ޔާމީނުގެ ޙުކުމުގެ ޝަރީއަތް ނިމުނު ގޮތުގެ ރިޕޯޓު މުއްދަތުގެ ތެރޭގައި ކޯޓުން ދޫކޮށްފި

ވ އާރަށު ހިޔާނާތުގެ މައްސަލައިގައި ރައީސް އަބްދުﷲ ޔާމީނަށް ކޮށްފައިވާ ޙުކުމުގެ ފައިނަލް ރިޕޯޓު ވަކީލުންނަށް ޙަވާލުކޮށްފިއެވެ.

މި ރިޕޯޓު ކްރިމިނަލް ކޯޓުން ވަކީލުންނަށް އަރުވާފައިވަނީ އާދިއްތަ ދުވަހުއެވެ.

ވ އާރަށު ހިޔާނާތުގެ މައްސަލައިގައި ޔާމީނު 11 އަހަރަށް ޖަލަށް ލައި، 5 މިލިއަން ޑޮލަރުން ޖޫރިމަނާ ކުރުމަށް އެ ކޯޓުގެ އިސްގާޒީ އަހުމަދު ޝަކީލު ޙުކުމް ކުރައްވާފައިވަނީ މިދިޔަ ޑިސެމްބަރު މަހުގެ 25 ވަނަ ދުވަހުއެވެ.

އެ ޙުކުމް އިސްތިއުނާފު ކުރައްވާނެކަމަށް ޔާމީނުގެ ވަކީލުން ވިދާޅުވެފައިވެއެވެ. ޔާމީނުގެ ވަކީލު އާދަމް ޝަމީމް ވިދާޅުވީ، ޝަރީއަތް ނިމުނު ގޮތުގެ ރިޕޯޓު ލިބިފައިވާ ކަމަށާއި، ކުރިއަށް އޮތީ ބުރަ ދުވަސްކޮޅެއް ކަމަށެވެ.

މިހާރު ސުޕްރީމް ކޯޓުގެ އައު ޕްރެކްޓިސް ޑައިރެކްޝަންގެ ދަށުން ދޫކުރަނީ ޝަރީއަތް ނިމުނު ގޮތް ކަމަށް ވެބްސައިޓުގައި ހިމަނާފައިވާ ރިޕޯޓާއި، ޝަރީއަތް ނިމުނު ގޮތުގެ ރިޕޯޓެވެ.

ޙުކުމް ކުރި ދުވަހުން ފެށިގެން ރަސްމީ 14 ދުވަސް ތެރޭގައި ޝަރީއަތް ނިމުނު ގޮތުގެ ރިޕޯޓު ދޫކުރަން ޖެހޭކަމަށް ސުޕްރީމް ކޯޓުގެ ޕްރެކްޓިސް ޑައިރެކްޝަންގައި ބަޔާންކޮށްފައިވާއިރު، އެ މުއްދަތުގެ ތެރޭގައި ރިޕޯޓު މިވަނީ ދޫކޮށްފައެވެ.

އާރަށު ހިޔާނާތުގެ މައްސަލައިގައި ޔޫސުފް ނައީމަށް ކޮށްފައިވަނީ ރިޝްވަތު ދިނުމުގެ ކުށުގެ ދައުވާއެވެ. އެ ދައުވާ ސާބިތުވެ، އޭނާ 3 އަހަރާއި، 2 މަހާއި 12 ދުވަހަށް ޖަލަށް ލުމަށް ކްރިމިނަލް ކޯޓުން ވަނީ ޙުކުމް ކޮށްފައެވެ. އެ ޙުކުމް ދިވެހިރާއްޖޭގެ ހައިކޯޓުގައި އިސްތިއުނާފު ކުރައްވާނެ ކަމަށާއި، މިހާރުވެސް އިސްތިއުނާފަށް ހުށައެޅުމަށް ވާންޖެހޭ ތައްޔާރީތައް ފަށާފައިވާކަމަށް އޭނާގެ ވަކީލުވެސް ވަނީ ވިދާޅުވެފައެވެ.

ކްރިމިނަލް ކޯޓުގެ ޙުކުމް ހައިކޯޓުގައި އިސްތިއުނާފު ކުރުމަށް 60 ދުވަހުގެ މުއްދަތެއް ލިބެއެވެ.