ރާއްޖޭގެ އިގްތިސާދުގެ ދެ ތަނބު ކަމަށްވާ މަސްވެރިކަމާއި ފަތުރުވެރިކަމުގެ މަތީގައި ރާއްޖެ ދެމިއޮތީ ބޭންކް އޮފް މޯލްޑިވްސް (ބީއެމްއެލް)ގެ ފަންވަރުގެ ސަބަބުން ކަމަށް، ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
ރައީސް މިފަދައިން ވިދާޅުވީ ބީއެމްއެލްގެ 40 ވަނަ އަހަރީ ދުވަހުގެ މުނާސަބަތުގައި ބޭއްވި ހަފްލާގައި ވާހަކަފުޅުދައްކަވަމުންނެވެ. ބީއެމްއެލްއަކީ ރާއްޖޭގެ އެންމެ ފުރަތަމަ ބޭންކް ކަަމަށް ވާއިރު، އެ ބޭންކް އުފެއްދީ ބަންގްލަދޭޝް ސަރުކާރުގެ ވަރަށް ބޮޑު އެހީތެރިކަމަކާ އެކުގައި ކަން ރައީސް ވަނީ ފާހަގަކުރައްވާފައެވެ. އަދި ބޭންކް އުފެއްދުމުގައި އިސް ދައުރެއް އަދާކުރެއްވި ކުރީގެ ރައީސް މައުމޫން އަބްދުލް ގައްޔޫމާއި އެ މަސައްކަތްތަކުގައި ހަރަކާތްތެރިވި އެހެން ފަރާތްތަކުން އަދާކުރި ދައުރު ފާހަގަކުރައްވައި އެކަމަށްޓަކައި ޝުކުރު އަދާކުރެއްވިއެވެ.
ރައީސް ވިދާޅުވީ ބީއެމްއެލްއިން ވަނީ ފާއިތުވި 40 އަހަރު ދުވަހުގެ ތެރޭގައި ރާއްޖޭގެ އިގްތިސާދަށް ދިރުން ގެނެސްދީފައި ކަމަށެވެ. މީގެ އިތުރުން އެ ބޭންކުން ދިވެހިންނަށް މާލީ އެހީތެރިކަން ފޯރުކޮށްދިނުމުގެ ސަބަބުން ސިނާއަތުތައް ކުރިއަރައިގެން ދިޔަ ކަމަށްވެސް ރައީސް ވަނީ ވިދާޅުވެފައެވެ. އެގޮތުން މަސްވެރިކަން ކުރިއެރުވުމަށް އެ ބޭންކުން ކޮށްފައިވާ މަސައްކަތްތައް ރައީސް ވަނީ ފާހަގަކުރައްވާފައެވެ. ބީއެމްއެލްއިން މަސްވެރިކަމަށް ޚާއްސަކޮށް ދޫކުރި ލޯންތަކުގެ ސަބަބުން އެ ސިނާއަތް ވަރަށް ބޮޑަށް ކުރިއެރިކަމަށާއި، މަސްވެރިންނަށް ލަކުޑި ދޯނިތައް ދޫކޮށް ފައިބަރު ދޯނިތަކުގައި މަސްވެރިކަން ކުރަން ފެށުނީ އެކަމުގެ ސަބަބުން ކަަމަށް ރައީސް ވަނީ ވިދާޅުވެފައެވެ.
ފަތުރުވެރިކަމަށްވެސް ބޭންކުން އިންގިލާބީ ބަދަލުތަކެއް ގެނެސްދީފަ ވާކަމީ ޝައްކެއް އޮތް ކަމެއް ނޫން. ފަތުރުވެރިކަން ފެށިތާ މިވީ 10 އަހަރު. މާގިނަ އަތޮޅުތަކަކަށް އޭރު ޓުއަރިޒަމެއް ތައާރަފެއްނުވޭ. މިދިޔަ 40 އަހަރު ތެރޭ ފަތުރުވެރިކަން އަތޮޅުތަކަށް ފެތުރިގެން ދިއުމުގަ މި ބޭންކްގެ މާލީ ދައުރު ވަރަށް ބޮޑު. އުމްރާނީ ތަރައްގީގަވެސް މި ބޭންކްގެ ދައުރު ވަރަށް ބޮޑު.ރައީސް ސާލިހު
މީގެ އިތުރުން އުމްރާނީ ތަރައްގީގެ ކުއްލި ބަދަލުތަކެއް ބީއެމްއެލްގެ ސަބަބުން ރާއްޖެއިން ފެނިގެން ދިޔަކަން ރައީސް ވަނީ ފާހަގަކުރައްވާފައެވެ. އެގޮތުން މާލޭގައި އިމާރާތްތައް ބުރިބުރިއަށް ނަގައި، ވިޔަފާރި ހިންގާނެ ޖާގަތައް އިތުރުވެ، ވިޔަފާރީގެ ފުރުސަތުތައް ލިބިގެން ދިޔައީ ބީއެމްއެލްއިން ފޯރުކޮށްދިން މާލީ އެހީގެ ސަބަބުންކަން ރައީސް ވަނީ ފާހަގަކުރައްވާފައެވެ.
ރާއްޖޭގައި ބީއެމްއެލް ހުޅުވުމުގެ ކުރިން ބައިނަލްއަގުވާމީ 3 ބޭންކް ހިނގަމުން ދިޔަނަމަވެސް، ބޭންކެއްގެ ހަގީގީ މަންފާ ލިބުނީ ބީއެމްއެލްގެ ސަބަބުން ކަމަށްވެސް ރައީސް ވިދާޅުވިއެވެ. ރައީސް ވަނީ، ބީއެމްއެލްގެ ދައުރު ފެނިގެން ދަނީ ހަމައެކަނި އިގްތިސާދީ ދާއިރާ ކުރިއެރުވުމުގައި ނޫން ކަމަށް ވިދާޅުވެފައެވެ. އެގޮތުން ސަރުކާރުން ފަހިކޮށްދޭ މާލީ ފުރުސަތުތަކުގައިވެސް ބީއެމްއެލްއިން މުހިންމު ދައުރެއް އަދާކުރާކަން ރައީސް ފާހަގަކުރެއްވިއެވެ. އޭގެތެރޭގައި ސަރުކާރުން ދޭ ހިލޭ އެހީއާއި ލޯން ސްކީމްގެ ހުރިހާ ކަމެއް ބަލަހައްޓަނީ ބީއެމްއެލް މެދުވެރިވެގެންކަން އެމަނިކުފާނު ވަނީ ފާހަގަކުރައްވާފައެވެ.
ހަމައެހެންމެ ކޮވިޑްގެ އާލަމީ ވަބާގެ ހާލަތު ރާއްޖެއަށް މެދުވެރިވިއިރު ބީއެމްއެލްއިން ދީފައިވާ އެހީތެރިކަން ރައީސް ފާހަގަކުރެއްވިއެވެ. މީގެ އިތުރުން، އިޖުތިމާއީ ޒިންމާގެ ދަށުން އެ ބޭންކުން ހިންގާ ހަރަކާތްތަކަށް ރައީސް ވަނީ ތައުރީފް ކުރައްވާފައެވެ. އޭގެ ތެރޭގައި ސްކޫލްތަކުގައި ހިންގާ ސެން ކްލާސްތަކުގައި ބޭނުންކުރާ ތަކެތި ހަދިޔާ ކުރުމާއި، ނުކުޅެދުންތެރިކަން ހުންނަ މީހުންގެ ތެރެއިން ހިނގާބިނގާވެ އުޅުމަށް ދަތިވާ މީހުންނަށް މޮޓޮރައިޒްޑް ވީލްޗެއަރ ހަދިޔާކުރުުން ފަދަ ކަންކަމަކީ މުހިންމު ކަންތައްތަކެއްކަން ރައީސް ވަނީ ފާހަގަކުރައްވާފައެވެ.
ރަައީސް ވަނީ، ކުރިއަށް އޮތް އަަހަރުތަކުގައި ބޭންކުގެ ޚިދުމަތްތައް މިހާރަށްވުރެ ފުޅާވާނެކަމަށް ގަބޫލުކުރައްވާ ކަމަށް ވިދާޅުވެފައެވެ. މީގެ އިތުރުން، މިހާރު ރާއްޖޭގެ 20 އަތޮޅުގައި ބީއެމްއެލްގެ 35 ގޮފި ހުރިއިރު، ބޭންކްގެ އެންމެ އިސް ޒިންމާއަކަށް ވާންވާނީ އާއްމުން ބޭންކްގައި ރައްކާކުރަން ބަހައްޓާ ފައިސާ ރައްކާތެރިކަމާއެކު ބެލެހެއްޓުން ކަމަށް ރައީސް ވިދާޅުވިއެވެ. އެހެންކަމުން، އެ ޒިންމާ އަދާކުރުމުގައި މިހާރަށްވުރެވެސް ހަރުދަނާ އިންތިޒާމްތަކެއް ހަމަޖައްސާނެ ކަމަށް އުންމީދުކުރައްވާ ކަަމަށް ރައީސް ވަނީ ވިދާޅުވެފައެވެ.
