އޭޕްރިލް، މެއި ހިސާބުގައި ހުޅުމާލެއިންނާއި ގުޅީފަޅުން ގޯތި ދޫކުރެވޭނެ: ޕްލޭނިންގ މިނިސްޓްރީ
ބިންވެރިޔާ ޕްރޮގްރާމުގެ ދަށުން ގޯތި ލިބޭ މީހުންގެ ވަގުތީ ލިސްޓެއް މާޗު މަހުގެ ނިޔަލަށް ނެރެވޭނެ
ގުޅީފަޅު ތަރައްްްޤީކުރުން
އަންނަ އޭޕްރިލް މަސް ނުވަތަ މެއި މަހުގެ ތެރޭގައި ބިންވެރިޔާ ޕްރޮގްރާމުގެ ދަށުން ހުޅުމާލެއިންނާއި ގުޅީފަޅުން ގޯތި ދޫކުރެވޭނެ ކަމަށް މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ އިން ބުނެފިއެވެ.
"ރާއްޖެ ޓީވީ" ގެ ފަލަސުރުޚީ ޕްރޮގްރާމުގައި ވާހަކަދައްކަވަމުން އެ މިނިސްޓްރީގެ ސީނިއަރ އެގްޒެކެޓިވް ޑިރެކްޓަރު މުޙައްމަދު އާރިފް ވިދާޅުވީ ހުޅުމާލެއިން ގޯތި ދޫކުރާއިރު ގުޅީފަޅުގައި ގޯތި ދޫކުރަން ނިންމާފައިވާ ބިން ހިއްކައި މިނިސްޓްރީއަށް ލިބޭނެ ކަމަށެވެ. އެހެންކަމުން ދެ ސަރަހައްދުން ވެސް އެއްކޮށް ގޯތި ދޫކުރެވޭނެ ކަމަށް އޭނާ ވިދާޅުވިއެވެ.
އާރިފް ވިދާޅުވި ގޮތުގައި ބިންވެރިޔާ ޕްރޮގްރާމުގެ ދަށުން ގޯތި ލިބޭ މީހުންގެ ވަގުތީ ލިސްޓެއް މާޗު މަހުގެ ނިޔަލަށް ނެރެވޭނެއެވެ. އަދި ދާއިމީ ލިސްޓު ނެރުމަށްފަހު ވަގުތުން ބިން ދޫކުރުމުގެ މަސައްކަތް ކުރިއަށްދާނެ ކަމަށާއި އެގޮތުން، އަންނަ އޭޕްރިލް ނުވަތަ މެއި މަސް ތެރޭގައި ގޯތި ދޫކުރެވޭނެ ކަމަށް ބެލެވޭ ކަމަށް އޭނާ ވިދާޅުވިއެވެ.
ގުޅީފަޅުގެ ބައެއް މިހާރު ވެސް ހިއްކާފައިވާއިރު އިތުރަށް ހިއްކަން ޖެހޭ ސަރަހައްދު ހިއްކުމަށް ސަރުކާރުން މިހާރު ވަނީ ބޮސްކާލިސް ކުންފުންޏާ ހަވާލުކޮށްފައެވެ. ގާތްގަނޑަކަށް 120 މިލިއަން ޔޫރޯގެ މި މަޝްރޫއުގެ ދަށުން ގުޅީފަޅު ތަރައްގީކުރުމަށް އެ ކުންފުންޏާ ހަވާލުކޮށްފައިވާއިރު، ގުޅީފަޅުގެ ފުރަތަަމަ ފިޔަވަހީގެ މަސައްކަތްވެސް ކޮށްފައިވަނީ އެ ކުންފުނިންނެވެ.
ބިންވެރިޔާ ޕްރޮގްރާމުގެ މިފަހަރު ޖުމްލަ 3000 ގޯތި ދޫކުރާނެއެވެ. އެއީ ހުޅުމާލެއިން 1000 ގޯއްޗާއި ގުޅީފަޅުން 2000 ގޯއްޗެވެ. މާލޭގެ ރައްޔިތުންނަށް ހާއްސަކޮށްގެން ދޭ މި ގޯތިތައް ދިނުމަށް ހުޅުމާލެއިން ކަނޑައަޅާފައިވާ ސަރަހައްދުތައް ސާފު ކުރުމުގެ މަސައްކަތް މިހާރު ދަނީ ކުރަމުންނެވެ.
ހުޅުމާލެއިން ބިން ދޫކުރުމަށް 1،250،000 (އެއްމިލިއަން ދެލައްކަ ފަންސާސްހާސް) އަކަފޫޓުގެ ބިން ވަނީ ޕްލޭނިންގ މިނިސްޓްރީއަށް ހަވާލު ކުރެވިފައެވެ. މިއީ 62 ސަރަހައްދަކުން ލިބިފައިވާ ބިންތަކެއް ކަމަށާއި، ބިން ލިބޭ ފަރާތްތަކުގެ ލިސްޓު އާންމުކުރެވެންވާއިރަށް މި ސަރަހައްދުތައް ސާފުކޮށް ނިންމައި، ކަޑަޖަހައި، ހައްގުވެރިންނާ ހަވާލުކުރެވޭނެ ކަމަށް އާރިފް ވިދާޅުވިއެވެ.
