެވެ. މީގެ ތެރޭގައި ސަބްސިޑީއާއި ގްރާންޓު ދިނުމަށް 1.5 ބިލިއަން ރުފިޔާ ޚަރަދުކޮށްފައިވާކަމަށް ފިނޭންސްގެ ތަފާސްހިސާބުން ދައްކައެވެ. އެގޮތުން އާސަންދައިގެ ޚިދުމަތަށް 393.2 މިލިއަން ރުފިޔާ ޚަރަދުކޮށްފައިވެއެވެ. އެކި ޚިދުމަތްތަކުން ސަބްސިޑީ ދިނުމަށް 722.8 މިލިއަން ރުފިޔާ ޚަރަދުކޮށްފައިވާއިރު، ކައުންސިލްތަކަށް ގްރާންޓް ދިނުމަށް 306.3 މިލިއަން ރުފިޔާ ވަނީ ޚަރަދުކޮށްފައެވެ. އަދި އެހެނިހެން ގްރާންޓާއި، ކޮންޓްރިބިއުޝަންތަކަށް 145.8 މިލިއަން ރުފިޔާ ވަނީ ޚަރަދުކޮށްފައެވެ.

މީގެ އިތުރުން 1.2 ބިލިއަން ރުފިޔާ ކެޕިޓަލް ޚަރަދުގެ ގޮތުގައި ހިނގާފައިވާކަމަށް ފިނޭންސް މިނިސްޓްރީން ހާމަކޮށްފައިވެއެވެ.

ފިނޭންސް މިނިސްޓްރީން ބުނީ އަހަރުގެ މިހާތަނަށް 494.4 މިލިއަން ރުފިޔާގެ ލޯނު އަނބުރާ ދައްކާފައިވާކަމަށެވެ. އަދި ސޮވެރިން ޑިވެލޮޕްމެންޓް ފަންޑަށް 116.7 މިލިއަން ރުފިޔާ ފޮނުވާފައިވާކަމަށާއި، ޕަބްލިކް ސެކްޓަރ އިންވެސްޓްމަންޓް ޕްރޮގްރާމްތައް ހިންގުމަށް 797.9 މިލިއަން ރުފިޔާ ޚަރަދުކޮށްފައިވާކަމަށް ފިނޭންސް މިނިސްޓްރީން ހާމަކޮށްފައިވެއެވެ.