ވާދޫ ޓީމުގެ މިއަހަރުގެ އަމާޒަކީ ގަދަ 16 އަށް ވުރެ ކުރިއަށް ދިޔުން: ކޯޗު

މިއަހަރުގެ ގޯލްޑަން ފުޓުސެލް ޗެލެންޖުގައި ވާދަކުރާ ގދ.ވާދޫގެ އަމާޒަކީ މުބާރާތުގެ ގަދަ 16 އަށް ވުރެ ކުރިއަށް ދިޔުން ކަމަށް އެ ޓީމުގެ ކޯޗު އަލީ ނަދީމް ބުނެފި އެވެ.

މުބާރާތުގެ ފުރަތަމަ މެޗުގެ ކުރިން ބުދަ ދުވަހުގެ ހަވީރު ވާދޫ ޓީމުން ވަނީ ފަރިތަކުރުން ކުރިއަށް ގެންގޮސްފަ އެވެ. ފުރަތަމަ މެޗުގައި އެ އަތޮޅުގެ ގައްދޫއާ ދެކޮޅަށް ނުކުތުމުގެ ކުރިން ނަދީމް ބުނީ ޓީމުގެ ހުރިހާ ކުޅުންތެރިން ވެސް މިވަގުތު ތިބީ ވަރަށް ފިޓުކޮށް ކަމަށެވެ. އޭނާ ބުނީ ޓީމުގެ ފަރިތަކުރުންތައް ވެސް ކުރިއަށް ގެންދެވުނީ ވަރަށް ރަނގަޅަށް ކަމަށާއި، ޓީމު މިހާރު އޮތް ޙާލަތާމެދު ވަރަށް ބޮޑަށް ހިތްހަމަ ޖެހޭ ކަމަށެވެ. އަދި އެންމެ ފަހުން މިދިޔަ އަހަރު ކުޅުނު މުބާރާތުގައި ދެވުނީ ގަދަ 16 އާ ހަމައަށް ކަމަށެވެ. އެހެންކަމުން މިވަގުތަށް ބޭނުންވަނީ މިއަހަރު ގަދަ 16 އަށް ވުރެ ކުރިއަށް ދިޔުން ކަމަށެވެ. އޭގެ ފަހަށް ވިސްނާނީ ފުރަތަމަ އެ ޓާގެޓަށް ވާސިލްވުމަށް ފަހު ކަމަށް ވެސް ކޯޗު ބުންޏެވެ.

މީގެ އިތުރުން ވާދޫ ޓީމުގައި ތިބި ކުޅުންތެރިންނާ ގުޅޭ ގޮތުން ވާހަކަ ދައްކަމުން ނަދީމް ބުނީ، ޓީމުގައި ތިބި ކޮންމެ ކުޅުންތެރިޔަކީ ވެސް މޮޅު ކުޅުންތެރިން ކަމަށެވެ. ކޮންމެ ކުޅުންތެރިޔަކަށް ވެސް އިތުބާރު ކުރާ ކަން ފާހަގަކޮށް އޭނާ ބުނީ މެޗުގައި ފުރަތަމަ ކުޅެން އަރުވާ ކުޅުންތެރިންގެ އިތުރުން، ބެންޗުގައި ތިބޭނީ ވެސް މޮޅު ކުޅުންތެރިން ކަމަށް އޭނާ ބުންޏެވެ. އަދި އެ ޓީމުގެ ކޮންމެ ކުޅުންތެރިޔަކީ ވެސް އެކަކު އަނެކަކަށް ދޫނުކުރާ ވަރުގެ ކުޅުންތެރިން ކަމަށެވެ. މީގެއިތުރުން މަސައްކަތް ކުރާނީ ޓާގެޓަށް ވާސިލްވުމަށް ކަމަށާއި، އެއަށްވުރެ ދުރަށް ދިޔުމަށް ވެސް މަސައްކަތް ކުރާނެ ކަމަށެވެ. ނަދީމް ފާހަގަ ކުރި ގޮތުގައި ކަމަކަށް މަސައްކަތް ކުރާ ބަޔަކަށް ކާމިޔާބު ވާނެ އެވެ.

ނަދީމްގެ އިތުރުން ވާހަކަ ދައްކަމުން ވާދޫ ޓީމުގެ ކެޕްޓަން އަޙުމަދު އަޔާޒް (އަޔާ) ބުނީ، ޓީމުގެ ފިޓްނަސް އާއި، ޓީމު ވޯކަށް ބަލާއިރު މިދިޔަ އަހަރަށް ވުރެ ހުރިހާ ގޮތަކުން ވެސް ރަނގަޅު ކަމަށެވެ. އަޔާ ވެސް ބުނީ އޭނާގެ ވެސް އަމާޒަކީ މިދިޔަ އަހަރަށް ވުރެ އެއް ހަރުފަތް ކުރިއަށް ދިޔުން ކަމަށެވެ. އެގޮތުން މުބާރާތުގެ ކުއާޓާ ފައިނަލް ނުވަތަ ސެމީ ފައިނަލް ކުޅުމަށް ޓޭގެޓުކޮށްފައިވާނެ ކަމަށެވެ. މީގެ އިތުރުން މިދިޔަ އަހަރާ އަޅާ ބަލާއިރު ކުޅުންތެރިން ކުޅުން ވަރަށް ބޮޑަށް ރަނގަޅުވެފައިވާ ކަން ފާހަގަކޮށް އަޔާ ބުނީ ކުޅުންތެރިންނާއެކު، ޓީމެއްގެ ގޮތުގައި މަސައްކަތް ކޮށް ޓާގެޓަށް ވާސިލްވެވޭނެ ކަމުގެ ވަރަށް ބޮޑު އުންމީދެއް އޮތް ކަމަށެވެ. އަދި ކޮންމެ ކުޅުންތެރިޔަކީ ވެސް މޮޅު ކުޅުންތެރިޔެއް ކަމަށާއި، ކުރިއާ ޚިލާފަށް އެކަމުގެ ޗެލެންޖު މިހާރު ޓީމުގައި ބޮޑަށް އޮންނަ ކަމަށެވެ.

ވާދޫގެ ފުރަތަމަ މެޗުގައި ބުރާސްފަތި ދުވަހުގެ ރޭ ގައްދޫއާ ދެކޮޅަށް ކުޅޭއިރު، ގްރޫޕް ސްޓޭޖުގައި ޖުމުލަ ހަތަރު މެޗު ކުޅެން ޖެހެ އެވެ. ދެ ވަނަ މެޗުގައި މި މަހުގެ 16 ވަނަ ދުވަހު ނުކުންނާނީ ހޯޑެއްދޫއާ ދެކޮޅަށެވެ. އޭގެ ފަހުން 18 ވަނަ ދުވަހު މަޑަވެއްޔާ ދެކޮޅަށް ނުކުންނައިރު، ގްރޫޕް ފަހު މެޗުގައި ތިނަދޫއާ ދެކޮޅަށް ނުކުންނާނީ 21 ވަނަ ދުވަހު އެވެ.