އިޓާލިއަން ލީގުގައި މޮންޒާއާ ދެކޮޅަށް ކުޅުނު މެޗު އެއްވަރުވެ، ޕޮއިންޓަކުން ފުއްދާލަން އިންޓަ މިލާނަށް ޖެހިއްޖެ އެވެ.

މޮންޒާގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗު އެއްވަރުވީ 2-2 އިންނެވެ. އިންޓައިން މޮންޒާއާ ދެކޮޅަށް ނުކުތީ ރަނގަޅު ފޯމެއްގައި އޮވެ އެވެ. އޭގެ ކުރީ މެޗުގައި އެ ޓީމުން ވަނީ މި ސީޒަންގެ އިޓާލިއަން ލީގުގައި ނަޕޯލީން ދަމަހައްޓަމުން އައި މޮޅުވުމުގެ ސިލްސިލާ އަށް ނިމުން ގެނެސްފަ އެވެ. މޮންޒާއާ ދެކޮޅަށް ކުޅުނު މެޗު އެއްވަރުވީ ފަހު ވަގުތު އިންޓަގެ ނެދަލެންޑްސް ސެންޓަބެކް ޑެންޒެލް ޑަމްފްރީސް އަތުން ބައިކޮޅަށް ވަން ލަނޑާއެކު އެވެ.

މެޗުގައި ފުރަތަމަ ލަނޑު ޖަހައި ލީޑު ނެގީ ވެސް އިންޓަ އިންނެވެ. މެޗުގެ 10 ވަނަ މިނެޓުގައި އަލެސާންޑްރޯ ބަސްޓޮނީ ހުރަސްކޮށްދިން ބޯޅައެއް، މޮންޒާގެ އޭރިޔާ ތެރޭގައި ހުރެ ފައިން ޖަގާ ގޯލަށް ފޮނުވާލައިގެން އިންޓަ އަށް ލީޑު ނަގައިދިނީ މަޓެއޯ ޑާމިއަން އެވެ. ނަމަވެސް އޭގެ މިނެޓެއް ފަހުން މޮންޒާ އިން ވަނީ ނަތީޖާ ހަމަހަމަކޮށްފަ އެވެ. އިންޓަގެ އޭރިޔާ ބޭރުން މަޓެއޯ ޕެސެނީ ދިން ބޯޅައެއް ގޯލުގެ އަރިމަތީ ދާގަނޑުގެ ތެރެއަށް ފޮނުވާލައިގެން ނަތީޖާ ހަމަހަމަކޮށްދިނީ ޕެޓްރިކް ޗިއުރިއާ އެވެ. ދެ ވަނަ ފަހަރަށް އިންޓަ އަށް މެޗުގައި ލީޑު ނަގައިދިނީ އާޖެންޓީނާގެ ފޯވާޑް ލައުޓާރޯ މާޓިނޭޒް އެވެ. އެއީ މެޗުގެ 22 ވަނަ މިނެޓުގައި މޮންޒާގެ ޑިފެންޑަރު ޕަބްލޯ މާރީ އަށް ހެދުނު ގޯހެއްގައި ބޯޅަ ހޯދައި، ގޯލަށް ފޮނުވާލައިގެންނެވެ. ދެ ވަނަ ފަހަރަށް މޮންޒާ އިން ނަތީޖާ ހަމަހަމަ ކުރީ މެޗުގެ އިތުރު ވަގުތުގައި އެ ޓީމުގެ ޗިއުރިއާ ހުރަސްކުރި ބޯޅައެއް ބޭރުކޮށްލަން އުޅުމުގެ ތެރޭގައި އިންޓަގެ ޑަމްފްރީސް އަތުން ގޯލަށް ވަން ލަނޑުންނެވެ.

މެޗު އެއްވަރުވުމުން އިންޓަ އޮތީ ކުޅުނު 17 މެޗުން 24 ޕޮއިންޓާއެކު ހަތަރު ވަނައިގަ އެވެ. މޮންޒާ އޮތީ ކުޅުނު 17 މެޗުން 18 ޕޮއިންޓާއެކު ތާވަލްގެ 14 ވަނައިގަ އެވެ.