އިންޑިއަން ރެއިލްވޭސްއިން ވަޒީފާ ހޯދައިދޭނެކަމަށް ބުނެ މީހުންގެ އަތުން ފައިސާ ނަގަމުން ދިޔަ ދެމީހަކު ހައްޔަރުކޮށްފި
މި ދެމީހުން މީހަކު އަތުން ދެލައްކަ ރުޕީސްއާ ދެމިލިއަން ރުޕީސްއާ ދެމެދުގެ އަދަދަކަށް ފައިސާ ހޯދިކަމަށްވޭ
އިންޑިޔާގެ ރޭލެއް
އިންޑިއަން ރެއިލްވޭސްއިން ވަޒީފާ ހޯދައިދޭނެކަމަށް ބުނެ ދޮގުހަދައި އޮޅުވާލައިގެން މީހުންގެ އަތުން އެތައްލައްކަ ރުޕީސްހޯދުމަށްފަހު ފިލައިގެން އުޅުނު ދެ މީހަކު އިންޑިޔާ ފުލުހުން ހައްޔަރުކޮށްފިއެވެ. މިދެމީހުން ވަނީ، ވަޒީފާ ހޯދައިދޭނެކަމަށް ބުނެ 28 ޒުވާނެއްގެ އަތުން ގިނަ އަދަދެއްގެ ފައިސާ ހޯދާފައެވެ. މިގޮތުން އިންޑިއަން ރެއިލްވޭސްއިން ޓިކެޓް އެސިސްޓަންޓްކަމާއި ޓްރެފިކް އެސިސްޓަންޓްކަން އަދި އޮފީހުގެ ވަޒީފާތައް ހޯދައިދޭނެކަމަށް ބުނެ، މީހެއްގެ އަތުން ދެލައްކަ ރުޕީސްއާ ދެމިލިއަން ރުޕީސްއާ ދެމެދުގެ އަދަދަކަށް ފައިސާ ހޯދިކަމަށް ވެއެވެ.
އިންޑިއަން ރެއިލްވޭސްއަކީ މުޅިދުނިޔޭގަވެސް އެންމެ ބޮޑު އެއް އެމްޕްލޯޔަރެވެ. ޒުވާނުން އަބަދުވެސް އެފަދަ ތަނަކުން ދާއިމީ ވަޒީފާ ހޯދަމުންދާތީ، މިފަދަ ސްކޭމްތައް ހިންގުމަކީ އިންޑިޔާގައި އާންމު ކަމެއް ކަމަށް ވެއެވެ. މިފަހަރުގެ ސްކޭމްގައި ޓެމިލްނާޑޫގެ 28 ޒުވާނުންގެ އަތުން ފައިސާ ނެގުމަށްފަހު، ސައްހަ ނޫން މެޑިކަލް ޓެސްޓްތަކެއްވެސް ހެއްދި ކަމަށް ވެއެވެ. އެއަށް ފަހު ސްޓޭޝަނުން ދަތުރުކުރާ ރޭލު ގުނަން ތިބުންފަދަ ބައެއް ކަންކަންވެސް އެމީހުންނާ ހަވާލުކުރިކަމަށް ވެއެވެ. ލަނޑު ލިބުނު ބައެއް ޒުވާނުން ބުނެފައިވާގޮތުގައި ސްކޭމް ހެދި މީހުންނަށް ދިނުމަށް އެމީހުން ވަނީ އެކިފަރާތްތަކުން އަނބުރާ ދޭގޮތަށް ފައިސާ ހޯދާފައެވެ.
މިމައްސަލައިގެ ޚަބަރުލިބި ފުލުހުން އެދެމީހުންނަށް އަންނަނީ ނޮވެމްބަރު މަހުން ފެށިގެން ފާރަލަމުންނެވެ.
ހައްޔަރުކުރުމަށްފަހު އެ ދެމީހުން އަދި އެއްވެސް އެއްޗެއް ނުބުނާކަމަށްވެއެވެ.
