ޤާނޫނު ހަދާ މަޖިލީހަށް މޯދީ ވަޑައިގެންނެވިއިރު ތުރުކުރައްވައިގެން ހުންނެވި ޖެކެޓަށް ސަމާލުކަން
8 ފެބުރުއަރީ 2023 | ބުދަ 17:34މިޖެކަޓަކީ ޕީއީޓީ ފުޅި ރީސައިކަލް ކޮށްގެން ހަދާފައިވާ ޖެކެޓެއް
އިންޑިޔާގެ ބޮޑުވަޒީރު ނަރެންދްރަ މޯދީ ޕީއީޓީ ފުޅި ރީސައިކަލް ކޮށްގެން ހަދާފައިވާ ޖެކެޓެއް ތުރުކުރައްވައިގެން
އިންޑިޔާގެ ބޮޑުވަޒީރު ނަރެންދްރަ މޯދީ ތިމާވެއްޓަށް ދެއްވާ ސަމާލުކަން ތަފާތު ގޮތަކަށް ދައްކަވައިލައްވައިފިއެވެ.
ބުދަ ދުވަހު މޯދީ އިންޑިޔާގެ ގާނޫނު ހަދާ މަޖިލީސް ލޮކްސަބާ އަށް ވަޑައިގެންނެވިއިރު ތުރުކުރައްވައިގެން ހުންނެވި ނޫ ކުލައިގެ ޖެކެޓަށް ވަނީ ސަމާލުކަން ލިބިގެންގޮސްފައެވެ. އެއީ މިޖެކަޓަކީ ޕްލާސްޓިކްގެ ބާވަތެއް ކަމަށްވާ ޕޮލިޔެތައިލީން ޓެރަޕްތަލޭޓް ނުވަތަ "ޕީއީޓީ" ފުޅި ރީސައިކަލް ކޮށްގެން ހަދާފައިވާ ޖެކެޓަކަށްވީމައެވެ.
މިޖެކެޓް މޯދީއަށް އަރުވާފައިވަނީ އިންޑިޔަން އޮއިލް ކޯޕަރޭޝަން (އައިއޯސީ)ން ބެންގަލޫރުގައި ކުރިޔަށްދިޔަ އިންޑިއަން އެނަރޖީ ހަފްތާގައެވެ.
އައިއޯސީގެ ޕްލޭނަކީ 10 ކްރޯޑަށްވުރެ ގިނަ "ޕީއީޓީ" ފުޅި ރީސައިކަލް ކޮށްގެން އެތަނުގެ މުވައްޒަފުންނާއި ސިފައިންނަށް ދެމެހެއްޓެނެވި ގޮތެއްގައި ހެދުން ތައްޔާރުކޮށްދިނުމެވެ.
