ޖޭޕީގެ ގައުމީ ކޮންފަރެންސް މާރޗް މަސް ނިމުމުގެ ކުރިން ބާއްވަނީ
17 ޖެނުއަރީ 2023 | އަންގާރަ 03:38ޕާޓީގެ އަސާސީ ގަވާއިދުގައި ވާގޮތުން މާރޗް މަހުގެ ކުރިން ގައުމީ ކޮންފަރެންސް ބާއްވަންޖެހޭ
ޖުމްހޫރީ ޕާޓީގެ މެންބަރުން
ޖުމްހޫރީ ޕާޓީ (ޖޭޕީ) ގެ ގައުމީ ކޮންފަރެންސް މާރވް މަސް ނިމުމުގެ ކުރިން ބާއްވާނެ ކަމަށް އެ ޕާޓީން ބުނެފިއެވެ.
ޖޭޕީގެ ފަރާތުން ސޯޝަލް މީޑިއާގައި އާންމުކުރި ވީޑިއޯއެއްގައި ޕާޓީގެ ސެކެޓްރީ ޖެނެރަލް އަލީ އާރިފް ވިދާޅުވީ ޕާޓީގެ ގައުމީ ކޮންފަރެންސް ވަރަށް އަވަހަށް ބޭއްވިގެންދާނެ ކަމަށެވެ.
އެޕާޓީގެ އަސާސީ ގަވާއިދުގެ 18 ވަނަ މާއްދާގެ ށ. ގައި ވާގޮތުން ޕާޓީގެ ކައުންސިލުން އެހެން ގޮތަކަށް ނުނިންމާހާ ހިނދަކު، އެޕާޓީގެ ހުރިހާ މެންބަރުން ތަމްސީލުކުރެވޭގޮތަށް ކޮންމެ ފަސް އަހަރަކުން ބާއްވާ ގައުމީ ކޮންފަރެންސް، ރިޔާސީ އިންތިޚާބު އޮންނަ އަހަރުގެ މާޗް މަސް ނިމުމުގެ ކުރިން ބާއްވަންވާނެ ކަން ބަޔާންކޮށްފައިވާކަމަށް އަލީ އާރިފް ވިދާޅުވިއެވެ. އަދި މިހެން އޮތްނަމަވެސް ޕާޓީގެ ކައުންސިލުން ނިންމައިފި ހިނދެއްގައި އެއަށްވުރެ އަވަހަށް ނުވަތަ އެއަށްވުރެ ލަހުންް މި ކޮންފަރެންސް ބޭއްވުމަށް ހުރަހެއްވެސް ނެތް ކަމަށް އަލީ އާރިފް ވިދާޅުވިއެވެ.
އޭނާ ވިދާޅުވީ މި ކޮންފަރެންސްއާ ގުޅޭގޮތުން އެ ޕާޓީގެ ކައުންސިލުން އަދި އިތުރު ގޮތެއް ނިންމާފައިނުވާކަމަށެވެ. އެހެންކަމުން މާރޗް މަސް ނިމުމުގެ ކުރިން ބާއްވާނެ ކަމަށް އަލީ އާރިފް ވިދާޅުވިއެވެ.
އަލީ އާރިފް އިތުރަށް ވިދާޅުވީ ޕާޓީގެ ގައުމީ ކޮންފަރެންސްއާ ގުޅޭގޮތުން މަޝްވަރާކުރުމަށް ވަރަސް އަވަހަށް ޕާޓީގެ ކައުންސިލް ބައްދަލުވުމެއް ބާއްވާނެ ކަމަށެވެ. މި ކޮންފަރެންސްއަށް ވާންޖެހޭ އިދާރީ ތައްޔާރީތައްވެސް ގާތްގަނޑަކަށް ހުރީ ނިމިފައި ކަމަށާއި ދުރު ނޫން މުސްތަގުބަލެއްގައި ބޭއްވޭނެ ކަމަށް އޭނާ ވިދާޅުވިއެވެ،
