މިދިޔަ ހަފްތާއާ ހަމައަށް ޗެމްޕިއަންސް ލީގު ފައިނަލް ނުބަލަން، އެއީ އަނިޔާއެއް: ކްލޮޕް

މިދިޔަ ހަފްތާއާ ހަމައަށް އެންމެ ފަހުން ކުޅުނު ޔުއެފާ ޗެމްޕިއަންސް ލީގުގެ ފައިނަލް މެޗު އަލުން ބަލާފައި ނުވާނެ ކަމަށާއި، އެ ތަޖުރިބާ އަކީ އަނިޔާއެއް ކަމަށް ލިވަޕޫލްގެ ކޯޗު ޔާގަން ކްލޮޕް ބުނެފި އެވެ.

ކްލޮޕް މިހެން ބުނީ މި ސީޒަންގެ ޔުއެފާ ޗެމްޕިއަންސް ލީގުގައި އެންމެ ފަހުގެ ޗެމްޕިއަން ރެއާލް މެޑްރިޑާ ދެކޮޅަށް ނުކުންނަ މެޗުގެ ކުރިން ވާހަކަ ދައްކަމުންނެވެ. މިދިޔަ ސީޒަންގެ ޔުއެފާ ޗެމްޕިއަންސް ލީގުގެ ފައިނަލްގައި ކުޅުނު ދެ ޓީމު، މި ސީޒަންގައި ކުރިމަތިލާން ޖެހެނީ ގަދަ 16 ގައެވެ. ފުރަތަމަ ލެގު އޮތީ ލިވަޕޫލްގެ އެންފީލްޑުގަ އެވެ.

ކްލޮޕް ބުނީ ތެދަށް ބުނާނަަމަ ރެއާލާއެކު އެމީހުންނަށް ތަފާތު ކަންތައްތަކާ ދިމާވެފައިވާ ކަމަށެވެ. އެގޮތުން އޭނާ ޖަރުމަނު ލީގުގެ ބޮރޫޝިއާ ޑޯޓްމަންޑަށް އިރުޝާދު ދިން އިރު ވެސް ރެއާލްގެ ވާހަކައެއް އޮންނާނެ ކަމަށެވެ. އޭނާ ބުނީ ރެއާލަކީ ދުނިޔޭގައި އޮތް އެންމެ ބޮޑު އެއް ކުލަބު ކަމަށާއި، ޔަޤީނުން ވެސް އެއީ އެންމެ ކާމިޔާބު ކުލަބު ކަމަށެވެ. އަދި ރެއާލުން ޗެމްޕިއަންސް ލީގު ކާމިޔާބުކޮށްފައި ވަނީ ވަރަށް ގިނައިން ކަމަށާއި، އެމީހުންގެ ތަޖުރިބާ ވެސް އެހާ ބޮޑުވާނެ ކަމަށެވެ. ކްލޮޕް ބުނީ އެންމެ ފަހުން އެ ޓީމު ކުޅުނީ މިދިޔަ ސީޒަންގެ ފައިނަލްގައި ޕެރިހުގައި ކަމަށެވެ. އޭގެ ފަހުން މިދިޔަ ހަފްތާއާ ހަމައަށް އެ މެޗު އަލުން ބަލާފައި ނުވާނެ ކަމަށާއި، އޭނާ އެކަން ނުކުރީ ކީއްވެގެންކަން އެނގޭ ކަމަށެވެ.

ކްލޮޕް ބުނީ ރެއާލާ ދެކޮޅަށް ކުޅޭ މެޗު ވާނީ މަތީ ފަންތީގެ ފުޓުބޯޅަ މެޗަކަށް ކަމަށާއި، މިހާރު އެ މެޗު ކުޅެން ޖެހޭތީ އޭނާ އުފާވާ ކަމަށެވެ. އަދި މީގެ ހަތަރު ހަފްތާއެއްހާ ދުވަސް ކުރިން ނަމަ، އެއީ އެންމެ ރަނގަޅު ވަގުތަށް ނުވެދާނެ ކަމަށެވެ. ނަމަވެސް ވަގުތާއި ހާލަތަކީ އެންމެ މުހިންމު ކަންތައް ކަމަށް ފާހަގަކޮށް ކްލޮޕް ބުނީ، މިހާރު މިއީ އެ މެޗު ކުޅެން އެންމެ އެކަށީގެންވާ ވަގުތު ކަމަށެވެ. އަދި ލިވަޕޫލް އިން ވަރަށް މޮޅު ދެ މެޗު ކުޅެން ޖެހޭނެ ކަމަށާއި އެންމެ ރަނގަޅަށް ނުކުޅެފި ނަމަ ފުރުސަތު ނުލިބޭނެ ކަމަށެވެ. ހަމައެއާއެކު ރެއާލުން އެންމެ މޮޅު ކުޅުމެއް ނުދެއްކި ނަމަވެސް، އެމީހުންނަށް ފުރުސަތު އޮންނާނެކަން ފާހަގަކޮށް ކްލޮޕް ބުނީ، އެކަމުގައި ތަފާތުތަކެއް ހުންނާނެ ކަމަށެވެ. ކްލޮޕް ހުރީ ރެއާލާ ދެކޮޅަށް ކުޅެން ޖެހޭ މެޗަށް ކެތްމަދުވެފަ އެވެ.

ލިވަޕޫލްގެ ދަނޑުގައި އެ ޓީމުން ރެއާލާ ދެކޮޅަށް ނުކުންނާނީ އަންގާރަ ދުވަހުގެ ރޭ ރާއްޖެ ގަޑިން ދަންވަރު 12 ޖަހާއިރު އެވެ.