ރޯވި ނީލަން ފިހާރަ ހިންގަން އިންޑަސްޓްރިއަލް ޒޯނުން ޖާގަ ދިނުން ރަނގަޅު: ސިޓީ ކައުންސިލް

ހޯމަ ދުވަހު ރޯވި ނީލަން ފިހާރަ ހިންގަން އިންޑަސްޓްރިއަލް ޒޯނުން ޖާގަ ދިނުން ރަނގަޅުކަމަށް ސިޓީ ކައުންސިލުން ބުނެފިއެވެ.

ނީލަން ފިހާރަ ކުރިން ހިންގަމުން ތަނުގައި އަލުން އެ ވިޔަފާރި ކުރުމަށް ފުރުސަތު ނުދިނުމަށް ސިޓީ ކައުންސިލުން ވަނީ ބުދަ ދުވަހު ބުނެފައެވެ.

ނީލަން ފިހާރައިގައި ރޯވެފައިވަނީ މިމަހުގެ 9 ވަނަ ދުވަހުގެ ފަތިހުގެ ވަގުތެއްގައެވެ. އެ ހާދިސާގައި ނީލަން ފިހާރަ ވަނީ އެއްކޮށް އަނދައި ހުލިވެފައެވެ. އެތަނަކީ ގިނަ އަދަދަކަށް ލަކުޑިފަދަ ތަކެތި ހުރި ތަނެކެވެ. ނީލަން ފިހާރާގައި ރޯވި އަލިފާންގަނޑު އެ ދުވަހު އެއްކޮށް ނިންވާލިނަމަވެސް އަދިވެސް އެ ސަރަހައްދުގައި ދުމުގެ އަސަރު އެބަހުއްޓެވެ.

ސިޓީ ކައުންސިލްގެ މޭޔަރ މުއިއްޒު ވިދާޅުވީ، ކުރިން ނީލަން ފިހާރަ ހިންގި ތަނުގައި އެތަން ހިންގަން ޖާގަ ދެވެން ނެތްކަމަށެވެ. އެހެންނަމަވެސް މާލޭގެ ނުވަތަ ހުޅުމާލޭގެ އިންޑަސްޓްރިއަލް ވިލެޖުން ބިމެއް ދިނުން ރަނގަޅު ކަމަށް އޭނާ ވިދާޅުވިއެވެ.

މީގެ އިތުރުން ނީލަން ފިހާރާގައި ހިނގި އަލިފާނުގެ ހާދިސާގައި ސިޓީ ކައުންސިލްގެ އެކޮމޮޑޭޝަން ބްލޮކެއްގައި ރޯވެ، ހާލުގައި ޖެހުނު މީހުން މިހާރު ތިބީ ހުޅުމާލޭގައި ހުންނަ ކޮވިޑް ފެސިލިޓީގައި ކަމަށް ސިޓީ ކައުންސިލުން ވަނީ ބުނެފައެވެ.

މާލެ ސިޓީގެ މޭޔަރު ޑރ. މުހައްމަދު މުއިއްޒު "ރާއްޖެ އެމްވީ"އަށް މައުލޫމާތު ދެމުން ވިދާޅުވީ، އެކޮމޮޑޭޝަން ބްލޮކްގައި ތިބި އެންމެންގެ ހާލު ރަނގަޅު ކަމަށެވެ. އެ މީހުން ވަގުތީ ގޮތުން މިހާރު ކޮވިޑް ފެސިލިޓީގައި ބައިތިއްބާފައި ތިބިއިރު، އެ މީހުންގެ އެކޮމޮޑޭޝަނަށް އިތުރު އިންތިޒާމްތަކެއް ހަމަޖެއްސުމުގެ މަސައްކަތް ސިޓީ ކައުންސިލުން ކުރަމުންދާ ކަމަށް ޑރ. މުއިއްޒު ވިދާޅުވިއެވެ. މީގެ އިތުރުން އެ އެންމެންގެ ކަންކަން ވަރަށް ކައިރިން ބަލަމުންދާކަން ސިޓީ ކައުންސިލުން ފާހަގަކުރެއެވެ.

ނީލަން ފިހާރާގައި ރޯވި އަލިފާންގަނޑު ފެތުރި، ސިޓީ ކައުންސިލްގެ އެކޮމޮޑޭޝަން ބްލޮކްގައި ރޯވުމާއެކު އެތަނުގައި ތިބި ބިދޭސީންނަށް އެހީވުމުގެ މަސައްކަތް، ކަމާގުޅޭ އިދާރާތަކުން ވަނީ ފަށާފައެވެ. ނޭޝަނަން ޑިޒާސްޓަރ މެނޭޖްމެންޓް އޮތޯރިޓީއާއި ސިޓީ ކައުންސިލާއި ދިވެހި ރެޑްކްރެސެންޓް ގުޅިގެން، ހާދިސާގެ އަސަރު ކުރި ލޭބަރ ކުއާޓަރސްތަކުގައި ދިރިއުޅުނު ބިދޭސީންގެ މައުލޫމާތު ވަނީ އެއްކޮށްފައެވެ.

ސިޓީ ކައުންސިލުން ބުނީ ރޯވި އެކޮމޮޑޭޝަން ބްލޮކްގައި ދިރިއުޅެމުންދިޔައީ 202 ސްޓާފުންކަމަށެވެ. އެ އެންމެން އެންމެ ފުރަތަމަ ބޭތިއްބީ އިމާދުއްދީން ސްކޫލްގައެވެ.