ޔުއެފާ ޗެމްޕިއަންސް ލީގުގެ ގަދަ 16 ގެ ދެ ވަނަ ލެގުގައި ބަޔާން މިއުނިކް ބަލިކޮށް ޕެރިސް ސެއިންޓް ޖާމަން (ޕީއެސްޖީ) އަށް ކުއާޓާ ފައިނަލަށް ދެވޭނެ ކަމުގެ އުންމީދު އޮތް ކަމަށް އެ ޓީމުގެ ކްރިސްޓޮފާ ގަލްޓިއޭ ބުނެފި އެވެ.

ގަލްޓިއޭ މިހެން ބުނީ ފުރަތަމަ ލެގުގައި އަމިއްލަ ދަނޑުގައި ބަޔާން އަތުން 1-0 އިން ބަލިވި މެޗަށްފަހު ވާހަަކަ ދައްކަމުންނެވެ. އެގޮތުން މެޗުގެ ފަހު ހާފުގައި ޕީއެސްޖީގެ ފަރާތުން ފެނުނީ ރަނގަޅު ކުޅުމެއް ކަމަށެވެ. އޭނާ ބުނީ އެ ހާފުގައި ދެއްކި ކުޅުން މުޅި މެޗުގައި ދައްކައިފި ނަމަ ޕީއެސްޖީ އަށް ބަޔާންގެ ދަނޑުގައި އެ ޓީމު ބަލިކުރެވޭނެ ކަމަށެވެ. އަދި ހުރިހާ ކުޅުންތެރިންނަށް މެޗުގައި ކުޅެވޭވަރުވި ނަމަ، ޚާއްސަކޮށް ކީލިއަން އެމްބާޕޭ އަށް މުޅި މެޗުގައި ކުޅެވުނު ނަމަ ވަރަށް ބޮޑު ތަފާތެއް ފެންނާނެ ކަމަށެވެ. އޭނާ ބުނީ އެއާއެކު ޕީއެސްޖީ އަށް އެޓޭކިންގައި އެހެން އޮޕްޝަންތަކެއް ލިބުނީސް ކަމަށެވެ. އަދި ފުރަތަމަ މެޗުގެ ނަތީޖާ އިން އަދި ކުއާޓާ ފައިނަލް ޔަޤީން ނުވާނެ ކަމަށާއި، ދެ ވަނަ ލެގުގައި ނަތީޖާ ބަދަލު ކުރެވޭނެ ކަމަށެވެ.

މީގެ އިތުރުން އޭނާ ވަނީ ދެ ވަނަ ލެގުގައި ބަޔާންގެ ދަނޑުގައި އެ ޓީމަށް ދެކޮޅަށް ނުކުންނައިރު، އަނިޔާގައި ތިބި ކުޅުންތެރިންނަށް އެކަމުން އަރައި ގަތުމަށް ވަގުތު ލިބޭނެ ކަމަށް ވެސް ބުނެފަ އެވެ. ދެ ވަނަ ލެގު ބަޔާންގެ ދަނޑުގައި އޮންނާނީ އަންނަ މަހުގެ ނުވަ ވަނަ ދުވަހު އެވެ.