ޖަޕާނު އަންހެން މީހާއަކީ ދިވެއްސަކާ ކައިވެނިކޮށްގެން ރެޒިޑެންޓް ވިސާގައި ހުރި މީހެއް: އިމިގްރޭޝަން
17 ފެބުރުއަރީ 2023 | ހުކުރު 07:27ރާއްޖޭގެ އިމިގްރޭޝަންގެ ޤާނޫނާ ޚިލާފު ކަންތައްތަކެއް ހިމެނޭތޯ ކަށަވަރު ކުރުމަށް ދަނީ މަސައްކަތް ކުރަމުން
ސަލާން ޖަހަމުންދިޔަ ޖަޕާން މީހާ
މާލޭގައި ސަލާން ޖަހަން އުޅުނު ޖަޕާން އަންހެން މީހާ އަކީ އަކީ ދިވެއްސަކާ ކައިވެނިކޮށްގެން ރެޒިޑެންޓް ވިސާގައި ރާއްޖޭގައި ދިރިއުޅެމުންދާ މީހެއްކަން ކަށަވަރު ކުރެވިފައިވާކަމަށް މޯލްޑިވްސް އިމިގްރޭޝަނުން ބުނެފިއެވެ.
އިމިގްރޭޝަނުން ނެރުނު ބަޔާނެއްގައި ބުނީ އެ އަންހެންމީހާ ރެޒިޑެންޓް ވިސާގައި ރާއްޖޭގައި ދިރިއުޅެމުންދާއިރު މުޖުތަމައުގެ އާންމު ހަމަޖެހުމާއި ރައްކާތެރިކަމާއި ގުޅުވާ، ބިދޭސީ މީހާއާ ގުޅޭގޮތުން ފާހަގަވެފައިވާ މައްސަލާގައި، ރާއްޖޭގެ އިމިގްރޭޝަންގެ ޤާނޫނާ ޙިލާފު ކަންތައްތަކެއް ހިމެނޭތޯ ކަށަވަރު ކުރުމަށް އެ އިދާރާއިން މަސައްކަތް ކުރަމުންދާ ކަމަށެވެ. އަދި މައްސަލަ އިތުރަށް ބަލަމުންދާ ކަމަށެވެ.
އިމިގްރޭޝަނުން މިހެން ބުނެފައިވާއިރު މާލޭ މަގުމަތީގައި ސަލާންޖަހަން އުޅޭ ޖަޕާން އަންހެނެއްގެ ފޮޓޯ އާއި ވީޑިއޯ ވަނީ ސޯޝަލް މީޑިއާގައި އާންމުވެފައެވެ.
ކާނެ އެއްޗެއް ހޯދުމަށާއި ބޭސްފަރުވާ ކުރުމަށް އެދި ޖަޕާންގެ އެ މީހާ ފައިސާ ހޯދާ ކަމަށް ސޯޝަލް މީޑިޔާގައި ބައެއް ޕޯސްޓުތަކުގައި ބުނެފައިވެއެވެ. އަދި އޭނާއަކީ ދިވެއްސަކާ ކައިވެނިކޮށްގެން މާލޭގައި ދިރިއުޅޭ މީހެއް ކަމަށްވެސް ބައެއް މީހުން ގާތު ބުނެފައިވެއެވެ.
