މަޖީދިއްޔާ އަތުން މާފުއްޓަށް މޮޅެއް، ބްރައިޓްވޭ ބަލިކޮށް ޣާޒީ ސްކޫލް ކުރިއަށް

އިންޓަރސްކޫލް 17 އަހަރުން ދަށުގެ ފުޓުބޯޅަ މުބާރާތުގެ ގްރޫޕްގެ އޭގައި މަޖީދިއްޔާ ސްކޫލާ ދެކޮޅަށް ކުޅުނު މެޗުން މާފުށީ ސްކޫލް މޮޅުވެއްޖެއެވެ.

ބުރާސްފަތި ދުވަހު ގަލޮޅު ރަސްމީ ދަނޑުގައި ކުޅުނު މެޗަކީ މުބާރާތުގައި މާފުށިން ކުޅުނު ދެ ވަނަ މެޗެވެ. އެ ޓީމުގެ ފުރަތަމަ މެޗުގައި ވަނީ ބަލިވެފައެވެ. ދެވަނަ މެޗުގައި މަޖީދިއްޔާގެ މައްޗަށް މާފުށިން ކުރިހޯދީ 2-1ންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީވެސް މާފުށިންނެވެ. މެޗުގެ ހަތްވަނަ މިނެޓުގައި އެ ޓީމަށް ކުރި ހޯދައިދިނީ އިބްރާހީމް ވިފާގު ނާސިރުއެވެ. ނަމަވެސް މެޗުގެ 77 ވަނަ މިނެޓުގައި މަޖީދިއްޔާގެ އަބްސަލް އަބްދުﷲ އާދަމް ވަނީ ލަނޑެއް ޖަހައި ނަތީޖާ ހަމަހަމަކޮށްފައެވެ. މެޗުން މާފުށި މޮޅުކޮށްދިން ލަނޑުވެސް ޖެހީ ވިފާގުއެވެ.

މި ގްރޫޕްގައި ބުރާސްފަތި ދުވަހުގެ ރޭ ބްރައިޓްވޭ އިންޓަރނޭޝަނަލް ސްކޫލާއި ޣާޒީ ސްކޫލް ބައްދަލުކުރި މެޗު ކާމިޔާބުކުރީ ޣާޒީ ސްކޫލެވެ. މި ދެ ޓީމު ވަނީ ކުޅުނު ފުރަތަމަ މެޗުވެސް ކާމިޔާބުކޮށްފައެވެ. ޣާޒީ ސްކޫލުން ބްރައިޓްވޭގެ މައްޗަށް ކުރިހޯދީ 6-0ންނެވެ. މެޗުގެ ފުރަތަމަ ހާފުގައި ޣާޒީ ސްކޫލުން ވަނީ ދެ ލަނޑު ޖަހާފައެވެ. އެ ޓީމުގެ އަނެއް ހަތަރު ލަނޑު ޖެހީ ދެވަނަ ހާފުގައެވެ. މެޗުގައި ޣާޒީ ސްކޫލްގެ ލަނޑުތައް ޖެހީ މުހައްމަދު އައިހަމް އިބްރާހީމްއާއި އަހުމަދު އަޒްލާން އަލީއެވެ. މެޗުގައި ކޮންމެ ކުޅުންތެރިޔަކުވެސް ވަނީ ތިން ލަނޑު ޖަހައި ހެޓްރިކް ހަދާފައެވެ.

މި ގްރޫޕްގެ އެއްވަނާގައި އޮތީ، ދެ މެޗުން މޮޅުވި ޣާޒީ ސްކޫލެވެ. އެއީ ކުޅުނު ދެ މެޗުން ހަ ޕޮއިންޓާއެކުއެވެ.