ތަރިކަ ދިރުވަން ރަނގަޅީ ރެސްޓޯރަންޓެއްތަ؟ ނޫނީ ދާރުލްއާސާރެއްތަ؟
20 ފެބުރުއަރީ 2023 | ހޯމަ 10:53ރެސްޓޯރަންޓެއް ހުޅުވަން ހަސޫން ނިންމި އެންމެ ބޮޑު އެއް މަގުސަދަކީ، އިހުގެ މީހުން އުޅުނު ގޮތާއި އެމީހުން ބޭނުން ކުރި އާލާތްތައް ދައްކާލައިގެން ފަތުރުވެރިންގެ ސަމާލުކަން ދަމައިގަތުން
ދާރުލްއާސާރެއްގެ ގޮތަށް ފަރުމާކޮށްފައިވާ ރެސްޓޯރެންޓުގެ ވެރިޔާ
އަމިއްލަވަންތަކަމާއި ގައުމިއްޔަތުގެ ތަރިކައަކީ އޭގެ ހަގީގީ އަގު އެއްވެސް މީހަކަށް އެންމެ ފުރިހަމަ ގޮތުގައި ވަޒަންކުރެވޭ ކަންތައްތަކެއް ނޫނެވެ. އެކި މީހުންނަށް އެކަމުގައި އޮންނާނީ އެކި އަގެވެ. ބައެއް މީހުންނަށް އެއީ ހުރިހާވެސް އެއްޗެކެވެ. އަނެއް ބަޔަކު އެފަދަ ކަންކަން ދޫކޮށްލަނީ ބޮޑު ވަރިހަމައިގައެވެ. ކަން މިހެން އޮތް ނަމަވެސް، ތާރީޚާއި ތަރިކަ ދިރުވައި އާލާކުރަން މަސައްކަތްކުރާ ވަކިވަކި ފަރުދުންގެ އަދަދުވެސް މަދޭ ދެންނެވޭކަށް ނެތެވެ. އިރާގުގެ ބަސްރާގައި ވަރަށް އާންމު، އެހެން ނަމަވެސް ހަމަ އެހާމެ ތަފާތު ގޮތަކަށް މިކަން ކުރަމުން އަންނަ އެކަކީ ސާދިގު ހަސޫންއެވެ.
ހަސޫންއަކީ "މުތުހަފް އަލްހަސޫން" ނުވަތަ "ހަސޫން ދާރުލްއާސާރު"ގެ ނަން ދީފައިވާ ރެސްޓޯރަންޓްގެ އޯނަރެވެ. މި ރެސްޓޯރަންޓަކީ އާންމުކޮށް ފެންނަ ރެސްޓޯރަންޓްތަކާ ތަފާތު ތަނެކެވެ. ތަރިކައިގެ ގޮތުގައި ބެލިދާނެ އެތައް ސަތޭކަ އައިޓަމެއް މި ރެސްޓޯރަންޓްގެ ތެރޭގައި އެބަހުއްޓެވެ. ފާރުތަކަށް އިތުރު ފުރިހަމަ ކަމެއް ގެނެސްދެނީ ހިތްގައިމު އެތައް ކުރެހުމަކުންނެވެ. އެއްޗެއް ކާލަން މި ރެސްޓޯރަންޓަށް ވަންނަ މީހަކަށް، ހަގީގަތުގައި އެ ވަދެވެނީ ދާރުލްއާސާރަކަށެވެ. ކުރެވޭނީ ސަގާފީ ރޫހު އެކުލެވޭ ތަޖުރިބާއެކެވެ.
ދާރުލްއާސާރެއްގެ ރަހަތައްވެސް އެކުލެވޭ ގޮތަށް ރެސްޓޯރަންޓެއް ހުޅުވަން ހަސޫން ނިންމި އެންމެ ބޮޑު އެއް މަގުސަދަކީ، އިހުގެ މީހުން އުޅުނު ގޮތާއި އެމީހުން ބޭނުންކުރި އާލާތްތައް ދައްކާލައިގެން ފަތުރުވެރިންގެ ސަމާލުކަން ދަމައިގަތުމެވެ.
ބަސްރާއަކީ އަރަބި ތާރީޚުގެ މުއްސަނދިކަން އަދިވެސް ފެންނަން އޮތް، ގަދީމީ ސިޓީއެކެވެ. އުސްމާނީ ޚިލާފަތުގެ ދުވަސްވަރުގެ އިމާރާތްތައް އެ ސިޓީގައި އެބަހުއްޓެވެ. ލަކުޑީގައި އެކި ކަހަލަ ކުރެހުންތައް ކަނޑައި ނަގާފައިވާ ބެލްކަނިތަކާއި ކުޑަދޮރާއި ސީލިންގތަކުން ހިތްގައިމުކަން ގެނުވައެވެ. ހަސޫންގެ ދާރުލްއާސާރު ރެސްޓޯރަންޓަކީވެސް ހަމަ އެފަދަ ތަނެކެވެ. އެތަން އޭނާ ފަރުމާކުރީ، މީގެ އެތައް ޒަމާނެއް ކުރިންވެސް އެތަން ހަމަ ހުރި ގޮތް އަސްލަކަށް ބަލައިގެންނެވެ.
"މުތުހަފް އަލްހަސޫން"އިން ލިބޭ ކެއުންތަކީ، އިރެއްގައި ބަސްރާގެ ފަޚްރު ކަމުގައިވި ކޭންތަކަށް ޚާއްސަ ތަކެއްޗެވެ. ރެސްޓޯރަންޓަށް ޒިޔާރަތްކުރާ މީހުންނަށް ކިތަންމެހާވެސް ރަނގަޅަކަށް އެ އިހުސާސް ކުރެވެއެވެ.
ދާރުލްއާސާރެއްގެ ގޮތުގައި "މުތުހަފް އަލްހަސޫން" ހުޅުވީ މީގެ 2 އަހަރެއްހާ ދުވަސް ކުރިންނެވެ. އިތުރަށް ފުޅާ ކުރަމުން ގޮސް، ރެސްޓޯރަންޓްގެ ބައި ތައާރަފުކުރީ އަހަރެއްހާ ދުވަސް ފަހުންނެވެ.
"މެދުއިރުމަތީގެ ވެނިސް"ގެ ވަނަމުން ނަން ދީފައިވާ ބަސްރާއަކީ، 1980ގެ އަހަރުތަކުގެ ކުރިއާ ޖެހެންދެން، މެދުއިރުމައްޗަށް ޒިޔާރަތްކުރާ ފަތުރުވެރިން، ދަގަތްފާނަށް ދަގަނޑު ދަމާ އުސޫލުން ޒިޔާރަތްކުރަމުން ދިޔަ، ފަތުރުވެރި ސިޓީއެކެވެ. ނަމަވެސް، ހަނގުރާމައާއި ކުރިމަތިލުންތަކުގެ އިތުރުން، އެކި ކަހަލަ ގަޑުބަޑުތަކާއެކު އިރާގާމެދު މީހުންގެ ހިތުގައި ބިރުވެރިކަން އުފެދި، ފަތުރުވެރިކަން ހީނަރުވިއެވެ. ނަމަވެސް މިއަދު ވަނީ ހުރިހާ ކަމެއް މަޑުމަޑުން ހަމައަކަށް އެޅެން ފަށާފައެވެ.
