ރައީސް ސާލިހުގެ ވިޝަންއެއް ނެތް: ރައީސް ނަޝީދު
8 ޖެނުއަރީ 2023 | އާދީއްތަ 13:27ރައީސް ނަޝީދު ވިދާޅުވީ، ރައީސް ސާލިހުގެ ފަހަތްޕުޅަށް އެމްޑީޕީ މެމްބަރުން ނާރާނެކަމަށް
އެމްޑީޕީގެ ރިޔާސީ ޕްރައިމަރީގެ ކެމްޕޭނަށް ރައީސް ނަޝީދު ވަނީ "ހިޔާ" ފްލެޓް ސަރަހައްދަށް ވަޑައިގެންފައި
ރައީސް އިބްރާހިމް މުހައްމަދު ސާލިހުގެ އެއްވެސް ތަސައްވުރެއް ނެތްކަަމަށް، އެމްޑީޕީ ރިޔާސީ ޕްރައިމަރީގެ ކެނޑިޑޭޓް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އާދިއްތަ ދުވަހު ބޭއްވި ނޫސްވެރިންގެ ބައްދަލުވުމެއްގައި ރައީސް ނަޝީދު ވަނީ، ރައީސް ސާލިހަށް ވަރަށް ބޮޑަށް ފާޑުވިދާޅުވެފައެވެ. އެގޮތުން ކުޑަ ރަށެއް އަދި ބޮޑު ރަށެއް ތަފާތު ނުކުރައްވައި ޚިދުމަތް ދެއްވާނެކަމަށް ރައީސް ވިދާޅުވާތީ އެކަމަށްވެސް ރައީސް ނަަޝީދު ވަނީ ފާޑުވިދާޅުވެފައެވެ. ރައީސް ސާލިހު އެފަދައިން ވިދާޅުވަނީ ރަށްރަށާމެދު އަމަލުކުރަންޖެހޭ ގޮތް އެނގިވަޑައިނުގަންނަވާތީ ކަމަށް ނަޝީދު ވިދާޅުވިއެވެ. އެގޮތުން ކުޅުދުއްފުށިފަދަ ބޮޑެތި ތަންތަނާމެދު ރައީސް ނަޝީދުގެ ބޮޑު އުންމީދެއް އޮތްކަމަށް ވިދާޅުވިއެވެ. އަދި ކުދި ރަށްރަށާއި ބޮޑެތި ރަށްރަށާ ތަފާތު ނުކުރާނެކަމަށް ބުނެގެން ރަށްރަށަށް ކަންކަން ކޮށްނުދެވޭނެ ކަމަށް ރައީސް ނަޝީދު ވިދާޅުވިއެވެ،
މީގެ އިތުރުން، ރައީސް ނަޝީދު ވަނީ ރައީސް ސާލިހުގެ މަސައްކަތްޕުޅު ލަސްކަމަށް ސިފަކުރައްވައި އެކަމަށްވެސް ފާޑުވިދާޅުވެފައެވެ. އެގޮތުން ފިނިހަކައެއްގެ ދުވެލި ބާރުކަމަށް ނުބުނެވޭނެކަމަށް އެމަނިކުފާނު ވިދާޅުވިއެވެ. މީގެ އިތުރުން، ރަށްރަށަށް ދިޔުމުން ރައީސް ސާލިހަށް ވޯޓު ދޭން ނުބުނުމަށް ރައްޔިތުން އެދޭކަމަށް އެމަނިކުފާނު ވަނީ ވިދާޅުވެފައެވެ.
އިތުރަށް ވާހަކަފުޅުދައްކަވަމުން ނަޝީދު ވިދާޅުވީ، އިތުރު އެހެން އެއްވެސް މީހަކަށް ރައީސް ސާލިހާ ދިމާއަށް އެއްޗެއް ބުނުމުގެ ފުރުސަތު ނުދެއްވާނެ ކަަމަށެވެ. ރައީސް ސާލިހަށް ފާޑުވިދާޅުވާނީ އެމަނިކުފާނު އަމިއްލަފުޅަށް ކަމަށް ރައީސް ނަޝީދު ވަނީ ވިދާޅުވެފައެވެ. ނަމަވެސް ރައީސް އެހެން މީހުން ބޭނުންކުރައްވައިގެން އެމަނިކުފާނަށް ފާޑުކިޔުން އަމާޒުކުރައްވާ ކަަމަށް ރައީސް ނަޝީދު ވަނީ ތުހުމަތުކުރައްވާފައެވެ. ރައީސް ނަޝީދު ވިދާޅުވީ ރައީސް ސާލިހުގެ ފަހަތްޕުޅަށް އެމްޑީޕީ މެމްބަރުން ނާރާނެކަމަށެވެ.
