ހުޅުމާލެ ފޭސް 2ގައި ހުޅުމާލެ ހޮސްޕިޓަލްގެ ކްލިނިކެއްގެ ޚިދުމަތް ފަށަނީ
މި ކްލިނިކް ހުޅުވާފައި ހުންނާނީ ހުކުރު ދުވަސް ފިޔަވާ ކޮންމެ ދުވަހެއްގެ ހެނދުނު 10:00 އިން ހަވީރު 05:00 އަށް
ހުޅުމާލާގެ 02 ވަނަ ފޭސް
ހުޅުމާލޭ ފޭސް 2ގައި ހުޅުމާލޭ ހޮސްޕިޓަލްގެ ކުލިނިކެއް ހުޅުވުމަށް ހަމަޖެހިއްޖެއެވެ.
އެކަމާއި ގުޅޭ މައުލޫމާތު "ރާއްޖެ އެމްވީ" އަށް ހިއްސާކުރައްވަމުން އެ ހޮސްޕިޓަލްގެ އޮފިޝަލަކު ވިދާޅުވީ އެ ކްލިނިކް ގާއިމްކޮށްފައި ވަނީ އެޗް 16ގައި ކަމަށެވެ. އަދި އެ ކްލިނިކުން ޚިދުމަތް ދޭން ފަށާނީ އާދިއްތަ ދުވަހުން ފެށިގެން ކަމަށް އޭނާ ވިދާޅުވިއެވެ. އޭނާ އިތުރަށް ވިދާޅުވީ ހުޅުމާލޭގެ އާބާދީ އިތުރުވުމާއި އެކު އެ ހޮސްޕިޓަލުން ފަރުވާ ހޯދަމުންދާ މީހުންގެ ޢަދަދު ވަރަށް ބޮޑުތަނުން އިތުރުވަމުން އަންނަކަމަށެވެ. އެގޮތުން ފާއިތުވި ދެ ހަފްތާގެ ތެރޭގައި އެ ޢަދަދު ބޮޑުތަނުން އިތުރުވެފައިވާކަމަށް އެ ހޮސްޕިޓަލަށް ފާހަގަކުރެވިފައިވާ ކަމަށް އޭނާ ވިދާޅުވިއެވެ. އޮފިޝަލް ވިދާޅުވީ މި ކްލިނިކުން ފަރުވާދެމުން އަންނާނީ އާންމު ބަލިތަކަށް ކަމަށެވެ.
އަލަށް ހުޅުވާ މި ކްލިނިކްގެ ސަބަބުން އެ މައްސަލަ އަށް ހައްލު ލިބޭނެ ކަަމަށް ހުޅުމާލެ ހޮސްޕިޓަުން އުންމީދުކުރެއެވެ. މީގެ އިތުރުން މި ކްލިނިކު ހުޅުވުމުން ފޭސް 2ގައި ދިރިއުޅޭ ފަރާތްތަކަށް ލުއިވާނެ ކަމަށް އެ ހޮސްޕިޓަލުން އުންމީދުކުރެއެވެ.
ހުޅުމާލޭ ފޭސް 2ގައި ހުޅުވާ ކްލިނިކް މެދުވެރިކޮށް ވަކި ބަލިތަކުގެ ޚާއްސަ ޑޮކްޓަރުންނަށް ދައްކަން ބޭނުންވާ ފަރާތްތަކަށް އެޕޮއިންޓްމެންޓް ހެއްދޭނެ އިންތިޒާމުތައް ވަނީ ހަމަޖައްސާދީފައެވެ. މީގެ އިތުރުން އެ ކްލިނިކް މެދުވެރިކޮށް ލެބޯޓްރީ ޓެސްޓްތައް ހެދޭނެ އިންތިޒާމާއި، އެސްޓީއޯގެ ފާމަސީއެގެ ޚިދުމަތް ލިބޭނެ މަގު ވަނީ ފަހިކޮށްދީފައެވެ. ހުޅުމާލެ ހޮސްޕިޓަލުން ވަނީ ވަރަށް އަވަހަށް އެތަނުގައި ޕަބްލިކް ހެލްތު ޔުނިޓަކާއި، އެހެނިހެން ބައެއް ހިދުމަތްތައްވެސް ފަށާނެކަމަށް ބުނެފައެވެ. އަދި މި ކްލިނިކް ހުޅުވާފައި ހުންނާނީ ހުކުރު ދުވަސް ފިޔަވާ ކޮންމެ ދުވަހެއްގެ ހެނދުނު 10:00 އިން ހަވީރު 05:00 އަށްކަމަށް އެ ހޮސްޕިޓަލުން ވަނީ ބުނެފައެވެ.
