ދަރުމަވަންތަ ބަލިކޮށް ރެހެންދި ގްރޫޕްގެ އެއް ވަނަ އަށް

އިންޓަ ސްކޫލް 17 އަހަރުން ދަށުގެ ފުޓުބޯޅަ މުބާރާތުގައި ދަރުމަވަންތަ ސްކޫލް ބަލިކޮށް ރެހެންދި ސްކޫލް އިން ގްރޫޕް ޑީގެ އެއް ވަނަ އަށް ޖެހިލައިފި އެވެ.

އާދިއްތަ ދުވަހުގެ ރޭ ގަލޮޅު ރަސްމީ ދަނޑުގައި މެޗަށް ކުރިމަތިލީއިރު، ދެ ޓީމު ވެސް ވަނީ ކުޅުނު ފުރަތަމަ މެޗު ކާމިޔާބުކޮށްފަ އެވެ. އެހެންކަމުން ގްރޫޕްގެ އެއް ވަނަ ހޯދުމަށް ދެ ޓީމަށް ވެސް އެއީ މުހިންމު މެޗަކަށްވި އެވެ. ވާދަވެރިކޮށް ދިޔަ ފުރަތަމަ ހާފު ރެެހެންދިން ނިންމާލީ އެއް ލަނޑުގެ ލީޑަކުން ކުރީގައި އޮވެގެންނެވެ. އެއީ މެޗުގެ 27 ވަނަ މިނެޓުގައި މުޙައްމަދު އަކުމަލް ނިޒާމް ޖެހި ލަނޑުންނެވެ. ދެ ވަނަ ހާފަށް ނުކުމެ ރެހެންދިން ވަނީ ތިން ލަނޑު ޖަހައި، މެޗުން މޮޅުވެފަ އެވެ. ދެ ވަނަ ހާފުގައި ރެހެންދިގެ ފުރަތަމަ ލަނޑު ޖެހީ ޝާއިން އިބްރާހީމް ރަމީޒް އެވެ. އޭގެ ފަހުން މެޗުގެ 65 ވަނަ މިނެޓުގައި މުޙައްމަދު އައިމަން އަލީ ވަނީ އެ ޓީމުގެ ތިން ވަނަ ލަނޑު ޖަހައިފަ އެވެ. ތިން މިނެޓު ފަހުން ރެހެންދިގެ ހަތަރު ވަނަ ލަނޑު ޖަހައިދިނީ އަޙުމަދު ޝަނާން އިބްރާހީމް އެވެ.

މެޗުން މޮޅުވެ ރެހެންދި ގްރޫޕްގެ އެއް ވަނައިގައި އޮތީ ކުޅުނު ދެ މެޗުން ވެސް މޮޅުވެ ހަ ޕޮއިންޓާއެކު އެވެ. ރެހެންދި އަށް މުބާރާތުގައި ދެން އޮންނާނީ ޣިޔާޘުއްދީން އިންޓަނޭޝަނަލް ސްކޫލާ ދެކޮޅަށް ކުޅޭ މެޗެވެ.