ގަޑިނުޖެހި ސަލާމް ނުބުނެ ވަޒީފާގައި 51 އަހަރު، ސިއްރަކީ ޞޯބިރާ ވަޒީފާ ދެކެވީ ލޯބި!

1964 ވަނަ އަހަރު ޞޯބިރާ ވަހީދު ވަޒީފާ އަދާކުރައްވަން ފެއްޓެވީ އެހާ ދިގު މުއްދަތަކަށް ވަޒީފާގައި ދެމި ހުންނަވާނެ ކަމުގެ އުންމީދުގައެއް ނޫނެވެ. އެހެންނަމަވެސް މިހާރު އުމުރުން 78 އަހަރުގެ ޞޯބިރާ ވަނީ 51 އަހަރާއި 8 މަސް ދުވަސް ދައުލަތަށް ޚިދުމަތްކުރައްވާފައެވެ. ދިވެހި ދައުލަތަށް ދިގު މުއްދަތަކަށް ޚިދުމަތް ކުރެއްވި ބޭފުޅުންގެ ޚިދުމަތުގެ އަގު ވަޒަން ކުރުމުގެ ޖަލްސާގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވަނީ ޞޯބިރާ އަށް ޝަރަފުގެ ބެޖާއި އައްޑަނަ ވެސް އަރުވާފައެވެ. މި ޖަލްސާގައި ރައީސް ވަނީ އެހާ ދިގުމުއްދަތެއްގައި އަންހެން ބޭފުޅަކު ޙިދުމަތުގައި ދެމި ހުންނެވުމުން އެކަން ފާހަގަކުރައްވާ އެއީ ޞޯބިރާ ދެއްކެވި މިސާލެއް ކަމަށް ވިދާޅުވެފައެވެ.

އުމުރުން 23 އަހަރުގައި ވަޒީފާ އަދާ ކުރަން ފެއްޓެވި ޞޯބިރާ އެންމެ ފުރަތަމަ ވަޒީފާގައި އަދާކުރެއްވީ މޯލްޑިވްސް ކަސްޓަމްސް ސަރވިސަސްއާ ރާއްޖޭގެ އެކި ކޯޓުތަކުގައެވެ. އެއަށްފަހު އެމްޑަބްލިޔުއެސްސީއާ ގުޅުނެވެ. އެތަނުގައި ވެސް 23 އަހަރު ޚިދުމަތް ކުރެއްވިއެވެ. ކާތިބުކަމުން ފެށިގެން ގޮސް ސީނިއަރ އެޑްމިނިސްޓްރޭޓިވް އެސިސްޓަންޓުގެ މަޤާމު ވެސް އަދާކުރެއްވިއެވެ. އެތަނުގައި މަސައްކަތްކުރެއްވިއިރު އެންމެ ބޮޑަށް ހިތްވަރު ދެއްވާ ޞޯބިރާ އަށް އެހީތެރިވެދެއްވީ ޖެނެރަލް މެނޭޖަރު މުހައްމަދު ދީދީ އާއި މާކެޓިންގ މެނޭޖަރު މުހައްމަދު ރަޝީދުގެ އިތުރުން އެޑްމިން މެނޭޖަރު މުހައްމަދު ޝާފިއުއެވެ.

އެމްޑަބްލިޔުއެސްސީ ގައި މަސައްކަތް ކުރެއްވީ އެންމެންނާއި ގުޅިގެންކަން ފާހަގަކުރައްވައި ޞޯބިރާ ވިދާޅުވީ ތަފާތު މިޒާޖުގެ މީހުންނާއެކު މަސައްކަތް ކުރެވޭނީ ވަރަށް ކެތްތެރިވެގެން ކަމަށެވެ. އަދި އަބަދުވެސް މަސައްކަތަކު ބުނެފިނަމަ އެއީ ވަކި މީހެއް ކުރަންޖެހޭ ކަމެއްތޯ ނުބައްލަވާ، މަސައްކަތް ކުރާ ހިތުން މަސައްކަތަށް ތައްޔާރަށް ހުންނަވާ ކަމަށެވެ. އެމްޑަބްލިޔުއެސްސީން ވެސް ވަނީ އެ ކުންފުންޏަށް 15 އަހަރު ޚިދުމަތް ކޮށްދިނުމުން ޞޯބިރާ އަށް ހަނދާނީ ފިލައެއް ވެސް ދީފައެވެ. ފެން ޕްލާންޓް ގޮވި ދުވަހަކީ ހަނދާނުން ފޮހެލަން ދަތި ދުވަހެއް ކަމަށާއި އެއީ ވަރަށް ހިތްދަތި ދުވަހެއް ކަމަށް ޞޯބިރާ ވިދާޅުވިއެވެ.

މަސައްކަތުގައި ހޭދަކުރރެއްވި 51 އަހަރާއި 8 މަސް ދުވަހުގެ ތެރޭގައި ކޮންމެ ފަދަ ކަމެއް ދިމާވި ނަމަވެސް ޞޯބިރާ ސަލާމެއް ނުބުނުއްވައެވެ. ގަޑިއެއް ނުޖެހެއެވެ.

އިންޓަވިއުގެ ތެރެއިން ޞޯބިރާ އަޅުގަނޑު ކައިރީގައި ވިދާޅުވި ވާހަކައަކުން އޭނާގެ ހިތްޕުޅުގައި މަސައްކަތަށް އޮތް ލޯބި ހާމަވެގެން ދިޔައެވެ. އެއްދުވަހަކު ދަރިންނާއެކު ޓީވީ ބަލަން އިންނަވަނިކޮށް، ޗިޕްސް ކޮޅެއް ކަރު ތެރޭގައި ތާށިވެގެން އެއްގޮތެއް ނުވެގެން ހޮސްޕިޓަލަށް ދާން ޖެހުނު ދުވަހެއްގެ ވާހަކަ އެކެވެ. އެރޭ ދަންވަރު 03:00 ޖަހަން ދެން އޭނަ އުޅުއްވީ ހޮސްޕިޓަލުގައެވެ. ހޮސްޕިޓަލުން ދޫކޮށްލުން، ދެ ގަޑި އެއްހާއިރު ނިދާލުމަށްފަހު، އަނެއް ދުވަހުގެ 08:00 ޖެހިއިރު ޞޯބިރާ ހުންނެވީ އޮފީހުގައެވެ.

ޞޯބިރާ ވިދާޅުވި ގޮތުން 20 އަހަރުވުމުންނާއި 40 އަހަރުވުމުން ޕެންޝަން ލިބުނު ދުވަހަކީ އޭނާއަށް ވަރަށް ޚާއްސަ ދުވަހެކެވެ. ތަފާތު މީހުންނާއެކު އުފާވެރި މާހައުލެއްގައި މަސައްކަތްކޮށްލުމަކީ ލިބޭ ވަރަށް ބޮޑު ހިތްހަމަޖެހުމެއްގެ ގޮތަށް ޞޯބިރާ ފާހަގަކުރެއްވިއެވެ.

ދިރިއުޅުމުގެ ވަކި ހިސާބަކުން ބައްޕައަކާ ނުލާ 3 ދަރިން ތަރުބިއްޔަތުކުރައްވަމުން ދިޔައިރު ވެސް ސޯބިރާ ދިޔައީ ހުރިހާ ޒިންމާއެއް އެކަނި އުފުއްލަވަމުންނެވެ. އަދި މިކަމުގައި އޭނާގެ އެންމެ ބޮޑު އެހީތެރިޔަކަށްވީ މިހާރު ނިޔާވެފައިވާ މަންމައެވެ. އަދި ކާމިޔާބީއަކަށްވީ އާއިލާގެ މެމްބަރުންނެވެ.

ޞޯބިރާގެ އެންމެ ހަނގު ދަރިފުޅު ފާތިމަތު ސޯމާ ބުނީ މަންމަ އަކީ ކުދިންނަށް ވަރަށް އަޅާލާ، އޯގާތެރި މަސައްކަތްތެރި މީހެއް ކަމަށެވެ. ދަރިފުޅު އައިމިނަތު ޝެރީން ބުނީ މަންމަ އަކީ ވަރަށް ކަންތައްތަކާއި ކުރިމަތިލާފައި ހުރި ހިތްވަރު ގަދަ މީހެއް ކަމަށެވެ. އަދި އެހެން މީހުންނާއި މަންމައާ އޮންނަ ގުޅުން ސިފަކޮށްދެމުން ޝެރީން ބުނީ މިހާރު ވެސް އެމްބަޑްލިޔުއެސްސީގައި އުޅޭ އެންމެ ޅަ ކުދިންނާއެކު ވަރަށް މަޖާކޮށް އުޅުއްވާ ކަމަށެވެ. އަދި އެމީހުން ވެސް މަންމައަށް ވަރަށް ރަނގަޅު ކަމަށެވެ.

އިންޓަވިއު ނިންމާލައްވަމުން ސޯބިރާ ވިދާޅުވީ އަބަދުވެސް ވަޒީފާ އަދާކުރެއްވީ އިހްލާސްތެރިކަމާއެކު ކަމަށާއި މިއަދު އެކަމުގެ ފޮނި ނަތީޖާ ފެނިވަޑައިގެންފި ކަމަށެވެ. އަދި ޒުވާނުންނަށް ޞޯބިރާ ވަނީ ވަރަށް ޚާއްސަ މެޖެސެއް ދެއްވާފައެވެ. އެއީ އިހްލާސްތެރިކަމާއެކު ސަރުކާރަށް މަސައްކަތް ކުރުމުން، މިއަދު ޞޯބިރާއަށް ލިބުނު އެވޯޑަކީ މާދަމާ އެމީހުންގެ ވެސް ހައްޤަކަށް ވުން އެކަށީގެންވާކަމެވެ.