އަހަރުގެ ފުރަތަމަ 25 ދުވަހު 138،593 ފަތުރުވެރިން އައިސްފި
31 ޖެނުއަރީ 2023 | އަންގާރަ 10:47އެންމެ ގިނައިން ފަތުރުވެރިން އަންނަނީ ރަޝިއާއިން
ރާއްޖެ އަންނަ ފަތުރުވެރިން
ޖެނުއަރީ 25 ވަނަ ދުވަހުގެ ނިޔަލަށް 138،593 ފަތުރުވެރިން ރާއްޖެ އައިސްފިއެވެ.
ޓުއަރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން، މިހާތަނަށް 138،593 ފަތުރުވެރިން ރާއްޖެ އައިސްފައިވާއިރު، މިއީ މިދިޔަ އަހަރުގެ މި މުއްދަތާ އަޅާބަލާއިރު 29.7 އިންސައްތަ އިތުރު އަދަދެކެވެ.
2022 ވަނަ އަހަރުގެ މި މުއްދަތުގައި އައިސްފައިވަނީ 106،501 ފަތުރުވެރިންނެވެ. އަދި 2021 ވަނަ އަހަރު އައިސްފައިވަނީ 73،501 ފަތުރުވެރިންނެވެ. ޓުއަރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން، ދުވާލެއްގެ މައްޗަށް 5544 ފަތުރުވެރިން އައިސްފައިވެއެވެ. އަދި އެވްރެޖްކޮށް 8.1 ދުވަހު މަޑުކޮށްފައިވެއެވެ.
މިއަހަރުގެ ޓޮޕް 10 މާކެޓްގެ ތެރޭގައި ހިމެނެނީ ރަޝިއާ، އިންޑިއާ، އިޓަލީ، އިނގިރޭސިވިލާތް، ޖަރުމަނުވިލާތް، އެމެރިކާ، ފްރާންސް، ޗައިނާ، ކަޒަކިސްތާން އަދި ދެކުނު ކޮރެއާއެވެ.
މިހާތަނަށް 172 ރިސޯޓުން އަންނަނީ ހިދުމަތް ދެމުންނެވެ. އެއީ 41،945 އެނދެވެ. 1640 އެނދާއެކު 13 ހޮޓަލަކުން ހިދުމަތް ދެމުން އަންނަ އިރު 14،178 އެނދާއެކު 877 ގެސްޓްހައުސްއިން އަންނަނީ ހިދުމަތް ދެމުންނެވެ. އަދި 2901 އެނދާއެކު 157 ސަފާރީތައް އަންނަނީ އޮޕަރޭޓް ކުރަމުންނެވެ.
