ފަނޑިޔާރުންގެ ރިޓަޔަރމަންޓާ ގުޅޭ އައު ގަވާއިދަށް އަމަލުކުރަން ފަށައިފިއެވެ.

މި ޤަވާއިދަށް އަމަލުކުރަން ފަށާފައިވަނީ ބުދަ ދުވަހުއެވެ. މިއީ އުމުރުން 55 އަހަރު ނުވިކަމުގައި ވިޔަސް، ފަނޑިޔާރުންނަށް ޝަރަފުވެރިކަމާއެކު މަޤާމުން ވަކިވެވޭނެ އުސޫލު ބަޔާންކުރާ ގަވާއިދެވެ.

މި ޤަވާއިދުގެ ދަށުން ފަނޑިޔާރުންނަށް ރިޓަޔަރ ވެވޭ ޙާލަތްތަކަށް ބަލާއިރު، އެއް ޙާލަތަކީ ޝަރަފުވެރިކަމާއެކު ވަޒީފާއިން ވަކިވުމެވެ. އެގޮތުން ޝަރަފުވެރިކަމާއެކު ވަކިވުމަށް އެދެވޭ ޝަރުތުތަކުގެ ތެރޭގައި ފަނޑިޔާރުކަމުގައި 10 އަހަރު ދުވަހު ޚިދުމަތް ކޮށްފައިވުން ހިމެނެއެވެ.

ފަނޑިޔާރުންނަށް ރިޓަޔަރ ވެވޭ ޙާލަތްތަކަށް ބަލާއިރުު، އުމުރުން 55 އަހަރު ވުމުންވެސް ފަނޑިޔާރުކަމުގެ މަޤާމުން ރިޓަޔަރވުމަށް އެދެވިދާނެއެވެ. އަދި ޞިއްޙީ ސަބަބަކާހުރެވެސް މަޤާމުން މުސްކުޅިކޮށްދިނުމަށް އެދެވިދާނެއެވެ.

ޝަރަފުވެރިކަމާއެކު ވަކިވާ ފަނޑިޔާރުންނަށް 3 ގޮތަކަށް އިނާޔަތް ލިބިދެއެވެ. އޭގެ ތެރޭގައި އެއްފަހަރާ ދެވޭ ޢިނާޔަތާއި، މުޅި އުމުރަށް، މަހުން މަހަށް ދެވޭ ޢިނާޔަތާއި، އެހެނިހެން ޢިނާޔަތްތައް ހިމެނެއެވެ.

ޤާނޫނަކަށް ގެނެވޭ އިޞްލާޙެއްގެ ސަބަބުން، ނުވަތަ އަލަށް ތަޞްދީޤުކުރާ ޤާނޫނަކުން، ނުވަތަ އެހެން ސަބަބަކާހުރެވެސް، ފަނޑިޔާރަކު ފަނޑިޔާރުކަމުން ވަކިކުރިއިރު ދައުލަތަށް ޚިދުމަތްކޮށްފައިވާ މުއްދަތަށް، ނުވަތަ ފަނޑިޔާރުކަމުގައި ޚިދުމަތްކޮށްފައިވާ މުއްދަތަށް ބަލައި، އެއްފަހަރާ ދެވޭ ޢިނާޔަތެއް ދައުލަތުން ދީފައިވާ ފަނޑިޔާރުން، ދެވަނަ ފަހަރަށް ފަނޑިޔާރުކަމަށް އައްޔަނު ކޮށްފައި ވަނިކޮށް މަޤާމުން މުސްކުޅިކުރާ ހާލަތުގައި، އެފަދަ ފަނޑިޔާރުންނަށް ޢިނާޔަތް ދިނުމުގައި އެއްފަހަރާ ދޭ ޢިނާޔަތާއި މަހުންމަހަށް ދޭ ޢިނާޔަތް ދިނުމުގައި މުއްދަތު ބަލާނެ ގޮތްވެސް ވަނީ ބަޔާންކޮށްފައެވެ.

މި ގަވާއިދުގެ ދަށުން ޢިނާޔަތް ލިބުން އިސްތިސްނާ ވާ ފަރާތްތަކުގެ ތެރޭގައި ފަނޑިޔާރުކަމުގެ މަޤާމުން މުސްކުޅި ކޮށްދިނުމަށް އެދިފައިވާ ފަނޑިޔާރުގެ ސްލޫކީ މައްސަލައެއް ޖުޑީޝަލް ސަރވިސް ކޮމިޝަނަށް ހުށަހެޅިފައިވާ ނުވަތަ އެ ފަނޑިޔާރުގެ ސްލޫކީ މައްސަލައެއް ބަލަމުންދާ ފަނޑިޔާރުން ހިމެނެއެވެ.

ޤަވާއިދުގައި ބުނެފައިވާ ގޮތުގައި ސުލޫކީ މައްސަލައެއް ހުށަހެޅިފައިވާ ފަނޑިޔާރަކު މަޤާމުން މުސްކުޅިކޮށްދެވޭނީ، އެ މައްސަލައަށް ޖުޑީޝަލް ސަރވިސް ކޮމިޝަނުން ގޮތެއް ނިންމުމަށް ފަހުގައެވެ.

މި ގަވާއިދުގެ ދަށުން ރިޓަޔަރ ކުރެވޭ ފަނޑިޔާރުންނަށް ދެވޭ ލަޤަބަށް ބަލާއިރު، އެމީހަކީ ސުޕްރީމް ކޯޓުގައި ނުވަތަ ހައިކޯޓުގައި މަސައްކަތްކުރި ފަނޑިޔާރެއްނަމަ، އެ މީހަކަށް މުޚާޠަބު ކުރުމުގައި އެ މީހެއްގެ ނަމުގެ ކުރިޔަށް "ޖަސްޓިސް ރިޓަޔަރޑް" މި ލަޤަބު ބޭނުންކުރެވެއެވެ.

އަދި އެ މީހަކީ ދަށު ކޯޓުތަކުގެ ތެރެއިން ސުޕީރިއަރ ކޯޓުގައި މަސައްކަތްކުރި ފަނޑިޔާރެއްނަމަ "ޖަޖް ރިޓަޔަރޑް" މި ލަޤަބު ބޭނުންކުރެވެއެވެ.