މިއަހަރު އޮންނަ ސާދަ ވަނަ ޤައުމީ ދިގުފެތުމުގެ މުބާރާތް ދާދި ފަހުން ހުޅުވި ކުޑަގިރި ޕިކްނިކް އައިލެންޑުގައި ބާއްވަން ސްވިމިން އެސޯސިއޭޝަން އޮފް މޯލްޑިވްސް އިން އިއުލާންކޮށްފި އެވެ.
މުބާރާތް ފެށުމަށް ހަމަޖެހިފައި ވަނީ މިމަހުގެ 25 ވާ ހޮނިހިރު ދުވަހު އެވެ. މުބާރާތުގައި ބައިވެރިވުމުގެ ފުރުސަތު މިހާރު ވަނީ ހުޅުވާލައިފަ އެވެ. މުބާރާތުގައި ބައިވެރިވުމުގެ ސުންގަޑި އަކީ މި މަހުގެ 16 ވަނަ ދުވަހުގެ ކުރިންނެވެ. ހަތަރު ކެޓަގަރީއަކަށް ބަހާލައިގެން ކުރިއަށްގެންދާ މުބާރާތުގައި ބައިވެރިވުމަށް އެދޭ ފޯމު ސްވިމިން އެސޯސިއޭޝަންގެ ވެބްސައިޓުން ލިބެން ހުންނާނެ އެވެ. މުބާރާތް ކުރިއަށްގެންދަނީ ނެޝަނަލް، ޖޫނިއާ ނެޝަނަލް، ސްވިމް ޗެލެންޖް (ކޮމިއުނިޓީ އިވެންޓް) އަދި ކިޑްސް ސްވިމް ޗެލެންޖް (ކޮމިއުނިޓީ އިވެންޓް) އަށެވެ.
ސަރުކާރުން ޤާއިމު ކުރި ކުޑަގިރި ޕިކްނިކް އައިލެންޑް ރަސްމީކޮށް ހުޅުވާފައި ވަނީ މިދިޔަ ހޮނިހިރު ދުވަހު އެވެ. އެ ރަށް ރަސްމީކޮށް ހުޅުވައިދެއްވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު އެވެ. މިއީ މާލޭގައި ދިރިއުޅޭ ރައްޔިތުން ދަތުރު ދިޔުމަށް ދިމާވެފައިވާ މައްސަލަ އަށް ހައްލެއް ގެނެސްދިނުމުގެ ގޮތުން ސަރުކާރުން ތަރައްޤީ ކުރި ރަށެކެވެ.
