ލޮލުރޯގާ (ކޮންޖަކްޓިވައިޓިސް) ފެތުރޭތީ ސަމާލުވުމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން އިލްތިމާސް ކޮށްފިއެވެ.

އެޗްޕީއޭއިން ބުނީ، ލޮލުރޯގާ ފެތުރޭ މިންވަރު އިތުރުވަމުންދާ ކަމަށާއި، ބަލީގެ އަލާމާތްތައް ދެނެގަނެ ރައްކާތެރިކަމުގެ ފިޔަވަޅު އެޅުން ވަރަށް މުހިންމު ކަމަށެވެ.

ލޮލުރޯގާއަކީ ތަފާތު ވައްތަރުގެ ބެކްޓީރިއާ އަދި ވައިރަސްގެ ސަބަބުން ޖެހޭ ރޯގާއެކެވެ. މި ބަލީގެ އަލާމަތްތަކުގެ ތެރޭގައި ހުން އައުމާއި، ލޮލުން ފެން އައުމާއި، ލޯ ހިރުވުމުގެ އިތުރުން، ލޯ ރަތްވުމާއި، ލޮލުގައި މަޑުލުން ހިމެނެއެވެ.

ލޮލުރޯގާ ޖެހިއްޖެނަމަ، ނުވަތަ ޖެހިއްޖެކަމަށް ޝައްކު ކުރެވޭނަމަ ވީހާ އަވަހަށް ޑޮކްޓަރަށް ނުވަތަ ސިއްޙީ އެހީތެރިއަކަށް ދެއްކުމަށް އެޗްޕީއޭއިން ވަނީ އެދިފައެވެ.

އޭގެ އިތުރުން، ލޮލުރޯގާއިން ރައްކާތެރިވުމަށް ކުރެވިދާނެ ކަންކަމުގެ ތެރޭގައި ގިނައިން ސައިބޯނި ލައިގެން އަތް ދޮވުމާއި، އާންމުކޮށް އަތްލާ ތަކެއްޗާއި ތަންތަން ސާފު ކުރުމާއި، ލޮލުގައި އަތްލުމާއި އުނގުޅުމުން ދުރުހެލިވުމުގެ އިތުރުން، ބޭނުންކޮށްފައިވާ ޓިޝޫ ފަދަ ތަކެތި ރައްކާތެރި ގޮތުގައި ނައްތާލުން ހިމެނެއެވެ.

ލޮލުރޯގާ ޖެހިފައިވާ މީހާ ބޭނުން ކުރާ ލޮލަށް އަޅާ ބޭސް، ބަލި ނެތް ފަރާތްތަކުން ބޭނުން ނުކުރުމަށްވެސް އެޗްޕީއޭއިން ވަނީ އެދިފައެވެ.