މާލެއާއި ވިލިމާލެ މަގުތަކުންނާއި ގޯޅިތަކާއި ޕާކުތައް އަދި މައިޒާންތައް ކުނިކަހައި ސާފުކޮށް، ކުނި ނެގުމުގެ މަސައްކަތް ކުރުމަށް ވެމްކޯ އާއެކު މާލެ ސިޓީ ކައުންސިލުން ހަދާފައިވާ އެއްބަސްވުން ނިމުމަކަށް ގެނެސް އެމަސައްކަތް މާލެ ސިޓީ ކައުންސިލުން ކުރަން ފެށުމުން އެމަސައްކަތުގައި ކުރިން ހަރަކާތްތެރިވި ވެމްކޯގެ މުވައްޒަފުންނަށް ކުންފުނީގެ ތެރެއިން ވަޒީފާ ހަމަޖައްސައިދެމުން އަންނަކަމަށް ވެމްކޯގެ މެނޭޖިންގ ޑިރެކްޓަރ ޔޫސުފް ސިރާޖު ވިދާޅުވެއްޖެއެވެ.
ޑިސެމްބަރ މަހުގެ 25 ވަނަ ދުވަހާ ހަމައަށް މާލެ ސިޓީ ކައުންސިލުން ވެމްކޯ އާއެކު ހަދާފައިވާ އެއްބަސްވުން ނިމުމަކަށް އައިސްފައިވާއިރު އެއެއްބަސްވުން އައުނުކުރުމަށް ސިޓީ ކައުންސިލުން ނިންމުމާއެކު ވެމްކޯއިން އެންމެ ބޮޑަށް ކަންބޮޑުވުން ފާޅުކުރި އެއް ކަމަކީ ކުނި ކެހުމުގެ މަސައްކަތުގައި ހަރަކާތްތެރިވާ 200އެއްހާ ދިވެހި މުވައްޒަފުންގެ ވަޒީފާއެވެ. ސިޓީ ކައުންސިލުން ވަނީ މާލެ އާއި ވިލިމާލެ ސާފުކުރުމަށް މުވައްޒަފުން ނަގާފައެވެ.
އެގޮތުން 108 މީހުން ހޯދަން އިއުލާންކުރިއެވެ. އަދި އިތުރު މީހުންވެސް ނަގާނެކަމަށް، މިމަސައްކަތް މާލެ ސިޓީ ކައުންސިލުން ފެށުމާއެކު އެކަމާއި ގުޅޭގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި މާލެ ސިޓީގެ މޭޔަރ ޑރ މުހައްމަދު މުއިއްޒު ވިދާޅުވިއެވެ. ނޫސްވެރިންގެ ބައްދަލުވުމުގައި ވާހަކަދައްކަވަމުން މުއިއްޒު ވިދާޅުވީ ކުނިކަހާ މީހުން ހޯދުމަށް ހުޅުވާލުމުން 400 އެޕްލިކޭޝަން ލިބުނުކަމަށެވެ. އަދި އޭގެތެރޭގައި ކުރީގައި ވެމްކޯގައި ކުނި ކެހުމުގެ މަސައްކަތުގައި އުޅުނު މީހުންވެސް ހިމެނޭކަމަށް މޭޔަރު ވިދާޅުވިއެވެ.
ވެމްކޯގެ މަސައްކަތްތަކާއި ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން ވެމްކޯގެ އެމްޑީ ޔޫސުފް ސިރާޖު ވިދާޅުވީ ސިޓީ ކައުންސިލުން ކުނިކެހުމުގެ މަސައްކަތުގެ ވަޒީފާއަށް ހަމަޖެހިގެން ދިޔައީ ވެމްކޯގައި އެމަސައްކަތްކުރަމުންދިޔަ މީހުންގެ ތެރެއިން 11 މީހުންނަށް ކަމަށް މައުލޫމާތު ލިބިވަޑައިގަންނަވާފައިވާކަމަށެވެ. ސިރާޖު ވިދާޅުވީ ކުނިކެހުމުގެ މަސައްކަތުގައި ހަރަކާތްތެރިވި ވެމްކޯގެ މުވައްޒަފުންނަށް ކުންފުނީގެ ތެރެއިން ވަޒީފާ ހަމަޖެއްސުމުގެ މަސައްކަތްތައް ކުރެވެމުންދާކަމަށެވެ.
އަޅުގަނޑުމެން ދޭން ބޭނުންވާ ޔަގީންކަމަކީ އެއްވެސް މުވައްޒަފަކު ވަޒީފާއިން ވަކިނުކުރާނެ ކަމުގެ ޔަގީންކަން. އެއާއެކު މިހާރު މުވައްޒަފުންނާ މަޝްވަރާކުރަމުން މިދަނީ ކިހިނެއްތޯ އެބޭފުޅުންނަށް އެންމެ ފަސޭހަ ގޮތްތަކަކީ، ކޮބައިތޯ އެބޭފުޅުންނަށް އަޅުގަނޑުމެންގެ ތެރޭގައި ހުރި އެންމެ ފަސޭހަ ވަޒީފާތަކަކީ ބަދަލުކުރެވޭނެ. އޭގެތެރެއިން ބައެއް ބޭފުޅުން ބަދަލުކުރަމުންމިދަނީ ވަޒީފާތަކަށް. ވިސްނުމެއް ނޫން ވަޒީފާއިން ކަނޑާލުމަކީ. ވެމްކޯގައި ދެމިތިބެން ބޭނުންވާ މުވައްޒަފުންނަށް ފުރުސަތުތައް ދެމުން ގެންދާނަން.ވެމްކޯގެ މެނޭޖިންގ ޑިރެކްޓަރ ޔޫސުފް ސިރާޖު
ވެމްކޯއިން މާލެ އާއި ވިލިމާލެ ކުނިކަހާ ސާފުކުރުމުގެ މަސައްކަތްކުރަމުން ގެންދިޔައީ ރޭގަނޑު 11 ން ފެށިގެން މެންދަން ވަންދެންނެވެ. ސިޓީ ކައުންސިލުން އެމަސައްކަތްކުރަމުންދަނީ ދެ ޝިފްޓަކަށް ބަހާލައިގެންނެވެ. ކުނި ކެހުމުގެ މަސައްކަތް ރޭގަނޑު 10ން ހެނދުނު 6ށް އަދި ހެނދުނު 6ން މެންދުރު 12ށް ކުރިޔަށް ގެންދެއެވެ.
