ކެންސަރަށް ފަރުވާ ހޯދަމުން ދަނިކޮށް، އިޓަލީގެ ފުޓުބޯޅަ ލެޖެންޑް ގިއަލުންކާ ވިއައްލީ މަރުވެއްޖެ

އިޓަލީގެ ފުޓުބޯޅަ ލެޖެންޑް ގިއަލުންކާ ވިއައްލީ މަރުވެއްޖެ އެވެ.

އުމުރުން 58 އަހަރުގައި ވިއައްލީ މަރުވީ ކެންސަރު ބައްޔަށް ފަރުވާ ހޯދަމުން ދަނިކޮށް، ހުކުރު ދުވަހުގެ ވަގުތެއްގަ އެވެ. 2017 ވަނަ އަހަރުން ފެށިގެން ވިއައްލީ އަންނަނީ ކެންސަރު ބަލި ޖެހިފައިވާކަން އެނގުމުން، އެކަމަށް ފަރުވާ ހޯދަމުން ކަމަށް އިޓަލީގެ މީޑިއާ ރިޕޯޓުތައް ބުނެ އެވެ.

ވިއައްލީ އޭނާގެ ސީނިއާ ކެރިއަރު ފެށީ 1980 ވަނަ އަހަރު އެވެ. އޭގެ ފަހުން ވިއައްލީ ވަނީ ހަތަރު ކުލަބަކަށް ކުޅެފަ އެވެ. އޭގެ ތެރޭގައި ސިރޮމޮނީސް، ސެމްޑޯރިއާ، ޔުވެންޓަސް އަދި ޗެލްސީ ހިމެނެ އެވެ. ވިއައްލީ އޭނާގެ ކުލަބު ފުޓުބޯޅަ ކެރިއަރު ހުއްޓާލީ 1999 ވަނަ އަހަރު ޗެލްސީންނެވެ. ކުލަބު ފުޓުބޯޅައިގައި ވިއައްލީ ވަނީ އޭނާ ކުޅުނު 673 މެޗުން 259 ލަނޑު ޖަހައިފަ އެވެ. އޭނާ ވަނީ 13 ތައްޓެއް ކާމިޔާބުކޮށްފަ އެވެ. ވިއައްލީ އަށް އިޓަލީގެ ޤައުމީ ޓީމުން ޖާގަ ލިބުނީ 1985 ވަނަ އަހަރު އެވެ. ޤައުމީ ޓީމަށް ކުޅެދިން އަށް އަހަރުގެ ތެރޭގައި އޭނާ ވަނީ 59 މެޗު ކުޅެ، 16 ލަނޑު ޖަހައިފަ އެވެ. އިޓަލީއާއެކު ވިއައްލީ ވަނީ 1990 ވަނަ އަހަރުގެ ފީފާ ވޯލްޑް ކަޕް މުބާރާތުގެ ލޯ މެޑަލް ހޯދާފަ އެވެ. ވިއައްލީ ފާހަގަވެގެން ގޮސްފައިވަނީ އެ ދުވަސްވަރު ކުޅުނު މޮޅު ފޯވާޑެއްގެ ގޮތުގަ އެވެ.

ފުޓުބޯޅަ ކުޅުން ހުއްޓާލުމަށްފަހު ވިއައްލީ ވަނީ 1998 ވަނަ އަހަރު ކޯޗިިންގެ ތެރެއަށް ނިކުމެފަ އެވެ. އޭނާ ވަނީ ޗެލްސީގެ އިތުރުން ވަޓްފޯޑުގެ ކޯޗުކަން ކޮށްފަ އެވެ. ކޯޗެއްގެ ގޮތުގައި ޗެލްސީއާއެކު ވެސް ވިއައްލީ ވަނީ ކާމިޔާބީތަކެއް ހޯދާފަ އެވެ. ވިއައްލީ މަރުވުމާއެކު، ފުޓުބޯޅައިގެ އެކި އެކި ފަރާތްތަކުން އަންނަނީ އެކަމުގެ ހިތާމަ ފާޅުކޮށް، އޭނާގެ އާއިލާ އަށް ތައުޒިޔާ ފޮނުވަމުންނެވެ.