މައިގަޑު ކާގޯއެއްގެގޮތުގައި ގެރި/ބަކަރި އަރުވައިގެން ކެނަރީ އައިލަންޑްސްއިން މެދުއިރުމައްޗަށް ދަތުރުކުރި ބޮޑު ކާގޯ އުފުލާ ބޯޓެއް، ބަލައި ފާސް ކުރުމުގެ ތެރޭގައި ސްޕެނިޝް ފުލުހުން 4،500 ކިލޯގްރާމްގެ ކޮކެއިން  އަތުލައިގެންފިއެވެ. މިތަކެތީގެ އަގު 114 މިލިއަން ޑޮލަރަށް އަރާނެ ކަމަށް ވެއެވެ.

ހުޅަނގު އެފްރިކާގެ ގައުމެއްކަމަށްވާ ޓޯގޯގައި ރަޖިސްޓްރީކޮށްފައިވާ ބޯޓު، އޮރިއޯން-ވީއަކީ އާންމުގޮތެއްގައި ލެޓިން އެމެރިކާއިން މެދުއިރުމައްޗަށް ގެރި ބަކަރި އުފުލާ ބޯޓެއްކަމަށް ވެއެވެ. މިބޯޓުގައި ޑްރަގް ސްމަގްލްކުރާ ކަމުގެ ރިޕޯޓްތައް ލިބެމުން ދިއުމާއެކު ބޯޓަށް ފާރަލަމުން އަންނަތާ ދެއަހަރެއްހާ ދުވަސް ވެފައިވާ ކަމަށް ވެއެވެ.

އޭއެފްޕީން ހޮނިހިރު ދުވަހު ރިޕޯޓްކޮށްފައިވާގޮތުގައި ސްޕެނިޝް ފުލުހުންނާއި އެމެރިކާގެ ޑްރަގް އެންފޯސްމަންޓް އެޑްމިނިސްޓްރޭޝަންގެ އިތުރުން މެރިޓައިމް އެނޭލިސިސް އެންޑް އޮޕަރޭޝަންސް ސެންޓަރ ފޯރ ނާކޮޓިކްސް ގުޅިގެން އަންގާރަ ދުވަހު ހިންގި އޮޕަރޭޝަނެއްގައި ޑްރަގް ފެނިފައިވަނީ، ޖަނަވާރުތަކަށް ކާންދޭ ތަކެތި އަޅާ ކޮންޓެއިނަރެއްގެ ތެރެއިން ކަމަށް ވެއެވެ. މި އޮޕަރޭޝަން ހިންގާފައިވަނީ ކެނަރީ އައިލަންޑްސްއާ 62 މޭލު ބޭރުގައި ބޯޓު އޮއްވައެވެ. ނުވަ ގައުމަކަށް ނިސްބަތްވާ 28 ފަޅުވެރިން ބޯޓުގައި ތިބިއިރު މި އެންމެން މިހާރު ވަނީ ހައްޔަރުކޮށްފައެވެ.

ޖަނަވަރީ މެދެއްހާތަނުގައި، ޓޯގޯގައި ރަޖިސްޓްރީކޮށްފައިވާ އެހެން ބޯޓެއް ކަމަށްވާ ބްލޫމަށްވެސް ފުލުހުން އަރައި ފާސްކުރުމުގެ ތެރޭގައި ހަމަ މިއަދަދަށް ވަނީ ޑްރަގް އަތުލައިގެންފައެވެ. އެހެންކަމުން މިމަހު އެކަނިވެސް 9 ޓަނުގެ ޑްރަގް މިވަނީ ސްޕްނިޝް ފުލުހުން އަތުލައި ގަނެފައެވެ.

5000 ޓަނުގެ، ބާވެފައި ހުންނަ އިލެކްޓްރޯނިކް ސާމާނު އެފްރިކާގެ ބައެއް ގައުމުތަކަށް ވަގަށް އެތެރެކުރަން އުޅުނު ބަޔަކުވެސް ހަމަ މިމަހު ސްޕެނިޝް ފުލުހުން ވަނީ އަތުލައިގެންފައެވެ. ސްޕެއިންގެ ކަމާބެހޭ އިދާރާ ތަކުން ހާމަކޮށްފައިވާގޮތުގައި، ބޭނުންކޮށްފައި ހުންނަ އިލެކްޓްރޯނިކް ސާމާނުގެ 331 ކޮންޓެއިނަރު ވަގަށް އެތެރެކުރަން މަސައްކަތްކުރި 43 މީހަކުވެސް ވަނީ ހައްޔަރުކޮށްފައެވެ.