އީރާނުގައި ޖަލު ހުކުމް ތަންފީޒުކުރަމުން އަންނަ އެތައް ހާސް ބަޔަކަށް އާޔަތުﷲ މައާފް ދެއްވައިފި

އީރާނުގައި ޖަލަށްލާފައި ތިބި އެތައްހާސް ކުށްވެރިންނަށް އެގައުމުގެ ސުޕްރީމް ލީޑަރ އާޔަތުﷲ އަލީ ޚާމަނާއީ މައާފް ދެއްވައިފިއެވެ. މީގެ ތެރޭގައި, ސަރުކާރާ ދެކޮޅަށް މުޒާހަރާ ކުރުމުގެ ކުށުގައި ޖަލަށް ލާފައިވާ އެތައް ބަޔަކުވެސް ހިމެނެއެވެ.

އަލީ ޚާމަނާއީގެ އަފޫއާންމު ނެރުއްވާފައިވަނީ އެގައުމުގައި 1979ވަނަ އަހަރު ގެނެވުނު އިސްލާމިކް ރިވޮލިއުޝަނަށް އިތުރު އަހަރެއް ފުރުމުގެ މުނާސަބަތާ ދިމާކޮށެވެ. ސްޓޭޓް މީޑިޔާއިން ރިޕޯޓްކޮށްފައިވާގޮތުގައި، ކުށްވެރިން ދޫކުރާ ގޮތަށް އޮތީ ޝަރުތުތަކެއްކޮށްފައެވެ.

ބުރުގާ އަޅާފައި ހުރި ގޮތް ގޯސްވެގެންކަމަށް ބުނެ ފުލުހުން ހައްޔަރުކުރި 22 އަހަރުގެ އަންހެނެއްކަމަށްވާ މަހްސާ އަމީނީ ފުލުހުންގެ ހައްޔަރުގައި ހުއްޓާ މަރުވުމާ ގުޅިގެން، މިދިޔަ އަހަރުގެ ސެޕްޓެމްބަރު މަހުން ފެށިގެން ގިނަ އަދަދެއްގެ ޒުވާނުންނާއި ކިޔަވާ ކުދިން އައީ ސަރުކާރާ ދެކޮޅަށް މުޒާހަރާ ކުރަމުންނެވެ. ހިއުމަން ރައިޓްސް ގްރޫޕްތަކުން ބުނާގޮތުގައި މުޒާހަރާތަކުގައި މިހާތަނަށް 500އަށްވުރެ ގިނަ މީހުން ވަނީ މަރުވެފައެވެ. އަދި 20 ހާހެއްހާ މީހުން ވަނީ ހައްޔަރު ކުރެވިފައެވެ.

އީރާން ސަރުކާރުން ބުނާގޮތުގައި މުޒާހަރާތަކަކީ ބޭރުގެ ބާރުތަކުގެ ނުފޫޒުން ހިންގާ ކަމެކެވެ. އަދި ހައްޔަރުކުރި މީހުންގެ ތެރެއިން 4 ޒުވާނަކަށް ވަނީ މަރުގެ އަދަބުވެސް ދީފައެވެ. އެހާ ހިސާބުން މުޒާހަރާތައް ކޮންމެވެސް ވަރަކަށް މަޑުޖެހުނު ނަމަވެސް، އަދިވެސް ސަރުކާރާ ދެކޮޅު މުޒާހަރާތައް ކުރިއަށްދެއެވެ.

އަފޫއާންމުގެ ދަށުން، ކުށް މައާފްކުރެވުނު މީހުންގެ ތެރޭގައި، ބޭރުގެ ފަރާތް ތަކަށް ޖާސޫސްކޮށް ދިނުންފަދަ އިލްޒާމް އެޅިފައިވާ މީހުންނާއި، މީހުން މެރުމާއި ދައުލަތުގެ މުދާ ހަލާކުކުރުންފަދަ ކުށްތައް ކުރި މީހުންނެއް ނުހިމެނެއެވެ. މީގެ އިތުރުން އީރާނާއެކު އެހެން ގައުމަކަށް ނިސްބަތްވާ މީހުންވެސް ދޫކޮށްފައެއް ނުވެއެވެ.

ޑެޕިއުޓީ ޖުޑިޝަރީ ޗީފް ސާދިގް ރަހީމީ ވިދާޅުވިގޮތުގައި، މައާފް ކުރެވުނު އެންމެންވެސް ކުށަށް އިއުތިރާފްވެ ލިއުމުން މައާފަށް އެދެން ޖެހެއެވެ. ނޫންނަމަ އެމީހުން މިނިވަނެއް ނުކުރެވޭނެއެވެ.