ޓީޖީއެސްޓީން ދައުލަތަށް ލިބުނު އާމްދަނީ 65 އިންސައްތަ ބޮޑު، ކުރެވޭ އުންމީދުތައް ވެސް ބޮޑު!

ފަތުރުވެރިކަމުގެ ދާއިރާގެ މުދަލާއި ޚިދުމަތުން ނަގާ ޓެކްސް މިއަހަރުން ފެށިގެން 16 އިންސައްތަ، އަދި ޓޫރިޒަމް ދާއިރާ ފިޔަވައި އެނޫން ދާއިރާތަކުގެ މުދަލާއި ޚިދުމަތުން ނެގޭ ޖީ.އެސް.ޓީ 8 އިންސައްތައަށް ވަނީ ބޮޑުކޮށްފައެވެ. ޓެކްސް އަށް ގެނައި އިޞްލާޙުގެ މައިގަނޑު މަޤްޞަދަކީ، ކޮވިޑް-19ގެ ސަބަބުންނާއި ދުނިޔޭގެ ބާޒާރުގައި ތެލުގެ އަގު އުފުލުމާއި ގުޅިގެން ދަޢުލަތުގެ ޚަރަދުތައް މަތިވެ ދަރަނި ބޮޑުވުމާއި ގުޅިގެން ދަރަނި ކުޑަކޮށް ފިސްކަލް ސަސްޓެއިނަބިލިޓީ ކަށަވަރު ކުރުމާއި، ޤައުމުގެ ތަރައްޤީއަށްޓަކައި ކުރަންޖެހޭ ޚަރަދުތައް ކުރުމަށް ދައުލަތުގެ އާމްދަނީ އިތުރުކުރުމެވެ.

ސަރުކާރުން ޖީއެސްޓީ އަދި ޓީޖީއެސްޓީ ބޮޑުކުރުމުން އެކަމާއި ގުޅިގެން ބައެއް އާންމުންނަށް ސިޔާސީ މީހުންގެ ނުރުހުން ސަރުކާރަށް އަމާޒުވެގެން ދިޔައެވެ. އަދި ޓެކްސް ބޮޑުކުރުމުން އެކަމުގެ ނޭދެވޭ އަސަރު ކުރާނެކަމަށް ވެސް އެފަރާތްތަކުން ދިޔައީ ބުނަމުންނެވެ.

ޓެކްސް ބޮޑުކޮށްފައިވަނީ ދައުލަތުގެ ކަމާއިގުޅޭ އިދާރާތަކާއި، އަމިއްލަ ވިޔަފާރިތަކާއި އަދި އިންޑަސްޓްރީގެ އެކިއެކި ފަރާތްތަކާއި މަޝްވަރާކުރުމަށްފަހުގައި އަދި ބައިނަލްއަގުވާމީ މާލީ އިދާރާތަކުގެ ވެސް ލަފަޔާ އެއްގޮތަށް ކަމަށް އޭރު ވެސް ސަރުކާރުން ދިޔައީ ބުނަމުންނެވެ. ދައުލަތުގެ ރިޒަރވް ރަނގަޅުކުރުމަށް މިވަގުތަށް އެޅެން ހުރި އެންމެ ރަނގަޅު ފިޔަވަޅަކީ ބޭރު ފައިސާ އިން ލިބޭ އާމްދަނީ އިތުރުކޮށް ބޭރުފައިސާގެ ރިޒަރވް ރަނގަޅުވެގެން ދިއުން ކަމަށް ވެސް ސަރުކާރުން ބުންޏެވެ.

ޓެކްސް މިދިޔަ މަހު ބޮޑުކޮށްފައިވާއިރު އެކަމުގެ ރަނގަޅު އަސަރު މިހާރު ފެންނަން މިވަނީ ފަށާފައެވެ. އެގޮތުން ޓީޖީއެސްޓީ ބޮޑުކުރުމުން ދައުލަތަށް އެއިން ލިބުނު އާމްދަނީ 65 އިންސައްތަ ވަނީ ބޮޑުވެފައެވެ. ފިނޭންސް މިނިސްޓްރީން ވަނީ މިދިޔަ މަހުގެ ތަފާސްހިސާބުތައް އާންމުކޮށްފައެވެ. މިދިޔަ މަސް ނިމުނު އިރު ޓީޖީއެސްޓީ އާއި ޖީއެސްޓީގެ ގޮތުގައި ވަނީ 1.6 ބިލިއަން ރުފިޔާ ލިބިފައިވާއިރު ޓީޖީއެސްޓީގެ ގޮތުގައި ލިބުނީ 1.2 ބިލިއަން ރުފިޔާއެވެ. މިދިޔަ މަހު ޖީއެސްޓީގެ ގޮތުގައި 405 މިލިއަން ރުފިޔާ ލިބިފައިވެއެވެ.

މިދިޔަ އަހަރުގެ ޖެނުއަރީ މަހު ޖީއެސްޓީގެ ގޮތުގައި ލިބުނީ 298 މިލިއަން ރުފިޔާ އެވެ. އެހެންވެ އެއީ މި އަހަރު ޖީއެސްޓީގެ ގޮތުގައި ލިބުނީ މިދިޔަ އަހަރަށް ވުރެ 70 ޕަސެންޓް އިތުރު އަދަދެކެވެ. މިދިޔަ މަހު ޓެކްސްގެ ގޮތުގައި ދައުލަތަށް ވަނީ 3.4 ބިލިއަން ރުފިޔާ ލިބިފައިވާއިރު ދެން އެންމެ ބޮޑު އާމްދަނީއެއް ލިބުނު، ބިޒްނަސް އެންޑް ޕްރޮޕަޓީ ޓެކްސް އިން ވެސް ވަނީ 1.3 ބިލިއަން ރުފިޔާ ވަނީ ލިބިފައެވެ.

މި މަހުގެ 2 ވަނަ ދުވަހުގެ ނިޔަލަށް ދައުލަތުގެ ޖުމްލަ އާމްދަނީގެ ގޮތުގައި ވަނީ 3.8 ބިލިއަން ރުފިޔާ ލިބިފައެވެ. މިއީ މިދިޔަ އަހަރަށް ވުރެ ގާތްގަނޑަކަށް 70 އިންސައްތައިގެ އިތުރުވުމެކެވެ. މިއަހަރު ނިމޭއިރު ދައުލަތުގެ އާމްދަނީގެ ގޮތުގައި 32 ބިލިއަން ރުފިޔާ ލިބޭނެ ކަމަށް ބަޖެޓުގައި ލަފާކޮށްފައިވެއެވެ. އޭގެ ތެރެއިން ޓެކްސް އާމްދަނީގެ ގޮތުގައި 24 ބިލިއަން ރުފިޔާ ލިބޭނެ ކަމަށް ލަފާކޮށްފައިވެއެވެ.

ސަރުކާރުން މިގޮތަށް ލަފާކޮށްފައިވާއިރު ޖަނަވަރީމަހު މީރާ އަށް ވެސް ރެކޯޑް މިންވަރަކަށް އާމްދަނީ ލިބިފައިވާ ކަމަށް ރައީސް ވަނީ ވިދާޅުވެފައެވެ. އަދި މި އަދަދުތަކާއިއެކު ކުރިއަށްއޮތް ތަނަށް ކުރެވޭ އުންމީދު އާވެފައިވާކަމަށް ވެސް ރައީސް ވިދާޅުވިއެވެ. ރާއްޖެއަކީ އިޤްތިސާދީ ގޮތުން މި އޭޝިއާ ސަރަހައްދުގެ އެންމެ ކުރިއަރާފައިވާ ޤައުމުކަން ބައިނަލްއަޤުވާމީ އިދާރާތަކުން ހާމަކުރި މައުލޫމާތުތަކުން އެނގެއެވެ. ކޮވިޑަށް ފަހު ރާއްޖޭގެ އިގްތިސާދު ބާރު މިނުގައި ކުރިއަރަމުންދާއިރު އިގްތިސާދީ ގޮތުން މި ދަނޑިވަޅުގައި ނިންމާ ކޮންމެ ނިންމުމަކީ ވެސް ރާއްޖެ އަށް އިންތިހާ މުހިންމު ނިންމުމެކެވެ.