ޤައުމީ ޓީމާމެދު އުންމީދު ބޮޑު، މިނިސްޓަރު އެދިވަޑައިގަތީ ޤައުމީ ދިދައާއެކު ވަދެ ގަދަ އަޑުން ސޯޝަލް ސެންޓަރު ގުގުމާލުމަށް

ރާއްޖޭގެ ޤައުމީ ވޮލީ ޓީމާމެދު ވަރަށް އުންމީދު ބޮޑު ކަމަށާއި، ރަނގަޅު ނަތީޖާއެއް ނެރެވޭނެ ކަމަށް ޔޫތު މިނިސްޓަރު އަޙުމަދު މަޚްލޫފް ވިދާޅުވެއްޖެ އެވެ.

ރާއްޖޭގައި ބާއްވާ ފޯ ނޭޝަންސް ކަޕާ ގުޅޭ ގޮތުން ވާހަކަފުޅު ދައްކަވަމުން މިނިސްޓަރު ވިދާޅުވީ ޤައުމީ ޓީމާމެދު އެމަނިކުފާނުގެ އުންމީދު ވަރަށް ބޮޑު ކަމަށެވެ. މިނިސްޓަރު މަޚްލޫފް ވިދާޅުވީ އެ މުބާރާތް ވެގެންދާނީ އިންޑިއަން އޯޝަން އައިލެންޑް ގޭމްސް (އައިއޯއައިޖީ) އާއި ސާފް ގޭމްސް އަށް ފަހު ކުރެވުނު މަސައްކަތުން ތަފާތެއް ފެންނާނެ ކަމަށް އުންމީދެއް ކުރެވޭ މުބާރާތަކަށް ކަމަށެވެ. އެގޮތުން ރާއްޖޭގެ ކުޅުންތެރިންގެ ފަރާތުން ތަފާތު މޮޅު ކުޅުމެއް ފެންނާނެ ކަމަށް އުންމީދު ކުރާ ކަމަށާއި، އުންމީދަކީ ރަނގަޅު ކާމިޔާބެއް ލިބުން ކަމަށެވެ.

މީގެ އިތުރުން މިނިސްޓަރު މަޚްލޫފް ވިދާޅުވީ މީގެ ކުރިން ރާއްޖޭގައި ބޭއްވި ބައިނަލްއަޤުވާމީ މުބާރާތްތަކުގައި ދިވެހި ޓީމަށް ސަޕޯޓު ކުރަން ދިޔަ ގޮތަށް، މި މުބާރާތުގައި ދިވެހި ވޮލީ ޓީމަށް ވެސް ސަޕޯޓު ކުރުމަށް ދިޔުމަށް އެދިވަޑައިގަންނަވާ ކަމަށެވެ. އެގޮތުން ރަތް ކުލައިން ޤައުމީ ދިދަ ހިފައިގެން ވަދެ، ސޯޝަލް ސެންޓަރު ގަދަ އަޑުން ގުގުމާލަ ދިނުމަށް އެދިވަޑައިގަންނަވާ ކަމަށެވެ. މުބާރާތުގައި ވާދަކުރާ އަންހެން ޓީމާއި ފިރިހެން ޓީމަށް ވެސް ސަޕޯޓުކޮށްދިނުމަށް އެދިވަޑައިގަންނަވާ ކަމަށާއި، ދެ ޓީމުން ވެސް ރަނގަޅު ނަތީޖާއެއް ނެރޭނެ ކަމުގެ އުންމީދު ބޮޑު ކަމަށް ވެސް ވިދާޅުވި އެވެ.

މީގެ އިތުރުން މިނިސްޓަރު ވަނީ ވޮލީބޯޅަ އެސޯސިއޭޝަން އޮފް މޯލްޑިވްސް (ވީއޭއެމް) އިން ވޮލީ ކުރިއެރުވުމަށް ކުރަމުން އަންނަ މަސައްކަތަށް ޝުކުރު އަދާކުރައްވައިފަ އެވެ. މިނިސްޓަރު މަޚްލޫފް ވިދާޅުވީ ފޯ ނޭޝަންސް ކަޕް ރާއްޖޭގައި ބޭއްވިގެން ދަނީ އެންމެން އެކުގައި، ގުޅިގެން ކުރެވިގެންދާ މަސައްކަތުގެ ތެރެއިން ކަމަށެވެ. އަދި ޤައުމީ އަންހެން ޓީމާއި ފިރިހެން ޓީމު ތައިލެންޑަށް ފުރުމުގެ ކުރިން ދެ ޓީމާ ވެސް ބައްދަލުކުރެއްވި ކަމަށެވެ. ދެ ޓީމުގެ ހުރިހާ ކުޅުންތެރިން ވެސް ތިބީ ވަރަށް ފޯރީގައި ކަން ފާހަގަކުރައްވާ މިނިސްޓަރު ވިދާޅުވީ، އެއަށްވުރެ ޖޯޝާއި ފޯރީގައި އެނބުރި އައިސް ރާއްޖެ އަށް ރީތި ވަނަތަކެއް ދެ ޓީމުން ވެސް ހޯދައިދޭނެ ކަމަށެވެ.

ރާއްޖެއިން މިދިޔަ އަހަރު ވަނީ ބީޗު ވޮލީގެ ބައިނަލްއަޤުވާމީ މުބާރާތެއް ހޯސްޓުކޮށްފަ އެވެ. މިދިޔަ ޑިސެމްބަރު މަހު ސެންޓްރަލް ޒޯން މުބާރާތް ރާއްޖޭގައި ބާއްވާ ގޮތަށް އޮތް ނަމަވެސް، އެކިއެކި ސަބަބުތަކާ ހެދި މުބާރާތް ބޭއްވޭ ގޮތް ވަނީ ނުވެފަ އެވެ. އެހެންކަމުން ރާއްޖެއިން ވަނީ ހަތަރު ޤައުމު ބައިވެރިވާ މުބާރާތެއް ބާއްވަން ނިންމައިފަ އެވެ. މުބާރާތުގައި ރާއްޖޭގެ އިތުރުން ވާދަކުރާނީ އަފްޣާނިސްތާން، މެލޭޝިއާ އަދި ސިންގަޕޫރު އެވެ.