މޯލްޑިވްސް ހާފް މެރެތަންގައި ވީލްޗެއަރ ރޭހެއް ބާއްވަނީ

މޫވް މޯލްޑިވްސް އާއި އައިރަނާސް ގުޅިގެން އިންތިޒާމުކުރާ މޯލްޑިވްސް ހާފް މެރެތަންގައި ވީލްޗެއަރ ރޭހެއް ބާއްވަން ނިންމައިފިއެވެ.

މޯލްޑިވްސް ހާފް މެރެތަން 2023 ވީލްޗެއަރ ރޭހުގެ ސެގްމެންޓް ކުރިއަށް ގެންދިއުމަށް އައި ރަނާސްއާއެކު ޕާޓްނާރ ވެފައިވަނީ ހިއުމަން ރައިޓްސް ކޮމިޝަން އޮފް ދަ މޯލްޑިވްސް އައި ނުކުޅެދުންތެރިކަން ހުންނަ ފަރާތްތަކުގެ ހައްގުތަކަށް ވަކާލާތުކުރާ އެންޖީއޯއެއް ކަމަށްވާ މޯލްޑިވްސް އެސޯސިއޭޝަން އޮފް ޕާރސަންސް ވިތް ޑިސޭބިލިޓީސް (އެމްއެޕީޑީ)އިިންނެވެ.

ހިއުމަން ރައިޓްސް ކޮމިޝަން އޮފް ދަ މޯލްޑިވްސް އިން ބުނީ މި ރޭސް އިންތިޒާމުކުރުމަށް އެ ކޮމިޝަނުން ބައިވެރިވުމުގެ މަގުސަދަކީ ނުކުޅެދުންތެރިކަން ހުންނަ ފަރާތްތަކަށް ކުޅިވަރާއި ޖިސްމާނީ ހަރަކާތްތަކުގައި ބައިވެރިވުމުގެ ހަމަހަމަ ފުރުސަތު ހޯދައިދިނުމަށް ބަރު އަޅައި، ނުކުޅެދުންތެރިިކަން ހުންނަ ފަރާތްތަކުގެ ހައްގުތަކަށް މުޖުތަމައު ހޭލުންތެރިކުރުވުން ކަމަށެވެ. އަދި ހާއްސަ އެހީއަށް ބޭނުންވާ މީހުންގެ ހައްގުތަކާބެހޭ މުއާހަދާގެ ދަށުން ވެސް ނުކުޅެދުންތެރިކަން ހުންނަ ފަރާތްތަކަށް އިޖުތިމާއީ ހަރަކާތްތަކައި ކުޅުވަރު ހަރަކާތްތަކުގައި ބައިވެރިވުމުގެ ހައްގު ކަށަވަރުކޮށްދީފައިވާ ކަމަށް އެ ކޮމިޝަނުން ބުނެއެވެ. ނުކުޅެދުންތެރިކަން ހުންނަ މީހުންނަށް ވެސް އެހެން މީހުންނެކޭ އެއްފަދައިން އެފަދަަ މީހުުންނަށް ހާއްސަ ކުޅިވަރުތައް ރާވައި ކުރިއަރުވައި، ކުޅުމަށް ބޭނުންވަ ވަސީލަތްތަކާއި ތަމްރީނާއި ފުރުސަތުތައް ލިބިދިނުމަށް މަގުފަހިކޮށްދޭންވާނެކަމަށް ވެސް ގާނޫނުގައި ބަޔާންކޮށްފައިވެއެވެ.

ކުޅިވަރާއި އިންސާނީ ހައްގުތައް ވަނީ ގުޅި ލާމެހިފައި ކަމަށާއި ކުޅިވަރުގެ މާހައުލުގައި ޖިންސީފުރައްސާރަކުރުމައި ވަކި ޖިންސަކަށް ވީތީ ކުރާ ތަފާތުކުރުންތަކާއި ނުކުޅެދުންތެރިކަމެއްގެ ސަބަބުން ތަފާތުކުރުމާއި ކުޑަކުދިންގެ އުމުރަ ނުގުޅޭ މިންވަރަށް ނުވަތަ މަޖުބޫރުން ކިޔެވުމަށް އަސަރުކުރާ މިންވަރަށް ކުޅިވަރުގައި ހަރަކާތްތެރިވުންފަދަ ކަންކަމަށް ސަމާލުވާން ޖެހޭ ކަމަށް ވެސް ހިއުމަން ރައިޓްސް ކޮމިޝަނުން ބުނެއެވެ.