އާރަށު ހިޔާނަތް: ޔޫސުފް ނައީމަށް ކުރި ޙުކުމް އިސްތިއުނާފު ކުރާނެ

ވ އާރަށު ހިޔާނާތުގެ މައްސަލައިގައި ޔޫސުފް ނައީމްގެ މައްޗަށް ކޮށްފައިވާ ޙުކުމް އިސްތިއުނާފު ކުރުމަށް ވަނީ ނިންމާފައެވެ.

އާރަށު ހިޔާނާތުގެ މައްސަލައިގައި ޔޫސުފް ނައީމަށް ކޮށްފައިވަނީ ރިޝްވަތު ދިނުމުގެ ކުށުގެ ދައުވާއެވެ. އެ ދައުވާ ސާބިތުވެ، އޭނާ 3 އަހަރާއި، 2 މަހާއި 12 ދުވަހަށް ޖަލަށް ލުމަށް ކްރިމިނަލް ކޯޓުން ޙުކުމް ކޮށްފައިވަނީ މިދިޔަ ޑިސެމްބަރު މަހުގެ 25 ވަނަ ދުވަހުއެވެ.

ރާއްޖެއެމްވީއާ ވާހަކަ ދައްކަވަމުން ޔޫސުފް ނައީމްގެ ވަކީލު ހަމްޒާ ލަތީފް ވިދާޅުވީ، އެ ޙުކުމް ދިވެހިރާއްޖޭގެ ހައިކޯޓުގައި އިސްތިއުނާފު ކުރައްވާނެ ކަމަށާއި، މިހާރުވެސް އިސްތިއުނާފަށް ހުށައެޅުމަށް ވާންޖެހޭ ތައްޔާރީތައް ފަށާފައިވާކަމަށެވެ.

މި މައްސަލައިގައި ޔޫސުފް ނައީމްގެ އަތުން ރިޝްވަތު ނަގައި، އެ ފައިސާ ލޯންޑަރ ކޮށްފައިވާތީ ޔާމީނުގެ މައްޗަށް ވަނީ 11 އަހަރުގެ ޖަލު ޙުކުމެއް އިއްވައި، 5 މިލިއަން ޑޮލަރުން ޖޫރިމަނާކޮށްފައެވެ. ޔާމީނުގެ ވަކީލުންވެސް ވިދާޅުވެފައިވަނީ ޙުކުމް އިސްތިއުނާފު ކުރައްވާނެ ކަމަށެވެ.

ކްރިމިނަލް ކޯޓުގެ ޙުކުމް ހައިކޯޓުގައި އިސްތިއުނާފު ކުރުމަށް 60 ދުވަހުގެ މުއްދަތެއް ލިބެއެވެ.

ދިވެހިރާއްޖޭގައި ޑޮލަރުގެ ސައްޙަ ވިޔަފާރިކުރާ އެތައް ބަޔަކު ތިއްބައި، ޔޫސުފް ނައީމް ފިޔަވައި ޔާމީނަށް ޑޮލަރު ވިއްކާނެ އެހެން ފަރާތެއް ނުވުމަކީ ހަމަ އިއްތިފާޤެއްކަމަށް ދިފާއުން ބުނާއިރު، އެހާ ގިނަ އިއްތިފާޤުތަކެއް ހަމަ އެންމެ ޓްރާންސެކްޝަނަކާއި ގުޅިގެން ހިނގާ ދިއުމަކީ ހަމަ ބުއްދިއަށް ޤަބޫލު ނުކުރެވޭ ނާދިރު ކަމެއްކަމަށް އިސްގާޒީ އަހުމަދު ޝަކީލު އިއްވެވި ޙުކުމުގައިވެއެވެ.

މި މައްސަލައިގެ ތަހުގީގުގައި ޔާމީނާއި ޔޫސުފް ނައީމްވެސް ހެއްކެއް ހުށައަޅާފައެއް ނުވެއެވެ. ނަމަވެސް މައްސަލައިގެ ޝަރީއަތް ފެށުމުން، އެއް ހެކިތަކެއް ހުށައަޅާފައިވާއިރު، ހުރިހާ ހެކިވެރިންވެސް ވަނީ ޔާމީނާއި ޔޫސުފް ނައީމާ ދެމެދު ވެފައިވަނީ ޑޮލަރު މާރު ކުރުމުގެ ވިޔަފާރީގެ މުއާމަލާތެއްކަމަށް ހެކިބަސް ދީފައެވެ.

އެހެންނަމަވެސް، އެ ހެކިވެރިންނަކީ އޮޅުވާލައިގެން، ވަކި ކަމެއް ވަކި ގޮތަކަށް ހިނގިކަން ދެއްކުމަށް އުފައްދާފައިވާ ހެކިންކަން ސާބިތުވާކަމަށް ޙުކުމުގައި ބުނެއެވެ.