ފެންނަން ނެތް، ހާމަވެފައި ނެތް، ވަންހަނާވެފައިވާ ފިކުރެއްގެ ވާހަކަ ދެއްކުން ހުއްޓާލައްވާ: އަސްލަމް
ރައީސް ނަޝީދު އެ ތަނުގައި ފެންނަން ނެތުމުން ހިތްދަތިވާ ކަމަށް އޭނާ ވިދާޅުވި
އެމްޑީޕީގެ ޕީޖީ ލީޑަރު މުހައްމަދު އަސްލަމް --
ފެންނަން ނެތް، ހާމަވެފައި ނެތް، ވަންހަނާވެފައިވާ ފިކުރެއްގެ ވާހަކަ ދެއްކުން ހުއްޓަވައިލެއްވުމަށްފަހު އެކުގައި މަސައްކަތްކުރެއްވުމަށް ވަޑައިގެންނެވުމަށް އެމްޑީޕީގެ ޕީޖީ ލީޑަރު އަދި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ރައީސް މުހައްމަދު ނަޝީދަށް ދައުވަތު ދެއްވައިފިއެވެ.
ހުކުރު ދުވަހުގެ ރޭ ރައީސް އިބްރާހިމް މުހައްމަދު ޞާލިހަށް އެމްޑީޕީގެ ރިޔާސީ ޓިކެޓު އެރުވުމަށް ބޭއްވި ހާއްސަ ޖަލްސާގައި ވާހަކަ ދައްކަވަމުން އަސްލަމް ވިދާޅުވީ އެމްޑީޕީގެ ފިކުރާއި އަސާސްތަކާއި އުސޫލުތަކަކީ ކަޅާއި ހުދުން ލިޔެވިފައި ހުރި ކަންތައްތަކެއް ކަމަށެވެ. އެގޮތުން އެމްޑީޕީގެ އަސާސީ ގަވާއިދުގެ ތިންވަނަ ބާބުގައި ޕާޓީގެ އުސޫލާއި އަމާޒާއި މަގުސަދު ބަޔާންކޮށްފައި އޮންނާނެ ކަމަށާއި ޕާޓީގެ ވެބްސައިޓް ބަލާލުމުން ޕާޓީގެ ފިކުރުތަކާއި ޕާޓީ ގަބޫލުކުރާ ހަމަތަކަކީ ކޮބާކަން ބަޔާންކުރެވިފައި އޮންނާނެކަމަށް ވެސް އޭނާ ވިދާޅުވިއެވެ.
އެ ނޫން އާ ފިކުރެއް، ފެންނަން ނެތް، ހާމަވެފައި ނެތް، ވަންހަނާވެފައިވާ ފިކުރެއްގެ ވާހަކަ ދެއްކުން ހުއްޓަވައިލެއްވުމަށާއި އެކުގައި މަސައްކަތް ކުރައްވަން ވަޑައިގެންނެވުމަށް ރައީސް މުހައްމަދު ނަޝީދަށް އަސްލަމް ދައުވަތު އެރުވިއެވެ. އަދި އެ ތަނުގައި ރައީސް ނަޝީދު ނެތްކަމުގެ ހިތްދަތިކަން އެބަ އިހުސާސްވާ ކަމަށް އަސްލަމް ވިދާޅުވިއެވެ.
ދިވެހިރާއްޖޭގައި ހެދިފައި ހުރި ގާނޫނުތަކާއި އިސްލާހުކުރެވިފައި ހުރިކަމަށް ބުނާ ގާނޫނުތައް ބަޔާންކުރެވިފައިވާ އަދަަދަކީ 450 ކަމަށާއި އޭގެ ތެރެއިން 129 ގާނޫނަކީ މި ވޭތުވެދިޔަ ހަތަރު އަހަރު ވުޖޫދުކުރެވިފައިވާ ގާނޫނުތަކެއް ކަމަށް އަސްލަމް ވިދާޅުވިއެވެ. އަދި ދިވެހިރާއްޖޭގެ ގާނޫނީ އޮނިގަނޑުތަކަަށް ވަރަށް ފުރިހަމަ، އިސްލާހީ، ބޭނުންތެރި ބަދަލުތަކެއް މި ވެރިކަމުގައި ގެނެސްދެއްވައިފި ކަމަށް އޭނާ ވިދާޅުވިއެވެ.
ރައްޔިތުންނަށް ބޭނުންވާ އެތައް ކަމެއް މި ސަރުކާރުން ކޮށްދެއްވައިފި ކަމަށާއި އެންމެ ކުޑަމިންވަރުން މީހުން ބިނާކުރުމުން ފެށިގެން އިސް ރަށްވެހިންނާ ހިސާބަށް އެކަކު ވެސް ބާކީނުކޮށް މިދަނީ ކުރިއަށް ކަމަށް އަސްލަމް ވިދާޅުވިއެވެ. ކުޑަ ރަށެއްތޯ ބޮޑު ރަށެއް ތޯ ބެލުމެއް ނެތި ރައްޔިތުންނަށް ބޭނުންވާ ހިދުމަތް ފޯރުކޮށްދޭ އެހެން ވެރިއެއް ފެނިފައި ނުވާ ކަމަށް އޭނާ ވިދާޅުވިއެވެ.
އިތުރަށް އަސްލަމް ވިދާޅުވި ރައީސް ޞާލިހުގެ ހިތްތިރިކަމާއި އޯގާތެރިކަމާއި އިހުސާންތެރިކަމާއި ހެޔޮކަން ދަމަހައްޓަން ބޭނުންވާ ކަމަށެވެ.
