ފަނޑިޔާރުންނާ ކޮމިޝަނުން ސުވާލު ކުރުމުގައި ގެންގުޅެންޖެހޭ ސުލޫކީ މިންގަނޑެއް އޮންނަންޖެހޭ: ހުސްނުއްސުއޫދު
މަލާމާތާއި ފުރައްސާރަ ކުރާ ގޮތަށް ސުވާލު ކުރެވިގެން ނުވާނެ
ފަނޑިޔާރުންގެ ޖަމިއްޔާގެ ރައީސް އަދި ސުޕްރީމް ކޯޓުގެ ފަނޑިޔާރު ހުސްނުއްސުއޫދު
ފަނޑިޔާރުންނާ ޖުޑީޝަލް ސަރވިސް ކޮމިޝަނުން ސުވާލު ކުރުމުގައި ގެންގުޅެންޖެހޭ ސުލޫކީ މިންގަނޑެއް އޮންނަންޖެހޭކަމަށް ފަނޑިޔާރުންގެ ޖަމިއްޔާގެ ރައީސް އަދި ސުޕްރީމް ކޯޓުގެ ފަނޑިޔާރު ހުސްނުއްސުއޫދު ވިދާޅުވެއްޖެއެވެ.
ފަނޑިޔާރުންގެ ޖަމިއްޔާގެ އަހަރީ ބައްދަލުވުން ނިންމުމުގެ ރަސްމިއްޔާތުގައި ސުއޫދު ދެއްކެވި ވާހަކަފުޅުގައި ވަނީ ޖޭއެސްސީން ބަލަމުންދާ ފަނޑިޔާރު މަހާޒް އަލީ ޒާހިރުގެ މައްސަލައަށް ނުސީދާ ގޮތެއްގައި އަލިއަޅުވާލައްވާފައެވެ. އެގޮތުން ފަނޑިޔާރުންނާ ކޮމިޝަނުން ސުވާލު ކުރުމުގައި ގެންގުޅެންޖެހޭ ސުލޫކީ މިންގަނޑެއް އޮންނަންޖެހޭކަން ފާހަގަ ކުރައްވައި ސުއޫދު ވިދާޅުވީ، މަލާމާތާއި ފުރައްސާރަ ކުރާ ގޮތަށް ސުވާލު ކުރެވިގެން ނުވާނެ ކަމަށެވެ.
ސުއޫދު ވިދާޅުވީ، ކޮމިޝަނަށް ހުށައެޅޭ މައްސަލަތަކާއި ގުޅޭގޮތުން ޖުޑީޝަރީގެ މުވައްޒަފުން ހާޒިރުކުރާއިރު، އާދައިގެ ސުވާލުތައްވެސް އެ މުވައްޒަފުންނާ ކުރާ ކަމަށެވެ.
އޭގެ ބައެއް މިސާލުތައް ހިއްސާ ކުރައްވައި ސުއޫދު ވަނީ ފަނޑިޔާރު މަހާޒްގެ މައްސަލައަށް އަލިއަޅުވާލައްވާފައެވެ. އެގޮތުން ފަނޑިޔާރުން ފަރިއްކުޅުވިއިރު ބާކީ އެތިކޮޅެއް މުވައްޒަފުންނަށް ނުލިބޭތޯއާއި، އެ ދުވަހު މިވެނި ކާއެއްޗެއް ގެނައީ ކީއްވެތޯ ފަދަ ސުވާލުތައް އަމާޒުކުރާއިރު، އެއީ ޖެއްސުމަށް ސުވާލު ކުރުން ކަމުގައި ފަނޑިޔާރު ސުއޫދު ދެކިލައްވައެވެ.
އެގޮތަށް ސުވާލު ކުރެވިގެން ނުވާނެކަމަށްވެސް ސުއޫދު ވިދާޅުވިއެވެ. އެފަދަ ކަންކަމުގެ ސަބަބުން ފަނޑިޔާރުންގެ މިނިވަންކަމަށް އަސަރު ކުރާކަމަށް ސުއޫދު ވިދާޅުވިއެވެ.
ފަނޑިޔާރު ހުސްނުއްސުއޫދު ވިދާޅުވީ، އެފަދަ ކަންކަން އިސްލާހު ކުރުމަކީ ފަނޑިޔާރުންގެ ޖަމިއްޔާގެ މަސްއޫލިއްޔަތެއް ކަމަށާއި، އެކަންކަމާ ދެކޮޅަށް އަޑު އުފުއްލަވާނެ ކަމަށެވެ. އެގޮތުން ފަނޑިޔާރުންގެ ޖަމްޢިއްޔާގެ މައިގަނޑު މަގްސަދަކީވެސް ފަނޑިޔާރުންގެ މުސްތަގިއްލުކަން ޙިމާޔަތް ކުރުމަށް މަސައްކަތް ކުރުމާއި، ފަނޑިޔާރުންގެ މިނިވަންކަމާއި މުސްތަގިއްލުކަން ދެމެހެއްޓުމަށް މަސައްކަތްކުރުމެވެ.
މީގެ އިތުރުން، އެމީހުންގެ އިމްތިޔާޒުތައް ޙިމާޔަތްކުރުމަށް މަސައްކަތްކުރުންވެސް މި ޖަމިއްޔާގެ މަޤްސަދުތަކުގެ ތެރޭގައި ހިމެނެއެވެ.
ޖޭއެސްސީން ބަލަމުންދަނީ ސުޕްރީމް ކޯޓުން ބެއްލެވި އިސްތިއުނާފަކާމެދު އެ ކޯޓުން ހުކުމްކުރި ގޮތާ ގުޅިގެން އެކަން ފާހަގަކުރުމަށް، އެ އިސްތިއުނާފުގައި ހިމެނޭ ޚަސްމަކާ ގުޅުން އޮންނަ ފަރާތަކުން ފޮނުވި ފަރިއްކޮޅަކާ، އެ ޝަރީއަތް ހިންގުމުގައި ބައިވެރިވި ސުޕްރީމް ކޯޓުގެ ފަނޑިޔާރު އަލްއުސްތާޒު މަހާޒު އަލީ ޒާހިރު ހަވާލުވެވަޑައިގެންފައިވާކަމަށް ބުނާ މައްސަލައެކެވެ. އެއީ ކުރީގެ ރައީސް އަބްދުﷲ ޔާމީނުގެ މައްޗަށް ކޮށްފައިވާ ޙުކުމުގެ އިސްތިއުނާފު އަޑުއެހުންތަކެވެ.
އެހެންނަމަވެސް، ފަރިއްކޮޅުގެ މާ ކުރިން ޝަރީއަތުގެ ކަންކަން ހަމަޖެހިފައިވާނެ ކަމަށާއި އެއީ ސިއްރުން ކުރިކަމެއް ނޫންކަމަށް ފަނޑިޔާރު މަހާޒު ވަނީ ވިދާޅުވެފައެވެ.
